Jobe 34 - MUKANDA USANDU WA ZAMBI 1975

¹ Elihu yamba nawa ngwenyi,

² Panjikenu ku maliji jami enu akwa mana; ngwivwenu, enu akwa yinyingi.

³ Mumu twitwi kuliakupanjika maliji chizechene ngwe limi kuliakupanjika kulia.

⁴ Tutongolenu chize Chinalulama; tusenu chinyingi hakachi ketu chize Chinapeme.

⁵ Mumu Jo te hanambe ngwenyi, Chishi mulonga, Zambi hananguchiza kusamba chami.

⁶ Chipwe nasamba hindu hangumona mahuza; chilonda chami kuchishi yitumbo chipwe kuchishi mulonga.

⁷ Iya walifwa ni Jo? Kakunwa lenyo ngwe meya.

⁸ Kakuliendela ni akwa kulinga yipi; kakuya hamuwika ni yingulungulu.

⁹ Mumu hamba ngwenyi, Chipwe mutu mawahilila muli Zambi, hindu kuchichi kumufumbula nichimwe.

¹⁰ Kashika ngwivwenu, enu akwa yinyingi, chipwe kusuku ni Zambi akalinge ungulungulu, chipwe kusuku ni Mukwa-Ndundo-Jeswe akalinge chize chahenga.

¹¹ Makafweta kuli mutu nikulita ni milimo yenyi. Mutu makamona nikulita ni ndako jenyi.

¹² Pundu Zambi kechi kulinga ungulungulu; Mukwa-Ndundo-Jeswe kechi kupatula ni uhenge.

¹³ Iya wamuhele chiyulo cha muno-muze? Iya wamutwikile hashi heswe?

¹⁴ Nyi mahilwisa Spiritu yenyi kuli iye mwene, nyi matambula mwiku wenyi kuli iye nawa.

¹⁵ Atu eswe makakuwa hamuwika; mutu mahiluka cheka nawa ku fufuta.

¹⁶ Nyi nuli ni chinyingi ivwenu chino; panjikenu chino ngunambe.

¹⁷ Yoze kazangile ululi, te mayula? Munuhisa mukwa ululi yoze uli ni ndundo?

¹⁸ Iya mamba kuli mwanangana ngwenyi, Uli wamokomoko? Iya mamba kuli alemu ngwenyi, Nuli yingulungulu?

¹⁹ Iya keshi ni katonde kuli akwa kuyula? Iya kalemesene pichi kuhiana chiswale mumu eswe yitanga ya moko jenyi?

²⁰ Kashimbu kakepekepe kakufwa; ha muchima ufuku kakwanyikisa akafwe; chipwe akwa ndundo kakwachiza alioze hi ni kwoko lia atu ko.

²¹ Mumu meso jenyi kanamono ndako ja mutu; kakumona ngano jenyi jeswe.

²² Kukushi kulá hanji milima pwi kuze akwa kulinga yipi mahasa kuswama.

²³ Hanasela kuli mutu mweswe tangwa lize maya akamupatwile kumeso ja Zambi.

²⁴ Kakupalwola akwa ndundo ni kusopa ka. Kakusalakanyisa akwo mu yitwamo yo.

²⁵ Chocho, se kananyingika yitanga yo, kakwanunguna ha ufuku kakwafwenyona.

²⁶ Kakwalamba mumu ha ungulungulu wo kumeso ja atu,

²⁷ mumu ahambulukile ha kumukaula, majila jenyi kaasele mbunge.

²⁸ Chocho ahetesele muteto wa yiswale kuli iye. Iye wevwile muteto wa akwa lamba—

²⁹ Nyi mahola iya mamuhisa? Nyi mafuka meso jenyi iya mamumona? Chipwe vungu chipwe mutu, iya?—

³⁰ hanga chitanganyanyi kechi kuyula kuchina matalingisa e atu.

³¹ Te umwe hamba kuli Zambi ngwenyi, Hinalihumkiza ha kungufumba chichi kuvulumuna nawa;

³² ngulongese chize chamwene; nyi hinalinga uhenge chichi kuchilinga nawa?

³³ Te mafwetesa nikulita ni manyonga jenu mumu yena nunalitunucho? Yenu munutongola, hi yami ko. Kashika ambenu chize nunanyingika.

³⁴ Akwa yinyingi mamba kuli yami; mukwa mana yoze mangwivwa mamba ngwenyi,

³⁵ Jo kakuhanjika alioze keshi mana; maliji jenyi keshi chinyingi.

³⁶ Nyi kachi masopesa Jo ndo ku songo, mumu kakukumbulula ngwe yingulungulu.

³⁷ Mumu kakuweza uhulia ku mulonga wenyi; kakusakwila koshi hakachi ketu, nikwokesa maliji jenyi a kulimika ni Zambi.