Jobe 28 - MUKANDA USANDU WA ZAMBI 1975

¹ Kuuli mungochi kuze akuchiza prata; Kukuli kuma kwa oru yize akupemesa.

² Kakuchiza utale mu mavu; kakuzuza unengu ku mawe.

³ Atu kakukumba milima, kakuhengula mawe a utale mu milima pwi ndo ku njiza ya kusula.

⁴ Kakufula mena mu chikulo kusuku ni mazuwo ja atu; kakwavulama kuli akwa kupalika; kusuku ni atu ngwe kanazezala hakachi ni hakachi.

⁵ Ku mavu kwakukatuka mbolo; hindu mushi kakuvunduka ni kahia.

⁶ Ku mawe jako kwatwama safwira, ni fufuta ya oru yiliko.

⁷ Jila yize kajila wa kushiha kulia chenyi kayinyingikine. Chipwe kambuya kayimwene.

⁸ Tushitu akwa kulengumuka kaliachileho, ni ndumba kayipalikilile.

⁹ Mutu kakusa kwoko lienyi ku mawe akalu; kakuchilumuna milundu ku miji yayo.

¹⁰ Kakupula tupila mu mawe; meso jenyi kakumona yuma yeswe ya ndando yikalu.

¹¹ Kakujika yitwetwe mba meya kechi kupalikamo; chuma cha kuhengama kakuchisolola.

¹² Alioze mana kulihi maawana? Kuma kwa yinyingi kulihiko?

¹³ Mutu kanyingikine jila ya kuhetako; kechi kaawana mu yifuchi ya akwa mwono.

¹⁴ Jondo ngwenyi, Muli yami keshimo; kalunga-lwiji ngwenyi, Ami chishi no.

¹⁵ Kechi kahasa kwalanda ni oru; kechi kahasa kupezala ndando yo ni prata.

¹⁶ Oru ya Ofiri kuyaafwikile; chipwe sardonica ja ndando yilemu hanji safwira.

¹⁷ Oru ni vidro kuyalitele no ni ndando; kechi kwasumbakenya ni yuma ya uhenya ya oru yipema.

¹⁸ Chipwe kutongola korale hanji kakanga; ndando ya mana yahiana rubi

¹⁹ Topajiu ya Etiopia nichimwe; kechi kuhasa kutesa ndando yo ni oru yipema.

²⁰ Mba mana kulihi anakatuka? Kuma kwa yinyingi kulihiko?

²¹ Kwaswama ku meso ja akwa mwono eswe; chipwe kuli tujila a mu tetela kasolokele.

²² Apandone ni Kufwa kakwamba ngwo, Matwi jetu hevwa lufuma wo teke-teke.

²³ Zambi kananyingika jila ya kuhetako; kuma kwo kunamulumbunuka.

²⁴ Aye kakutala ku masongo a hashi; kakumona yuma yeswe muno muze.

²⁵ Muze wasele pezu ya fuji; muze wesekele meya ni njongo;

²⁶ muze wasele shimbi ja vula, ni jila ya njaji ni kukulunguza,

²⁷ henaho wamwene, walumbunwine; wakolesele, wahengwile.

²⁸ Mba wambile kuli mutu ngwenyi, Tala, woma wa Yehova, e mana aze ene. Kukatuka ku yuma yipi, che chinyingi chenacho.