Jobe 35 - MUKANDA USANDU WA ZAMBI 1975

¹ Elihu yamba ngwenyi,

² Unamono ngwe chino chinalite? Unambe ngwe, Chino chinangute kumeso ja Zambi?

³ Kashika unahula ngwe, Chika ngunafumbuka? Nyi kachi chavulumwine kachi chipema chimwe ngunamono te?

⁴ Mungukukumbulula ni masepa je hamuwika.

⁵ Tala ku malilu, umone; tala malelwa, chize hasuha kukuhiana yena.

⁶ Nyi hiwavulumuna, yika muhasa kulinga kulimika nenyi? Nyi hiwokesa Utanguko we yika unamulingi?

⁷ Nyi uli mukwa ululi, yika unamwehe? Yika anatambula ku kwoko lie?

⁸ Ungulungulu we watwala kuli mutu ni mukwenu, ni ululi we unatwala kuli umwe mwana mutu.

⁹ Atu kakulitetwola mumu ha kwoka yihungumiona; kakusanyika chikwashi mumu ha kwoko lia mukwa tachi.

¹⁰ Alioze niumwe kakwamba ngwenyi, Zambi Tangi yami kulihi ali? Yoze wakutwaha miaso ha ufuku,

¹¹ yoze wakutulongesa kuhiana tushitu a mu yambu; kakutwaha mana kuhiana tujila a mwilu.

¹² Kwenako kakuteta alioze iye kakumbulwile, mumu ha kulengumuka cha atu api.

¹³ Zambi kechi kwivwa muteto wamokomoko wate; Mukwa-Ndundo-Jeswe kechi kuchisa mbunge.

¹⁴ Mba chahiana muze muwamba ngwe, Chamumwene, chikuma chili kumeso jenyi, ngunamutwaminyina.

¹⁵ Ni haliapwila mumu kalambile ni utenu, mumu kasungile Utanguko,

¹⁶ kashika Jo mapakula kanwa lienyi akahanjike maliji amokomoko; kanokesa maliji ni chinyingi chakuhi.