Jobe 42 - MUKANDA USANDU WA ZAMBI 1975

¹ Henaho Jo yakumbulula kuli Yehova ngwenyi,

² Ngunanyingika unahase kulinga yuma yeswe, nichimwe chuma muchifuwa chize mupala kulinga.

³ Iya yono kakujimbisa mana ni maliji keshi yinyingi? Kuma, hinamba chize kuchangulumbunukine; yuma yanguhiana ya kukomwesa, te chayinyingikine.

⁴ Panjika mba munguhanjika. Mungukuhula mba yena mukumbulula.

⁵ Nevwile ni matwi jami lufuma we, alioze haliapwila ngunakumono zwalala;

⁶ kashika ngunalilelesa, ngunalikonyeka mu fufuta ni uto.

⁷ Muze Yehova hanahanjika maliji ano ni Jo, yamba kuli Elifaze Ka-Temane ngwenyi, Ufwatulo wami unavunduka hali yena ni hali masepa je aali mumu kunwahanjikile kanawa ha kutwala kuli yami ngwe kavumbi kami Jo walingile.

⁸ Kashika andenu kuji a ngombe shimbiali ni kuji a panga shimbiali nuye kuli kavumbi kami Jo. Munulambula hali yenwene mulambu wa kulumba mba kavumbi kami Jo manulembela mumu mungupanjika ku kulemba chenyi, chichi kunulinga nikulita ni uhepuke wenu mumu kunwahanjikile kanawa ha kutwala kuli yami ngwe kavumbi kami Jo walingile.

⁹ Chocho Elifaze Ka-Temane, ni Bilidade Ka-Shuha, ni Zofare Ka-Nama yaya yalinga chize Yehova haatuma mba Yehova yatambula kulemba cha Jo.

¹⁰ Mba Yehova yahilwisa kuwaha cha Jo muze iye halembela akwo. Yehova yamwaha yisuho yiali ya chize apwile nacho kushi.

¹¹ Henaho kwejile kuli iye ana-akwo ni ayayo ni mandumbu jenyi eswe ni waze eswe amunyingikine kushi. Yatambwila kulia hamwe nenyi mu zuwo lienyi ni kumunangisa ni kumulembejeka ha yikalu yeswe Yehova wanehene hali iye. Mutu ni mutu yamunehena mbongo ni kazeya ka oru.

¹² Yehova aye yawahisa matangwa a Jo a kusula kuhiana uputukilo. Wapwile ni kumi lia tununu ni tununu awana a mapanga, ni tununu asambano a tumelu, ni kanunu ka makanga a ngombe, ni kanunu ka yihwo ja yimbulu.

¹³ Yasema nawa ana a malunga shimbiali ni a mapwo atatu.

¹⁴ Yaluka mukulwana Jemima, ni wamuchiali aye Kezia, ni wamuchitatu Kerene-hapuku.

¹⁵ Mu chifuchi cheswe kumwapwile niamwe mapwo apema ngwe ana ja Jo a mapwo. Tato yaaha chihinga hamwe ni mandumbu jo.

¹⁶ Kulutwe lia chino Jo watwamine ni mwono kulakaji ni makumi awana a miaka. Yamona ana jenyi, ni ajikulu jenyi ndo ku chisemuko chamuchiwana.

¹⁷ Mba Jo yafwa, mukulwana wa matangwa anji.