Jobe 41 - MUKANDA USANDU WA ZAMBI 1975

¹ Muhasa kulowa Leviatanu ni kazambu? Hanji kukashila limi lienyi ni muhipu?

² Muhasa kupalikisa muhipu mu muhombo wenyi hanji kutuwa mbangachi jenyi ni suna?

³ Te maliumba kuli yena? Mahanjika ni yena ni maliji a vumbi?

⁴ Makolesa usendo ni yena akapwe ngamba ye wa mutolo?

⁵ Muhasa kuheha nenyi ngwe kajila nyi hanji umuse ha muhipu ana je a mapwo amwendese?

⁶ Akwa kusepa mamukulisa? Mamupangila hakachi ka akwa yitanda?

⁷ Muhasa kutuwa kupu lienyi ni masuna nyi? Hanji mutwe wenyi ni makunga a yishi?

⁸ Sako moko je hali iye. Nyonga jita; kuchi kuchilinga nawa!

⁹ Kutalatala cha mutu kechi kuchimona. Manungukina hashi chipwe ha kumumona meso.

¹⁰ Niumwe uli ni hamu lia kumusunga. Mba iya yoze mahasa kumana kumeso jami?

¹¹ Iya hangwaha mba changutamba kumufweta nawa? Yuma yeswe mushi lia malilu mweswe niyami.

¹² Chichi kuhola ha kutwala ku molu jenyi, hanji tachi jenyi ja ngolo, hanji mujimba wenyi upema.

¹³ Iya mahasa kumuzula chikuto chenyi cha haze? Iya mahasa kutuwa armadura jenyi ja kukoneka?

¹⁴ Iya mahasa kwazulula mapito a kumeso jenyi? Kweswe kwakujingilika mazo jenyi mwongo wika.

¹⁵ Nyima yenyi yapwa ya mikana ya kepwe, ya kununga ngwe ni Chijikilo.

¹⁶ Umwe walinunga ni mukwo chocho chipwe fuji kuyichi kuhasa kupalika.

¹⁷ Japwa ja kusepekenya umwe kuli mukwo; jalikwata mba kujichi kutá kujihandununa.

¹⁸ Kuchehula chenyi kuchakuhenya ngwe pangu; meso jenyi kapwa ngwe yindayizo ya kuvumbuka cha tangwa.

¹⁹ Ku kanwa lienyi kwakutuhuka masoka a kahia; maleka a kahia kakutumbukilamo.

²⁰ Ku mazulu jenyi kakutuhwisa mwishi ngwe ku ndeho yinafuluka hanji mu mbungu ja kuwema.

²¹ Mwiku wenyi kuwakusambiza makala a kahia; mulengi wa kahia wakutuhukila mu kanwa lienyi.

²² Mu kota yenyi mwatwama tachi ni mwongo kuwakuliwakamina kumeso jenyi.

²³ Makonekeno a musunya wenyi kakulalaminya, a kuwumba hamuwika nenyi, kechi kalisunga.

²⁴ Mbunge yenyi yakala ngwe liwe; mbe ngwe liwe lia kutwa nalio.

²⁵ Muze malizundula chipwe akwa ndundo kakwivwa woma; kakulifwita mumu ha mwongo.

²⁶ Chipwe katana mamuheta, hindu katwile; chipwe kunga linene, chipwe mivu, chipwe kunga lihi.

²⁷ Kakumona utale ngwe mwambu; ni unengu ngwe mutondo wapola.

²⁸ Mwivu kuwahashile kumuhuma, ni mawe a kukonga kapwa ngwe yizungu.

²⁹ Mbuto kakuyimona ngwe yizungu; kunjatangila cha makunga kakuchiseha.

³⁰ Chihanda cha kushi chapwa ngwe ye yiyo ya ndeho. Kakulitanda ha misongolwela ngwe ha malowa.

³¹ Kakuvundula meya ngwe ndeho yinafuluka; kakupwisa kalunga-lwiji ngwe musenge wa yitumbo ya maji.

³² Kunyima yenyi jila ya kulejima yiliko; ngwe meya hanalumuka chiwe.

³³ Hashi heswe niumwe wakulita nenyi wakuhi, kashitu keshi woma.

³⁴ Yuma ya kunangama kakuyitala lume; kapwa ngwe mwanangana wa ana eswe a kulengumuka.