Jobe 22 - MUKANDA USANDU WA ZAMBI 1975

¹ Elifaze Ka-Temane yakumbulula ngwenyi,

² Mutu mahasa kufumbula Zambi chimwe chuma? Mukwa mana kakulifumbula mwene wate.

³ Nyi uli mukwa ululi muchiwahila Mukwa-Ndundo-Jeswe? Nyi majila je mapwa a kusamba iye mafumbuka nacho?

⁴ Kanakufumbu mumu unamuvwila woma te? Kashika kanasopo ni yena?

⁵ Te ungulungulu we kuwatohele? Uhenge we kechi kuhasa kuwalula.

⁶ Mumu hiunatambula yifungo kuli akwenu mokomoko. Akwa uvu hiunaatambula mazalo jo.

⁷ Kuwahanyine meya a kunwa kuli akwa yikatalo. Akwa zala hiunaamina kulia.

⁸ Mukwa tachi hanatambula chifuchi; mukwa kuyuka hanatungumo.

⁹ Hiunahumu twamishi a mapwo mokomoko; nikuwonda moko ja shiwa.

¹⁰ Kashika makambwila anakujingilika ni mwongo wa susumuku hiunakuhungumuna.

¹¹ Pangu lie hilialá; kwahashile kumona, ni muhwiji wa meya unakufuku.

¹² Zambi katwamine kuze ku malilu? Kwamwene matongonoshi aze asuku chikolo? Anazunduka Chichize!

¹³ Kashika wakwamba ngwe, Zambi yika ananyingika? Mahasa kusopa ndusu mu milima nyi?

¹⁴ Malelwa alemu kanamujingilika kashika kahashile kumona; kakwenda ha kuzazuluka cha mwilu.

¹⁵ Muwenda mu jila yikulu yize yingulungulu endelele?

¹⁶ Yaachangumuna shimbu mwaka wo kanda uchiheta; fundamentu yo yahungumukine mu muhwiji.

¹⁷ Ambile kuli Zambi ngwo, Katuka kuli yetu! Mukwa-Ndundo-Jeswe kuchi mahasa kwalinga?

¹⁸ Hindu aye wazalishile mazuwo jo ni yuma yipema; yiyulo ya yingulungulu yapwa kusuku ni yami.

¹⁹ Akwa ululi kakuchimona nikuwahilila; akwa kusamba kakwaseha nikwalelesa ngwo,

²⁰ Hanapatula akwa kole jetu; mba kahia kalesa chize chasalile.

²¹ Wana ni Zambi ukawane sambukila; chocho yipema muyiza kuli yena.

²² Tambula kufumba cha kanwa lienyi; sweka maliji jenyi mu mbunge ye.

²³ Nyi muhiluka kuli Mukwa-Ndundo-Jeswe makutungisa, nyi muchiza uhenge ku mazuwo je,

²⁴ nyi mumbila oru mu fufuta; oru ya Ofiri hakachi ka mawe mu mungulunga,

²⁵ nyi mutenga Mukwa-Ndundo-Jeswe oru ye ni prata ye yilemu,

²⁶ mba muwahilila muli Mukwa-Ndundo-Jeswe nikuhetula meso je kuli Zambi.

²⁷ Mulemba kuli iye mba makwivwa; kumukalinga yilakenyo ye ya shingo.

²⁸ Mupala chimwe chuma mba makukoleselacho, ni pangu mulikapanguka mu majila je.

²⁹ Muze makukehesa muwamba ngwe, Hindukako! Kakulamwina akwa kuhombola meso.

³⁰ Kakupulula akwa kusamba; kumakakupulula mumu ha kupema cha moko je.