Jobe 31 - MUKANDA USANDU WA ZAMBI 1975

¹ Nakolesele shingo ni meso jami; mba kuchi munguhasa kusa meso jami hali mwana-pwo?

² Alioze Zambi mwilu yika mangwaha? Chihinga chami cha kuli Mukwa-Ndundo-Jeswe chika?

³ Kuji-ni-tomo kulichi kuholoka hali yingulungulu ni luyinda hali akwa kulinga uhenge?

⁴ Te kamwene majila jami? Kalwile mashimbo jami eswe?

⁵ Nyi hinenda ni mahuza, hanji molu jami hatambuka mu kwonga;

⁶ (angweseke ni mbalansa ya ululi Zambi anyingike ungunu wami!)

⁷ nyi lwano wami hapiasuka mu jila, mbunge yami yikakaule meso jami, hanji chipeka cheswacho hichalalaminya ku moko jami,

⁸ nyi chocho hingukuwe mbuto hanga ayilie kuli mukwo, ni yize muyingusokela, ayitukule.

⁹ Nyi mbunge yami hiyakaula umwe pwo, ngukajikinyine ku chikolo cha mwenyembo wami;

¹⁰ mba pwo liami akatwile mukwo, ni atu eka akafulamane hali iye.

¹¹ Mumu awo mulonga wupi kuhiana; uhenge umwe wa kufwetesa kuli sopi;

¹² muupwa kahia kakulalisa ndo ku Apandone, nikuwemena ndo ku chikota cha upite wami weswe.

¹³ Nyi hinalelesa chikuma cha ngamba yami apwe wa lunga apwe wa pwo, muze angusumine chimwe chuma;

¹⁴ kuchi mungulinga muze Zambi makatuka? Muze mangusopesa kuchi mungukumbulula?

¹⁵ Yoze wangutangile mu jimo kamutangile iye nawa? Ngwami umuwika watuwumbile mu jimo.

¹⁶ Nyi hinamina chiswale chimwe chuma azangile, hanji hinahongesa meso ja tuliwa,

¹⁷ hanji hinalia kakulia kami ukawami, mwana-shiwa kalile chihanda

¹⁸ (mumu chize ku ukweze namulelele ngwe tato chize ku jimo lia naye namusongwele);

¹⁹ nyi hinamona umwe kanafu mumu ha kuhona mazalo, hanji umwe chiswale keshi ni chuma cha kulifuka nacho,

²⁰ nyi molu jenyi kanguhalishile; kachi kavumine ni wona wa ku mapanga jami,

²¹ nyi hinazundula kwoko liami kulimika ni mwana-shiwa mumu ha kumona chikwashi ku chikolo,

²² chituwo chami chikaholoke ku chipaya chami, ni kwoko liami likamakuke ku konekeno lialio lume.

²³ Mumu nevwile woma wa lamba lia kuli Zambi, te chichi kuhasa kutala ku uhenya wa wanangana wenyi.

²⁴ Nyi hinafuliela oru, hanji najikijila ha oru yipema,

²⁵ nyi hinawahilila mumu upite wami woka, hanji mumu kwoko liami hiliazuka yuma yinji,

²⁶ nyi hinatala tangwa ha kupanguka, hanji kakweji kanende ni uhenya,

²⁷ mba mbunge yami yongoloka muchima, ngumbeje kwoko liami ni kanwa,

²⁸ acho nawa uhenge wa kufwetesa kuli sopi mumu nyi chocho kachi hinalikala Zambi mwilu.

²⁹ Nyi hinawahilila muze mukwa kole yami hanonga, hanji kulikwiza muze chipi chamuwana,

³⁰ (chatayijile kanwa liami kuvulumuna ha kumushinga akafwe);

³¹ nyi malunga a ku zuwo liami kambile ngwo, Iya kakuchile ni kulia chenyi?

³² (Ngeji katwamine haze; hinazulula mapito jami kuli yoze uli mu wenyi);

³³ nyi hinasweka Utanguko wami kuli atu, ha kuhengeka uhenge wami mu mbunge,

³⁴ mumu ha kwivwa woma wunji wa e atu; kachi kupopolola cha minyachi changukolesa woma kashika nahola, chatuhukile haze—

³⁵ Mala! nyi kachi nguli ni umwe yoze mangwivwa! (Jina liami alio! Mukwa-Ndundo-Jeswe angukumbulule!) Nyi kachi mukwa kole yami hasoneka chitela chami!

³⁶ Kachi nachimbata ha chipaya chami; nachikashila ha mutwe ngwe chipangula.

³⁷ Kachi mungulumbununa kuli iye mashimbo jami eswe. Mungukundama kuli iye ngwe umwe mukwa kuyula.

³⁸ Nyi minda yami hiyateta ya kulimika ni yami, hanji matumbo hatela hamuwika;

³⁹ nyi kachi hinalia mbuto yaho ni kufweta ka, hanji nashiha waze ayipichile,

⁴⁰ yikasoke mikalale, hi tiliku ko; yikasoke yiputa yamokomoko hi sevada ko. Maliji a Jo hasula.