Jobe 20 - MUKANDA USANDU WA ZAMBI 1975

¹ Mba Zofare Ka-Nama yakumbulula ngwenyi,

² Kashika manyonga jami kakungukumbulula, mumu ha kulipupwisa muchima.

³ Ngunevu ngwe unangwambe mba changusaula. Kashika umwe Spiritu kanangukumbulula ku chinyingi chami.

⁴ Te chize kushi, chize ku tangwa lize asele mutu hashi kwanyingikine chuma chino ngwo,

⁵ Mazazo ja yingulungulu kakuhiha; kuwahilila cha yitanganyanyi chapwa cha kashimbu kakehe wika?

⁶ Chipwe malinangamisa ndo kwilu, ni mutwe wenyi muuheta ku malelwa,

⁷ hindu kumakakuwa lume ngwe tuji twenyi ni waze amumwene mamba ngwo, Kuli ali?

⁸ Kumakahumuka ngwe chilota; kechi kamuwana. Kumakamuhuma ngwe usolwelo wa ufuku.

⁹ Liso lize Kamumwene kulichi kumumona nawa; akwa chihela chenyi kechi kumumona nawa.

¹⁰ Ana jenyi mawunjila vumbi kuli yiswale; moko jenyi mahilwisa upite uze atambwile.

¹¹ Yifwaha yenyi yatakama ni tachi ja ukweze, hindu cheswe muchipomba nenyi mu fufuta.

¹² Chipwe ungulungulu wayema mu kanwa lienyi, chipwe mausweka mushi lia limi lienyi,

¹³ chipwe kazangile kuwecha, kakuulalaminya mu kanwa lienyi,

¹⁴ hindu kulia chenyi muchikonda mu lufu wenyi; muchalumuka utende wa chihili mu jimo lienyi.

¹⁵ Kakumina upite nikuusaza nawa; Zambi kakuuchiza muchima lienyi.

¹⁶ Kumakashisa utende wa yihili; limi lia yenge mulikamushiha.

¹⁷ Kechi kamona njiji; ni yitwetwe chipwe mihwiji ya wuchi ni maji a yamwa.

¹⁸ Kumakahilwisa fweto ya kuhondangana chenyi; kechi kuhasa kuyilia. Kechi kuwaha ni kutumbuka cha kusepa chenyi.

¹⁹ Mumu hafwenya yiswale ni kwaehuka. Hatambula zuwo lize kalitungile.

²⁰ Mumu kuzo yenyi kuyahwimine, kashika kechi kalamwina yuma yize yamuwahila.

²¹ Ha kulia kahichikile nichimwe; kashika kufumbuka chenyi kuchichi kulinduluka.

²² Shimbu yikumba yenyi muyilumbama, iye mayindama; tachi jeswe ja luyinda mujimulundumukina.

²³ Zambi makamutuma utenu wenyi usasu; makamunokesawo ngwe kulia chenyi hanga akazalise jimo lienyi nawo.

²⁴ Kumakachina chitwa cha utale; alioze chitwa cha unengu muchimutwa ndusu.

²⁵ Machitomona mu mujimba wenyi; songo liacho lia kulejima mulikatuhuka mu kasashisa kenyi. Mwongo muumukwata.

²⁶ Hanamutulikila milima ha upite wenyi; kahia kaze kakasambijile mukamulalisa; chize chasala mu zuwo lienyi muchikakuwa.

²⁷ Malilu masolola uhenge wenyi; hashi muhamukatukila kulimika nenyi.

²⁸ Upite wa mu zuwo lienyi makaumbata wa kupupa ha tangwa lia ufwatulo wa Zambi.

²⁹ Chihanda cha chingulungulu cha kuli Zambi, chenacho; chihinga chize hamusela kuli Zambi.