Jobe 3 - MUKANDA USANDU WA ZAMBI 1975

¹ Mba Jo yapakula kanwa lienyi; yashinga tangwa lia kusemuka chenyi.

² Jo yamba ngwenyi,

³ Tangwa lia kusemuka chami likajimuke, ni ufuku uze ambile ngwo, Hinaka mwana-lunga.

⁴ Tangwa lize likapwe milima! Chipwe Zambi mwilu kanda alifupa, chipwe pangu kanda lipangukaho.

⁵ Kulá ni milima pwi yikalizuke. Malelwa akalizulamine; milima ya ha mwalwa yikalikolese mwongo.

⁶ Ufuku uze—milima pwi yikalikwate! kanda likawaha hakachi ka matangwa a mwaka, kanda alialula hakachi ka tukweji.

⁷ Ewa, ufuku uze ukaseke; kanda evwamo liji lia uwahililo.

⁸ Waze ananyingika kuvundala Leviatanu ni kushinga tangwa, alishinge.

⁹ Matongonoshi jalio a kucha, apwe a milima; likataletale pangu alioze nilimwe kanda likasoloka, chipwe yindayizo ya chimene kanda yikamoneka,

¹⁰ mumu kuliayikile jimo lia mama nikunguswekela lamba ku meso jami.

¹¹ Kuchi te chafwile he ha kusemuka? Kuchi te chatuhukile mu jimo hikusutuka lume?

¹² Kuchi te kwapwile makungunwa kungutambula? Kuchi te kwapwile mele ngukamwe?

¹³ Nyi chocho kachi napombele nikuhola, kachi nayile tulo nikuhwima

¹⁴ hamuwika ni mianangana ni tuliamanga a hashi waze aliselele yikulu.

¹⁵ Kachi napombele ni alemu akwa kupita oru; akwa kuzalisa mazuwo jo ni prata.

¹⁶ Kuchi te kanguswekele ngwe mwana wa kuselumuna? Ngwe ana aze kamwene pangu?

¹⁷ Kwenako yingulungulu kapinjishile; kwenako akwa yikatalo kakuhwijma.

¹⁸ Kwenako funge kanahwimi hamuwika; kevwile nawa liji lia kapatashi.

¹⁹ Ni anene ni akepe ko kwali; ni ndungo hatusuka kuli kakó.

²⁰ Mukwa huli kuchi te kakumwaha pangu? Waze anevu kusasa mu mbunge kuchi te kakwaaha mwono?

²¹ Kakuzanga kufwa alioze kuchejile; kakuchifupafupa ngwe upite wa kusweka.

²² Kakuwahilila ni chiseke chinji, ha kuheta ku fuka.

²³ Kuchi te kakuhana pangu kuli mutu muze jila yenyi yamuswamina? Yoze Zambi te hanamuseleka?

²⁴ Kulishimwoka chami kuchakutetekela kulia chami ni mikuma yami kuyakupukumuka ngwe meya

²⁵ Chuma chize nakuvwila woma chakunguwana ni chuma chize chakungukolesa mwongo chenacho chakungulundumukina.

²⁶ Chisolo kuhwima; chisolo kuhola. Chahashile kwoloka—hunya wika.