Jobe 32 - MUKANDA USANDU WA ZAMBI 1975

¹ Chocho wano malunga atatu yalitwamina kukumbulula Jo mumu kanaumono mukwa ululi.

² Mba Elihu mwana Mbarakele, Ka-Buze wa ku munyachi wa Rame yatenuka. Yatenuka ni Jo mumu yalisambisa mwene; kasambishile Zambi.

³ Yatenuka ni masepa ja Jo atatu, mumu hahisa Jo alioze kawanyine chize numukumbulula nacho.

⁴ Elihu te kahanjikile hatangu mumu akwo makulwana jenyi.

⁵ Kashika muze Elihu hanamono kumbululo liakuhi mu makanwa ja wano malunga atatu yatenuka.

⁶ Elihu mwana Mbarakele Ka-Buze yamba ngwenyi, Ku miaka yami ami nguli kanuke, enu nuli makulwana; kashika nevwile sonyi ni woma kulumbununa chikuma chami kuli yenu.

⁷ Yingwamba ngwami, Matangwa ahanjike; miaka yinji muyilongesa mana.

⁸ Alioze kumanyi, ye Spiritu ya mutu, mwiku wa Mukwa-Ndundo-Jeswe yakumwaha yinyingi.

⁹ Mana katwamine muli anene wika; kusa chinyingi chize chinalite hi cha makulwana wika ko.

¹⁰ Kashika ngwami, Ngwivwenu ngulumbunune chikuma chami.

¹¹ Natwaminyinyine maliji jenu; napanjikile yambo yenu ya mana shimbu nwafupile chize munwamba.

¹² Nanupanjikile, kumanyi niumwe waholesele Jo; niumwe hakachi kenu wakumbulwile maliji jenyi.

¹³ Kanyamenu kuchina munwamba ngwenu, Hitwawana mana; Zambi mamukumba, hi atu ko.

¹⁴ Katalikishile maliji jenyi kuli yami kashika ni yami chichi kumukumbulula ni maliji jenu.

¹⁵ Hahola, kakumbulwile nawa; keshi nilimwe liji.

¹⁶ Mba yami ngushimbule mumu o kahanjikile? Mumu kanamana lume, ni kuhanjika ka?

¹⁷ Chipwe yami mungukumbulula; mungulumbununa chikuma chami.

¹⁸ Mumu kunazala tò ni maliji; spiritu muchima kanangushinjika.

¹⁹ Mbunge yami yapwa ngwe vinyu yize kuyishi ni kuze muyituhukila; yapwa ngwe tuku jaha ja malambu jize jinambe kupulika.

²⁰ Changutamba kuhanjika hanga ngukahwime; changutamba kupakula mivumbo yami ngukumbulule.

²¹ Chichi kupwa ni katonde kuli niumwe; chichi kupepieka niumwe.

²² Chanyingikine kupepieka. Nyi munguchilinga Tangi yami nikawashi mangusulisa.