Jobe 30 - MUKANDA USANDU WA ZAMBI 1975

¹ Alioze haliapwila kakuheha ni yami, twanuke twami—atato te chishi kuzanga kwasela hamwe ni tuwa akafunge yimuna jami.

² Te mungufumbuka chimwe ni tachi ja moko jo? Malunga amwe hahwa tachi?

³ Kakukeleta mavu omu a mu puya mumu hahona; zala yaakola.

⁴ Kakuhela maliva ni mafwo ja yiputa; kakwota miji ya kambungo.

⁵ Kakwahuma hakachi ka atu; nikwahanga ni milolo ngwe mwiji.

⁶ Akutwama mu mishitu ni mu yivwenge hakachi ka mavu ni mawe.

⁷ Kakulisaswola hakachi ka yiputa; mushi lia mingonga akupomba hamuwika.

⁸ Hanaawapula nikwahuma mu chifuchi, keshi mana, keshi lufuma.

⁹ Alioze haliapwila ami hinalumuka mwaso wo; hinapwa kashilikilo kuli ayo.

¹⁰ Kakunguvwila lwaji; kakulihandununa ni yami. Keshi woma wa kufwila mate muze mangumona.

¹¹ Se Zambi hanajitula muhipu wami ni kungukolesa sonyi, no nawa keshi ni woma kumeso jami.

¹² Ku chindume chami e atu amokomoko anakatuka ni kunguhuma. Kakungumanangana ni ndako jo ja kwenyeka.

¹³ Kakwonwona jila yami, kakuweza ku kuji-ni-tomo liami; niumwe kaakanjishile.

¹⁴ Mu chituwa chinene kaneza; kanangulundumukina ni Chizungozungo.

¹⁵ Kakungukolesa mwongo; kukuhanga ulemu wami ngwe fuji; kuwaha chami hichapalika ngwe lelwa.

¹⁶ Haliapwila mwono wami hiunamwangana muchima liami; matangwa a luyinda hanangukwata.

¹⁷ Ufuku kuwakuwonda yifwaha yami; yikola yize ya kungupeleta kuyalitwaminyine.

¹⁸ Kuyakukwata mazalo jami ni upupilo; kuyakungukwata ngwe muya wa chikuto chami.

¹⁹ Zambi hangumbila mu malowa; hinalumuka fufuta ni uto.

²⁰ Kunakuteta kuli yena alioze kwangukumbulwile; kunakumana alioze kwangutalile.

²¹ Hiwalumuka chiswi kuli yami; wakunguhungumiona ni tachi ja kwoko lie.

²² Kuwakungupindumuna ha fuji nikunguhehwilaho; kuwakungumbilambila mu chinumo cha kangonga.

²³ Pundu, ngunanyingika kumukanguneha ku kufwa; kwe kuze hasela akwa mwono eswe.

²⁴ Hindu, chipwe umwe mapwa mu mulumba wa mazuwo a kupuzula te kechi kuzoza kwoko lienyi? Mu luyinda wenyi kechi kusanyika amukwase?

²⁵ Te chalililile yoze wapwile ni tangwa likalu? Mbunge yami kuyevwilile chinyengo chiswale?

²⁶ Alioze muze nafupile chipema chipi chejile; muze natwaminyinyine pangu, milima yejile.

²⁷ Mbunge yami kuyinalifwichi; kuyisolo kuhwima. Matangwa a luyinda aneza kungupatwiza.

²⁸ Kunendangana wa pwi, alioze chalayile ni mwalwa; kunakumana mu chikungulwila nikusanyika angukwase.

²⁹ Kunapwa usoko wa mikuza; nguli sepa lia yikungulu.

³⁰ Kowa liami liakulá, mba mulitumuka; yifwaha yami yinasasaminya ni kahia.

³¹ Kalialia kami hikalumuka kulinyenga; lundembo wami hapwa liji lia akwa kulila.