Jobe 37 - MUKANDA USANDU WA ZAMBI 1975

¹ Ha chikuma chino mbunge yami kuyakuchikima; kuyakutumbuka kuma kwayo.

² Ivwenu kukulunguza cha liji lienyi! Panjikenu kuhiohia chize chinatuhuka mu kanwa lienyi!

³ Kakuchechela kweswe kushi lia lilu; kakutuma njaji jenyi ku masongo a hashi.

⁴ Kulutwe liji lienyi liakuhiohia; kakukulunguza ni liji lia ulemu wenyi; keshi kukwika njaji muze mevwa liji lienyi.

⁵ Zambi kakukomwesa ni kukulunguza cha liji lienyi; kakulinga yuma yinene kutwahashile kuyinyingika.

⁶ Kakuhanjika ni neve ngwenyi, Yako uholoke hashi! Ku vula kakwamba ngwenyi, Pwako wa tachi!

⁷ Kakujika kwoko lia mutu mweswe hanga eswe anyingike milimo yenyi.

⁸ Henaho tushitu kakuya ku mena jo, kakusala ku yivwenge yo.

⁹ Chijimbi kakumuchiza kuma kwenyi; kakuneha chishika ni fuji ya kumwanga.

¹⁰ Ku mwiku wa Zambi kwakupwa chiwe, meya anene kakukala mbe.

¹¹ Kakusa meya anji mu malelwa alemu; malelwa kakumwanga njaji jenyi.

¹² Kakwasongwela akalijinge, akalinge cheswe maatumina hashi heswe hatwama atu.

¹³ Chipwe ha kulongesa, hanji ha kuwahisa mavu jenyi, hanji ha utu wa zango lume; iye kakuchilingisa.

¹⁴ Mwata Jo, panjika ku chuma chino mana uzewule yitanga ya Zambi ya kukomwesa.

¹⁵ Unanyingika chize Zambi kakwatumina akahenyese njaji ja mu malelwa jenyi, nyi?

¹⁶ Unanyingika chize akutesa malelwa? ni yitanga ya kukomwesa ya mukwa yinyingi yeswe?

¹⁷ Ena uli ni mazalo a chivukuminya mumu hashi hahola ni fuji ya ku Sule.

¹⁸ Ena te muhasa kuzazulula malilu ngwe iye halinga? Akakole ngwe katalilo wa kuzuzulula, nyi?

¹⁹ Tulongese chize mutwamba kuli iye; etu kutwahashile kululika chikuma chetu mumu ha milima.

²⁰ Akamulweze yami ngunazange kuhanjika? Te mutu kakulizangisa kuzemuka, nyi?

²¹ Haliapwila atu kahashile kutala pangu muze hiliatemuka mwilu, muze fuji hiyapalika nikupemesako.

²² Ku Norte kwakukatuka uhenya ngwe oru; Zambi kanazala ulamba umwe wa kuchi-kimisa.

²³ Mukwa-Ndundo-Jeswe kutwahashile kumuwana kapwa munene mu tachi ni ululi; ululi wenyi walumbama, kechi kuuhengesa.

²⁴ Kashika atu kakumuvwila woma; keshi kutala waze akulimona akwa mana anji.