Jobe 27 - MUKANDA USANDU WA ZAMBI 1975

¹ Mba Jo yaputuka nawa chishima chenyi ngwenyi,

² Ni mwono wa Zambi yoze hachiza kusamba chami, Mukwa-Ndundo-Jeswe yoze hasashisa mbunge yami,

³ shimbu nguli ni mwiku wami ni Spiritu wa Zambi mapwa mu mazulu jami,

⁴ mivumbo yami kuyichi kuhanjika mahuza; limi liami kulichi kwamba yuma ya kwonga.

⁵ Chikapwe kusuku ni yami kunusambisa. Ndo kufwa chami chichi kwecha ungunu wami.

⁶ Mungulalaminya ululi wami, chichi kuwecha. Mbunge yami kuyanguhishile ha yitanga yami niyimwe.

⁷ Mukwa kole yami akapwe ngwe chingulungulu; yoze malimika ni yami akapwe ngwe chihenge.

⁸ Mumu kutalatala cha chitanganyanyi kuchi chapwa muze Zambi hanamusutula ni kumutambula mwono wenyi?

⁹ Te Zambi mevwa muteto wenyi muze lamba hiliamuwana?

¹⁰ Te kumawahilila muli Mukwa-Ndundo-Jeswe? Kumasanyika kuli Zambi matangwa eswe?

¹¹ Mungukulongesa ha kutwala ku kwoko lia Zambi. Chichi kusweka chize chatwama kuli Mukwa-Ndundo-Jeswe.

¹² Eswe hinwachimona yenwene. Alioze kuchi te hinwalumuka eswe hamuwika amokomoko?

¹³ Chihanda cha chingulungulu cha kuli Zambi chino; chihinga chize akwa kupinjisa makalambula kuli Mukwa-Ndundo-Jeswe.

¹⁴ Nyi ana jenyi moka mapwa a kufwa ni katana. Waze masema kechi kuyuka ni kulia.

¹⁵ Waze masala muze iye hafwa chilungo muchiafunjisa, ni chipwe tuliwa jo kechi kalila.

¹⁶ Chipwe malunjika prata ngwe fufuta; chipwe malumbika mazalo ngwe uma;

¹⁷ malumbika tuhu aliozeakwa ululimaazala, ni akwa kusamba malipangila ye prata.

¹⁸ Zuwo lize matunga mulipwa ngwe wanda-jili; ngwe chisakila chize kalayi matunga.

¹⁹ Maya kupomba pichi, alioze kechi kuchilinga nawa, mumu ha kulawisa meso jenyi upite wenyi hiwaya.

²⁰ Yuma ya mwongo yakumulundumukina ngwe sanga lia meya; ha ufuku chijimbi kakumumbata.

²¹ Fuji ya ku Chivumbuko yakumumbata—haya lume; yakumukomba kuma kwenyi;

²² Kakumulundumukina ni keke yakuhi; aye kakuchina tachi jenyi kapupushi.

²³ Kakumuyunga nikusakwila koshi nikumutwila mulolo.