Jobe 38 - MUKANDA USANDU WA ZAMBI 1975

¹ Henaho Yehova yakumbulula kuli Jo ku chijimbi ngwenyi,

² Iya yono kakujimbisa mana ni maliji keshi yinyingi?

³ Jichika muya we mu zalilo ngwe uli lunga. Mungukuhula mba yena mukumbulula.

⁴ Muze nasele fundamentu ya hashi yena te kuli uli? Ngwambulwile nyi uli ni chinyingi.

⁵ Iya wayulile cheseko chaho? Kwanyingikine? Iya watachikileho muhipu?

⁶ Akoleselele fundamentu hahi? Iya wasele liwe liaho lia mbango,

⁷ muze matongonoshi a chimene embile hamuwika ni ana a Zambi eswe alikwijile ni chiseke?

⁸ Iya wayikile kalunga-lwiji ni yajilo muze wapukukile ku jimo?

⁹ Muze natengele malelwa uzalo wenyi ni milima yapwile mahina jenyi,

¹⁰ muze namusele manjiza ngwe mapito ni njalo,

¹¹ nambile ngwami, Ndo kuno muheta alioze kanda uhiana. Kuno kwene mikanya ye ya kulengumuka muyikasulila.

¹² Chize ku uputukilo wa matangwa je yena wakutumina chimene? Ena wakulweza kucha cha tangwa ola yacho,

¹³ hanga chikakwate ku mbango ja hashi nikusakumwinaho yingulungulu?

¹⁴ Cheswe chinalumuka ngwe uma muze hasaho Chijikilo; ngwe chikuto cha kulomba.

¹⁵ Keshi kuhana pangu lio kuli yingulungulu. O nyi mazundula kwoko lio malimakuna.

¹⁶ Ena hiwanjila mu mafuji ja kalungalwiji? Hiwenda mu majinga ja jondo?

¹⁷ Hakulweza yajilo ya kufwa? Hanji hiwamona mapito a milima pwi?

¹⁸ Hiwasa chinyingi kuzazuluka cha hashi? Nyi unanyingika yino yeswe, lumbununa!

¹⁹ Jila ya kuheta kuto ya pangu yilihiyo? Kwe ku maha milima kulihiko?

²⁰ Hanga ukayitwale ku chijima chayo, ukahengule majila a kuheta ku zuwo liayo.

²¹ Ena unanyingika se hiunasemuka kulu. Kwalula cha matangwa je chinene!

²² Ena hiwanjila kuze akutulikila neve? Hiwamona kuze akutulikila chiwe,

²³ chize hinatulikila mwaka wa lamba, ha matangwa a kulilamba ni jita?

²⁴ Jila ya kuya kuma kuze akupangila mwalwa jila yika? Kuze akumwanga fuji ya ku Chivumbuko hashi kulihiko?

²⁵ Iya wapulile kapila wa kupalika kangonga ka vula? Iya watemwine jila ya njaji

²⁶ yikanehe vula ha chifuchi chize kuchishi atu, ni ha puya kuze kukwatungile mutu;

²⁷ akatuchike ha kango haze kuheshi mwono e mavu akasokese mwambu?

²⁸ Vula tato ali nenyi? Yoze wasemene mume iya?

²⁹ Ku jimo liaya kwasemukine che chiwe? Yoze wasemene chiwe cha mwilu iya?

³⁰ Meya kakukala mbe ngwe liwe mba helu lia kalunga-lwiji kakwalumuka jelu.

³¹ Ena muhasa kukashila malenge ja Kungulwila? Muhasa kukasulula mihipu ya Muta-nikawa?

³² Muhasa kutemwisa matongonoshi a Nazarote ha tungonde two? Muhasa kusongwela matongonoshi a Ursa ni ana jo?

³³ Unanyingika shimbi ja malilu? Muhasa kukolesa chiyulo cho hano hashi?

³⁴ Muhasa kusanyika malelwa hanga sanga lia meya likufuke?

³⁵ Muhasa kutumina njaji hanga jende jikaté kuli yena ngwo, Yetu uno?

³⁶ Yoze walongesele mana ku malelwa iya? Yoze wahanyine yinyingi ku mbundu iya?

³⁷ Iya ku mana jenyi mahasa kwalula malelwa? Iya mahasa kupukumuna swaha ja mwilu,

³⁸ haze fufuta yakwalumuka malowa ni mashinde kakulalaminya hamuwika?

³⁹ Ndumba muhasa kumuhangila kulia chenyi? Hanji muhasa kukuchisa mievu ja ndumba

⁴⁰ muze mautama mu mena jo, hanji majikinyina mu yiswamo yo?

⁴¹ Iya wakufupila kulia chikwakwalo muze ana jenyi kakutetela kuli Zambi, nikwendangana ha kwivwa zala?