Jobe 33 - MUKANDA USANDU WA ZAMBI 1975

¹ Alioze mukwetu Jo ivwa haliapwila kuhanjika chami; panjika ku maliji jami eswe.

² Ngunapakula kanwa liami; limi liami linahanjika.

³ Maliji jami kanahanjika ululi wa mbunge yami, ni yize mivumbo yami yinanyingika yinahanjika ni umwenemwene.

⁴ Spiritu wa Zambi wangutangile; mwiku wa Mukwa-Ndundo-Jeswe wakungwaha mwono.

⁵ Ngukumbulule nyi unahase; mana, ulumbunune maliji je kumeso jami.

⁶ Kumeso ja Zambi chimuwika ngunapu ni yena; ni yami nawa anguwumbile ku mwaha wa uma.

⁷ Kashika kuchi kuchikima ni woma wa yami; chichi kukushata naye.

⁸ Kuwahanjika mwe mu matwi jami; hinevwa chinumo cha maliji je.

⁹ Unambe ngwe, Kunapema; chishi mulonga; kunasamba; uhenge wakuhi muli yami.

¹⁰ Zambi kakuwana haze malimika ni yami; kakungutenga mukwa kole yenyi.

¹¹ Kakuyikila molu jami mu kuli; kakutala majila jami eswe.

¹² Ha chikuma chino unahengesa. Mungukukumbulula. Zambi aye munene kuhiana atu.

¹³ Kuchi te wakulitachika nenyi ngwe, Iye kechi kukumbulula nilimwe liji lia yami?

¹⁴ Mumu Zambi kakuhanjika jila yimwe; nyi mutu kevwile mahanjika jila yikwo.

¹⁵ Mu chilota, hanji mu usolwelo wa ufuku muze tulo anji heza hali atu no kanapombo tulo ha mihela yo.

¹⁶ Henaho kakujikula matwi ja atu nikwakolesa mwongo ha kwatoweza,

¹⁷ hanga akatembule mutu ku yitanga yenyi, nikupatula kulengumuka cha mutu.

¹⁸ Kakuchinda alma yenyi ku jondo; kakuchinda mwono wenyi kanda ufwa ku katana.

¹⁹ Chikwo nawa mutu kakumulongesa ni yikola ha muhela, ni kupinda mu yifwaha yenyi kuchishi kuhola.

²⁰ Chocho mbunge yenyi kuyakuvwila lwaji kulia. Chipwe tuyakulia tupema katuzangile.

²¹ Musunya wenyi kuwakuminyina chau, ni kumoneka ka; yifwaha yize te kuyamonekene haliapwila yapwa haze.

²² Alma yenyi kuyakukundama ku jondo; mwono wenyi kuwakukundama kuli akwa kukokela kufwa.

²³ Nyi kachi mukupwa hali iye umwe mukeji; hako umwe hakachi ka kanunu, yoze malweza mutu chize chalulama hali iye;

²⁴ mba mapwa ni vumbi kuli iye ngwenyi, Mupululenu, kanda aya ku jondo, hinawana kuka.

²⁵ Musunya wenyi upwe nawa musunya wa ukweze; akahiluke nawa ku tachi ja ukweze wenyi.

²⁶ Aho mutu malemba kuli Zambi mba mamutambula manjila kumeso jenyi ni uwahililo; mambulula kuli atu ulamwino wenyi.

²⁷ Memba kumeso ja atu ngwenyi, Navulumwine; nahengesele chize Chinalulama, alioze kangufweteselelecho.

²⁸ Hakuta alma yami kanda yiya ku jondo. Mwono wami ukamone pangu.

²⁹ Zambi kakulinga yino yuma yeswe kaali, katatu, kuli mutu,

³⁰ akahilwise alma yenyi ha kuya ku jondo, akamone pangu lia mwono.

³¹ Panjika kanawa, mwata Jo, ungwivwe. Hola mba munguhanjika.

³² Nyi chimwe chuma uli nacho kwamba, hingukumbulule. Hanjika, mumu ngunazange kukusambisa.

³³ Nyi ka, panjika kuli yami. Hola ngukulongese mana.