Jobe 40 - MUKANDA USANDU WA ZAMBI 1975

¹ Yehova yamba kuli Jo ngwenyi,

² Mukwa kuhamika mahasa kulitachika ni Mukwa-Ndundo-Jeswe? Mweswe malihangujola ni Zambi machikumbulula.

³ Mba Jo yakumbulula kuli Yehova ngwenyi,

⁴ Nguli wamokomoko. Chika mungukumbulula? Mungusa kwoko ku kanwa liami.

⁵ Hinahanjika kashi alioze chichi kukumbulula nawa; nahanjika kaali alioze chichi kuweza nawa.

⁶ Aho Zambi yakumbulula kuli Jo mu chijimbi ngwenyi,

⁷ Ulijichike muya we mu zalilo ngwe lunga. Ami mungukuhula mba yena makumbulula.

⁸ Chipwe yami unazange kunguhisa? Unguhise yami hanga ena usambe, nyi?

⁹ Kwoko lie chimuwika liapwa ni lia Zambi? Muhasa kukulunguza ngwe liji lienyi?

¹⁰ Zala ulamba ni ulemu; lijike ni uhenya ni kulejima.

¹¹ Zukula kulumbama cha utenu we; tala mweswe mukwa kulegnumuka umulelese.

¹² Tala mweswe mukwa kulengumuka umukehese; uliate yingulungulu he ha umanyino wo.

¹³ Shikila eswe mu fufuta hamuwika kashila meso jo mushi mu jondo.

¹⁴ Nyi mulinga chocho mba mungukutayiza ngwami, Kwoko lia yena mwene lia chindume mulihasa kukukumbisa.

¹⁵ Tala nguvu. Yami namutangile chinakutangile yena alioze aye kakulia mwambu ngwe ngombe.

¹⁶ Tachi jenyi jatwama mu mitanda; ngolo jenyi mu mijipa ya mu jimo.

¹⁷ Kakumanyisa muchila wenyi ngwe mutondo wa sedru; mijipa ya mashina ja molu jenyi yalihosa hamuwika.

¹⁸ Yifwaha yenyi yapwa ngwe mihembo ya unengu; molu jenyi kapwa ngwe mingwala ya utale.

¹⁹ Iye chitanga cha lutwe cha Zambi; yoze wamutangile amwehe katana kenyi.

²⁰ Mumu milundu yakumusokesela kulia kuze kwakuhehela ngonga eswe.

²¹ Mushi lia yiseso kakupomba, mu yiswamo ya mbungu, ni mu matenga.

²² Yiseso kuyakumufuka; misombo yakumujingilika.

²³ Chipwe mwe lwiji mazala keshi kwivwa woma; chipwe Yordau malamba ku kanwa lienyi hindu kapinjile.

²⁴ Mahasa kumulowa ni kazambu? Mahasa kusa muhombo wenyi mu lwiswi?