Jobe 24 - MUKANDA USANDU WA ZAMBI 1975

¹ Kuchi te Mukwa-Ndundo-Jeswe kasele matangwa a upatwilo? Waze anamunyingika kuchi te keshi kumumona nikukwasa?

² Atu kakuchiza manjiza; kakupunda matanga nikwalisa.

³ Kakutambula chimbulu cha mwana-shiwa; ngombe ya tuliwa kakumuzuka chifungo.

⁴ Kakuhuma yiswale ku jilo yo; yiswale a muno-muze kakuswama.

⁵ Kakuya ku milimo yo ngwe yimbulu a mu puya. Kakuya mu kango nikufupa yuma ya kupupa akayihane kulia kuli ana jo.

⁶ Kakulikungila ya kulia mu minda; kakwandanda uva mu munda wa chingulungulu.

⁷ Kakupomba uselesele ufuku weswe, keshi mazalo. Ha chishika keshi ni chuma cha kulifuka nacho.

⁸ Kakuwula ni vula wa mu milundu; kakulalaminya ku yimawe mumu keshi ni chiswamo.

⁹ (Kwali atu kakuchanga mwana ku liele lia naye, yoze keshi ni tato; kakulambula mwana-kemba wa chiswale akapwe tombo).

¹⁰ Yiswale kakwendangana ni uselesele, keshi mazalo; kakumbata yichita ya mbuto alioze kali ni zala.

¹¹ Kakukama azeite hakachi ka mikala ya mitonda ya olevwe; kakuliata mu ukamino wa vinyu hindu ni pwila yo.

¹² Ku chihunda akwa chonono kakutwa mikuma, yoze hamulemeka kakutambika ni mbunge yenyi amukwase; hindu Zambi kapanjikile kulemba cho.

¹³ Kwali akwa kulitachika ni pangu waze kanyingikine ndako jalio, kendele mu majila jalio.

¹⁴ Chingalwe kakuhinduka ni milima, akashihe yiswale ni akwa kuhona. Ha ufuku kapwa ngwe mwiji.

¹⁵ Meso ja mukwa utanji kakutwaminyina kajimba-usoko mumu ngwenyi, Nilimwe liso mulingumona. Kakulihipula meso.

¹⁶ Ha ufuku kakulokola mazuwo; ha mwalwa kakuliajila, kanyingikine mwalwa.

¹⁷ Mumu kuli ayo eswe milima pwi kuyapwa ngwe kucha chimene; halikata ni yuma ya kukolesa mwongo mu milima pwi.

¹⁸ Ena wakwamba ngwe, Kakwahungumuna fuji ha meya; chihinga cho mu chifuchi kuchashingiwa; niumwe mukwa kukama uva matalikisa ku munda wo wa uva.

¹⁹ Shiole kuyakuchangumuna waze hanavulumuna chizechene ngwe changa ni chivukuminya kuyakumbata meya a ku neve.

²⁰ Kakwavulama ha lwaza wa chihunda; kewulukile nawa majina jo. Chocho ungulungulu kuwakupatuka ngwe mutondo.

²¹ Kakulia pwo mumba yoze keshi ana. Keshi kukwasa tuliwa.

²² Hindu Zambi ku tachi jenyi kakusuhisa mwono wa mukwa ndundo. O kakuhinduka chipwe muze akwo kananyongo ngwo, Kumafwa.

²³ Iye kakwakolesa, kakwajikijisa; meso jenyi hwali ha majila jo.

²⁴ Kakwanangamisa ha shimbu likepe mba himaya. Kakuma, kakulela, kakwachiza ngwe akwo eswe. Kakwahulula ngwe mitwe ya mbuto.

²⁵ Nyi hi chocho ko hisololenu mahuza jami, nukashindakenye ngwenu, Chize cheswe unambe, chamokomoko.