Jobe 39 - MUKANDA USANDU WA ZAMBI 1975

¹ Yena unanyingika mwaka wa kusema cha pembe ja mu yambu? Kuwakutala kusema cha kai?

² Wakwalula tukweji two twa ufumba ni kunyingika tangwa lize masema,

³ muze mautama nikusema ana jo hanga misongo yo yikasule?

⁴ Ana jo makolakola, matatuka ha yana. Kakukatuka kuli yisemi jo kahilukile nawa.

⁵ Yoze watuswile chimbulu wa mu yambu iya? Iya wakasulwile chimbulu wa tambu

⁶ yoze namusele mahio mu puya akatwame mu yana ya mungwa?

⁷ Kakulelesa zungo lia chihunda; kevwile kukololoka cha mukwa kwendesa.

⁸ Kakwenda hakachi ka milundu kwe ku kelo jenyi; kakufupafupa cheswacho muchipwa cha wisu.

⁹ Mbau mazanga kukulingila? Malihumikiza ha ufuku ku chililo che?

¹⁰ Muhasa kumukashila ni mihipu ku mihanga? Makukaula akakuchipile yikulo?

¹¹ Mumufuliela mumu kali ni tachi? Munukunjika milimo ye?

¹² Unamufuliela te mahiluka nikukunehena mbuto ye ku chizungwilo?

¹³ Mapulwa ja avestruja kakwapupula nikulilengela, alioze te mapulwa ni mangona ja zango?

¹⁴ Iye kakuhichika monda jenyi hashi akavume ha mavu.

¹⁵ Kanavulama hanji kulu limwe muliashiha hanji kashitu umwe maaliata.

¹⁶ Kakulinga ni uswi kuli ana jenyi ngwe hi ninyenyi ko. Chipwe milimo yenyi muyitoka hindu keshi woma,

¹⁷ mumu Zambi hanamuvulamisa mana; kamuhele yinyingi.

¹⁸ Nyi mapwa ni mbunge ya kuchina, kakuseha kavwalu ni mukwa kumwendesa.

¹⁹ Yena wakuhana ndundo kuli kavwalu? Yena wakusa tachi ku kota yenyi?

²⁰ Yena wakumutumbwisa ngwe pasu? Kulihembula chenyi cha wanangana kole ni woma.

²¹ Kakulihalila mu chikulo nikulikumbukila ni tachi jenyi. Kakutuhuka akatakane ni yitwa ya jita.

²² Woma kakuuseha; kevwile mwongo. Keshi kuchina katana.

²³ Hali iye kuyakunjatangila chindalo, ni kunga lia kulejima ni kunga lia kukonga.

²⁴ Kakutambuka ni usasu ni utenu. Ha kwivwa chitavwi kahashile kuhwima.

²⁵ Ha kuhiohia chitavwi kakulinga—Hoi! Kakuhumbika jita chipwe kusuku ni kukulunguza cha tupitau ni kukalumioka.

²⁶ Chikoji kakutelela ku mana ja yena muze matela mapulwa jenyi kutalikisa ku Sule?

²⁷ Yena wakutumina pupa mba mazezuka ni kusa walo wenyi kwilu?

²⁸ Ha yimawe atwama ni kutunga zuwo lienyi; he helu lia mulundu wa yimawe.

²⁹ Kwenako akumwena kulia chenyi; meso jenyi kakumona kusuku chikolo.

³⁰ Ana jenyi kakulia manyinga; mba kweswako hashihila yifwo, kwenako atwama iye.