Jobe 36 - MUKANDA USANDU WA ZAMBI 1975

¹ Elihu yanunga nawa ngwenyi,

² Lihumikize hakehe ni yami mba mungukulweza, mumu nguchili ni chimwe kuhanjikila Zambi.

³ Mungusaka mana jami kusuku, ni kutayiza ngwami, Tangi yami mukwa ululi;

⁴ mumu pundu, maliji jami hi a mahuza ko; umwe mukwa yinyingi yeswe kwali ni yena.

⁵ Zambi aye mukwa ndundo alioze kalelesele niumwe; iye mulemu ni tachi ni yinyingi.

⁶ Keshi kulindulula yingulungulu ni mwono; kakuhana kuli akwa lamba chize chinalite.

⁷ Kachijile meso jenyi kuli akwa ululi, alioze chimuwika ni mianangana ha ngunja jo kakwakolesa ndo ku miaka, no kakunangama.

⁸ Nyi makashiwa ni malenge hanji maalimba mu mihipu ya luyinda,

⁹ maalumbunwina yitanga yo ni Utanguko wo, ngwenyi, Nunalingi ni kulilengela.

¹⁰ Kakujikula matwi jo akalilongese; kakwatuma ahichike uhenge.

¹¹ Nyi mapanjika nikumulingila mba mamanuna matangwa jo nikuwaha, ni miaka yo ni yuma yipema.

¹² Nyi kapanjikile makuwa ni katana; mafwa ni chinyingi chakuhi.

¹³ Waze ali ni mbunge ja utanganyanyi kakufunga utenu; katetele aakwase muze maakasa.

¹⁴ Mafwa ni ukweze, ni mwono wo muusula ni sonyi.

¹⁵ Kakupulula akwa luyinda ni luyinda wo; ku lamba lio kakujikula matwi jo.

¹⁶ Ku huli lie nawa wakukokele ndo ku chihela chimwe chinene kuze kuhona chakuhi. Chize asele ha mesa ye cheswe cha maji wika.

¹⁷ Alioze yena hiwatambula liakulu lamba lize akuhana kuli yingulungulu. Upatwilo ni ululi hiwakukwata.

¹⁸ Kanyama kuchina ufwatulo ukakukoke ku kulenya. Kanda utayiza unene wa upite kukupiangula.

¹⁹ Upite we muukupulula ku yikola nyi; hanji tachi jeswe ja ndundo je?

²⁰ Kanda wivwa usona wa ufuku, muze mavungu kakwasutula kuma kwo.

²¹ Nyonga kanawa, kanda ukondolokela ku uhenge, mumu chenacho watongola hi luyinda ko.

²² Zambi kananangama ni ndundo jenyi; longeshi muka walita nenyi?

²³ Iya hamufunjikila jila yenyi? Hanji iya mamwamba ngwenyi, Hiwahengesa?

²⁴ Kanda uvulama kulemesa yitanga yenyi, yize atu kakwimbila.

²⁵ Atu eswe hayimona; e atu kakuyitala kusuku.

²⁶ Kuma, Zambi munene; kutwamunyingikine. Kutwahashile kunyingika kwalula cha miaka yenyi.

²⁷ Kakukoka masoto a meya kakwalumuna mbundu yikapwe vula

²⁸ yoze wakupukumukina kwilu, nikunoka hali atu wa kulumbama.

²⁹ Umwe mahasa kunyingika chize akuzazulula malelwa? Hanji kukulunguza cha mu mbalaka yenyi?

³⁰ Kakumwanga njaji jenyi kweswe kwa kujingilika. Kakufuka yikota ya kalunga-lwiji.

³¹ Mumu ni yino yuma kakuyula mavungu; kakuhana kulia cha kulumbama.

³² Kakufuka moko jenyi ni njaji, ni kuyituma yikalambe he ha washilo.

³³ Kukulunguza chayo chakulumbununa yoze wakupwa ni ufwatulo wa ukwa wa kulimika ni uhenge.