Jobe 23 - MUKANDA USANDU WA ZAMBI 1975

¹ Aho Jo yakumbulula ngwenyi,

² Chipwe musono kulinyenga chami chinasase, chipwe ni mikuma yami kwoko lienyi linaleme hali yami.

³ Mama yami! Nyi kachi nanyingika kuze munguhasa kumuwana! Kachi munguhasa kuheta kwe ku chitwamo chenyi.

⁴ Mungulumbununa chikuma chami kumeso jenyi; munguzalisa kanwa liami ni ungaji.

⁵ Mungumona chize mungukumbulula; chize mangwamba muchingulumbunuka.

⁶ Te malitachika ni yami ni unene wa ndundo jenyi? Ka! mangwivwa.

⁷ Kwenako mukwa ululi mahasa kulumbununa kuli iye; mba mangusambisa ndo ku miaka kuli mukwa kungusopesa.

⁸ Alioze nakuya kulutwe—keshiko. Nakuya kunyima—Chamumwene.

⁹ Ngunamufupu sali lia chimeso alioze meso jami kamuhetele; ngunayi sali lia chindume, alioze Chamumwene.

¹⁰ Hindu kananyingika jila yize ngunendela; mba muze hangweseka mungutuhuka ngwe oru.

¹¹ Kulu liami hiliakwata kanawa ku ngano jenyi; hinatunga jila yenyi, chapiasukile.

¹² Chahichikile shimbi ja mu kanwa lienyi; hinasweka mu mbunge yami maliji jenyi ngwe upite ulemu.

¹³ Alioze keshi kwalumuka, mba iya mahasa kumutembula? Cheswacho mazanga, kumakachilinga.

¹⁴ Chize hanangufunjikila kumakachimanuna; yuma yinji ali nayo mu mbunge.

¹⁵ Kashika mwongo ngunevu kumeso jenyi; ha kuchinyonga nakumuchikimina.

¹⁶ Zambi halezumwisa mbunge yami; Mukwa-Ndundo-Jeswe hangukolesa mwongo.

¹⁷ Mumu hanguseleka ni milima; milima pwi yinangufuku ku meso.