Jobe 21 - MUKANDA USANDU WA ZAMBI 1975

¹ Mba Jo yakumbulula ngwenyi,

² Panjikenu kanawa ku maliji jami chikasalakane kulembejeka chenu.

³ Lihumikizenu ni yami ndo munguhanjika; mba muze hinahanjika hiyungenu.

⁴ Nyi yami, kusopa chami kuchapwile ni atu. Te chichi kwivwa pupumuku mu mbunge nyi?

⁵ Ngutalenu nukalishimwoke, nukase kwoko ku kanwa.

⁶ Ha kuchinyonga changukolesa mwongo; kunakuchikima mu mujimba weswe.

⁷ Kuchi te yingulungulu kakutwama ni mwono? Kuchi te kakuheta ku ushinakaji nikwokesa tachi?

⁸ Ana jo kakukola kwe kumeso jo; kakumona ajikulu jo.

⁹ Mazuwo jo kahwima, woma wakuhi; mbwechi ya Zambi kuyishiko kuli ayo.

¹⁰ Kuji jo a ngombe keshi kuhona kusema; ngombe jo a yihwo kakupwa ni ana, kuselumuna ka.

¹¹ Kakutuhwisa twanuke two ngwe chendo; ana jo kakuhangana.

¹² Kakwimba kamukupiela ni kalialia; kakulikwiza ni mwaso wa lundembo.

¹³ Kakupalikisa matangwa jo ni kutumbuka, kakuya ku Shiole ni sambukila.

¹⁴ Kakwamba kuli Zambi ngwo, Ngukatuke! Kutwazangile kunyingika majila je.

¹⁵ Mukwa-Ndundo-Jeswe kuchi apwa tumulingile? Nyi mutulemba kuli iye kutumbuka chika chiliko?

¹⁶ Ene kakuyula kuwaha cho; chiyulo cha yingulungulu chikapwe kusuku ni yami.

¹⁷ Ndeya ya chingulungulu kakuyijima kanji kanji? Kuji-ni-tomo kuliakwawana? Te Zambi kakwapangila yikola mu utenu wenyi?

¹⁸ O kakupwa ngwe mwambu mu fuji? Kakupwa ngwe yizungu yize yakuhehuka ni kangonga?

¹⁹ Enu nunambe ngwenu, Zambi kakutulikila uhenge hali ana jo a malunga, alioze akaafwetese ene hanga achinyingike.

²⁰ Meso jo ene akamone kwonwona cho; ene akanwe ufwatulo wa Mukwa-Ndundo-Jeswe.

²¹ Te kakunyonga ha munyachi wo kulutwe muze o hafwa?

²² Umwe malongesa Zambi mana se iye kakupatwila akwa mwilu?

²³ Umwe kakufwa ni kuzala tò ni kufumbuka; kanahwimi liakulu; nichimwe chamuhona,

²⁴ mujimba wenyi wa maji wika usongosongo wa yifwaha yenyi unovula.

²⁵ Mukwo kakufwa ni usasu mu mbunge, kamwene chipema nilimwe tangwa.

²⁶ Eswe ni aali kakupomba mu fufuta, ni kufukiwa ni mavuno.

²⁷ Ngunanyingika manyonga jenu, ni kutaka chenu kunguvulumuna.

²⁸ Nwakwamba ngwenu, Zuwo lia mukwa kuyula lilihilio? Mbalaka ya chingulungulu yilihiyo?

²⁹ Kunwahulile akwa kupalika mu jila? Kunwatambwile Shindakenyo yo?

³⁰ Ngwo, Ha tangwa lia kuji-ni tomo chingulungulu kalimwene. Ha tangwa lia ufwatulo kakumupulula.

³¹ Iya kakumwamba ndako jenyi meso ni meso? Iya kakumufwetesa yitanga yenyi?

³² Ha kumutwala ku fuka, masako kalayi.

³³ Mashinde a ku chikulo apema kuli iye; malunga eswe kakumukaula, ni waze akumutetekela anji chikolo.

³⁴ Kuchi munuhasa kungulembejeka ni maliji amokomoko? Nichimwe chasala cha makumbululo jenu shina mahuza wika.