Jobe 5 - MUKANDA USANDU WA ZAMBI 1975

¹ Sanyika haliapwila tuchitale yoze makukumbulula. Hakachi ka angelo neya muhanjika?

² Kulifwita muchishiha chihepuke. Nyi malichafukila mu uchelo wenyi achi hikufwa.

³ Ami hinamona chihepuke kutanda miji alioze henaho nashingile zuwo lienyi.

⁴ Ana jenyi a malunga kawanyine uhwimino; maafwenya mu chota ni yoze maapulula wakuhi.

⁵ Mbuto yenyi mayilia kuli akwa zala, aye mayitambula kwe ku mbimbo, mba muheto unajikinyina upite wenyi.

⁶ Kuyindama kuchakatukile mu fufuta, lamba kuliasokele mu mavu,

⁷ alioze ku chisemewa cha mutu chizechene ngwe maleka a kahia kakuhehukila kwilu.

⁸ Nyi yami, kachi mungufupa Zambi, kuli Zambi mungukunjika chikuma chami.

⁹ Aye kakulinga yuma yinene ya yijimbikilo; yikomokeso yenyi kechi kuhasa kuyalula.

¹⁰ Kakunokesa vula hashi, kakutuma meya ha minda.

¹¹ Kakunangamisa akwa kulikehesa; kakuzundula akwa kulinyenga nikwalamwina.

¹² Kakufuwisa kutaka cha yikanyame, mba moko jo kechi kuhasa kukumba.

¹³ Kakukwata akwa mana ha kukanyama cho; kakusulisa nikawashi kuhala cha akwa malinjekela.

¹⁴ Tangwa ha muchima o mapwa mu milima; ha mwalwa mapapata ngwe ha ufuku.

¹⁵ Alioze kakupulula akwa kuhona ku katana, ni ku kanwa lio, ni kuli akwa ndundo.

¹⁶ Chocho yiswale matalatala ni uhenge kuwakuhola.

¹⁷ Kawaha yoze mamulongesa kuli Zambi; kashika kanda ulelesa kufumba cha Mukwa-Ndundo-Jeswe.

¹⁸ Mumu kakulemeka alioze majichika mbandu; kakulamba alioze moko jenyi mawuka.

¹⁹ Makupulula kasambano ku lamba, kashimbiali kechi kutayiza chipi kukukundama.

²⁰ Mu kapunga makukula mu kufwa; mu jita makukula ku tachi ja katana.

²¹ Makuswekela ku kulaswola cha malimi; muze kwonwona muchikuheta kuchichi kukushima.

²² Ha kwonwona ni kapunga mukaseha; kuchi kwivwa woma wa ngongo ja hashi.

²³ Chipwe mawe a mu yambu mapwa tusendo twe; ni ngongo ja mu yambu mapwa ni sambukila kuli yena.

²⁴ Kumunyingika ngwe, Zuwo liami linakolo; ha kutala ku limba lie, nichimwe chinahono.

²⁵ Kumunyingika ngwe, Ana jami makapwa anji; waze masemukina kuli yami ngwe mwambu wa hashi.

²⁶ Kuheta che ku fuka muchipwa ni miaka ye hiyahia yinji; ngwe chichita cha mbuto chakwiza ku chizungwilo ha mwaka wacho.

²⁷ Chino hitwachipolongoza; chuma chamwenemwene. Panjika, uchise ku mbunge.