Jobe 29 - MUKANDA USANDU WA ZAMBI 1975

¹ Mba Jo yaputuka nawa chikuma chenyi ngwenyi,

² Mama yami! Kachi napwa chize napwile mu tukweji a kushi! Ha matangwa aze muze Zambi machingufunga.

³ Shimbu ndeya yenyi muyichipangukila ha mutwe wami. Te ni pangu lienyi nendele ndusu mu milima.

⁴ Chize napwile te ha matangwa a vumbi, muze usepa wa Zambi wapwile ha zuwo liami.

⁵ Shimbu te Mukwa-Ndundo-Jeswe achili hamwe ni yami, ni ana jami angujingilikile.

⁶ Shimbu te ngano jami jatwalile ku yamwa; ni liwe liangulusukilile mihwiji ya maji.

⁷ Muze te munguya ku chota cha chihunda; muze nasele chitwamo chami ha lwaza,

⁸ akweze ha kungumona akatukileko; makulwana akatukile ni kumana ha molu;

⁹ alemu alitwaminyine kuhanjika, nikusa moko jo ku makanwa.

¹⁰ Liji lia tuliamanga liaholele; malimi jo alamachile ku makanwa jo.

¹¹ Muze matwi jo anguvwile anguhalishile; muze meso jo amwene atayijile,

¹² mumu napulile yiswale waze atetele, ni ana-shiwa waze kapwile ni yikwashi.

¹³ Yoze wambile kunonga wanguchichimiekene; mbunge ya tuliwa yembile ni uwahililo ha mukunda wa yami.

¹⁴ Nazalile ululi; nalifukile nawo, upatwilo wami upema wapwile ngwe uzalo ni chipangula kuli yami.

¹⁵ Kuli kapuputa napwile meso; kuli yitonji napwile molu.

¹⁶ Kuli yiswale napwile tato; nasopesele chikuma cha yoze te chamunyingikine.

¹⁷ Namakwine mbwazo ja yingulungulu, ndo haholola yoze hakwata mu mazo jenyi.

¹⁸ Miaka yize nanyongene ngwami, Mungufwa mu chaswa chami; mungwokesa matangwa jami ngwe masekeseke.

¹⁹ Miji yami muyitanda ku meya, ni mume ha mitango yami ufuku weswe,

²⁰ ni uhenya wami matangwa eswe chizechene; ni uta wami mu kwoko, waha lume wa mutolo.

²¹ Malunga angupanjikile, nikutwama, nikuhola akevwe yiyulo yami.

²² Muze hinahanjika o kahanjikile nawa. Liji liami liaholokele hali ayo.

²³ Angutwaminyinyine ngwe kakutwaminyina vula; apakwile makanwa jo ngwe ha vula musazu.

²⁴ Nasehele mwe kuli ayo muze katakamine mu mbunge; sambukila ya ku meso jami kahashile kuyivundula.

²⁵ Naatongwelele jila; natwamine ngwe mukwa lutwe, natwamine ngwe mwanangana kakutwama hakachi ka tujita twenyi, ngwe umwe mukwa kulembejeka waze analili.