Jobe 4 - MUKANDA USANDU WA ZAMBI 1975

¹ Elifaze Ka-Temane yakumbulula ngwenyi,

² Nyi mungweseka kukwaha kamwe kaliji, kupiha muwivwa? Yoze mahasa kuhola iya?

³ Ena hiunafumbu anji, hiunatakamisa moko aze anahongo.

⁴ Maliji je hanahuzulula yoze wambile kulimbuka. Hiunajikijisa makungunwa a upekepeke.

⁵ Alioze haliapwila muze hichakuwana yena mba unalezumuka. Muze hichakukwata chinakushimi.

⁶ Ngwami unajikijila ha kuzeya che kuli Zambi, nyi? Unafuliela ungunu wa ndako je nyi?

⁷ Alioze haliapwila nyonga kanawa. Mutu muka hanonga keshi mulonga? Kulihi wachimwene matetaho akwa ululi?

⁸ Chize nakumona yami, akwa kulima uhenge ni kukuwa chipi kakucha yiyene.

⁹ Zambi kakwanongesa ni mwiku wenyi, kakwalalisa ni kangonga ka utenu wenyi.

¹⁰ Kuteta cha ndumba; liji lia ndumba musasu, mazo a mievu ja ndumba kanapalwoka.

¹¹ Ndumba wa tachi kanafu mumu kawanyine yifwo. Ana ja chiwo cha ndumba kanamwangana.

¹² Yangunehena limwe liji ngwe ku tenga, twitwi liami yililivwa hwe-hwe-hwe.

¹³ Mu manyonga a usolwelo wa ufuku muze tulo anji akwiza hali atu,

¹⁴ mwongo umwe wanguwanyine, nikuchikima chimwe cha kuwakamisa yifwaha yami yeswe.

¹⁵ Umwe mujimu yangupalika kwe kumeso, ni wonawona weswe wa ha mujimba wami wamanyine.

¹⁶ Yamana ne, hindu Chahashile kumona chize apwa. Che chuma chichili kumeso jami; kúlú, mba yingwivwa liji lia kwamba ngwo,

¹⁷ Mutu wa kufwa mahasa kusamba kumeso ja Zambi? Mutu mahasa kupwa mupema kumeso ja yoze wamutangile?

¹⁸ Chipwe tuvumbi twenyi kaafulielele, ni angelo jenyi kakwasuma ha kupiasuka;

¹⁹ mba waze atwama mu mazuwo ja uma ni fundamentu jo mu fufuta; kakwafwenya ngwe ndulu

²⁰ Hakachi ka chimene ni chingoloshi mafwa lume; manonga ndo ku miaka, niumwe machisa mbunge.

²¹ Nyi makasulula muhipu wa mbalaka yo muchima te kechi kufwa nyi? Chizechene ni uchelo wo.