Jobe 2 - MUKANDA USANDU WA ZAMBI 1975

¹ Kwapwile nawa tangwa likwo ana a Zambi yeza asoloke kumeso ja Yehova ni Satana yeza nawa hakachi ko akasoloke kumeso ja Yehova.

² Yehova yamba kuli Satana ngwenyi, Kuli unakatuka? Satana yakumbulula kuli Yehova ngwenyi, Ha kwendangana hashi, ni kujingajingaho.

³ Yehova yamba kuli Satana ngwenyi, Hiwazewula kavumbi kami Jo? Kuheshi niumwe hashi wa kulifwa nenyi; mumu iye keshi kapalia; mukwa ululi; mukwa kuvwila woma Zambi; keshi kutala ku chuma chipi. Hindu kanakakaminya ungunu wenyi chipwe wangusongojola kunwenyeka chikuma chakuhi.

⁴ Satana yakumbulula Yehova ngwenyi, E, chikowa ha chikowa. Mutu mecha yeswe ali nayo ha kulamwina mwono wenyi.

⁵ Alioze zoza kwoko lie usunge ku chifwaha chenyi ni musunya wenyi mba makutuka kumeso je.

⁶ Yehova yamba kuli Satana ngwenyi, Mu kwoko lie ngunamukunjika ahoze mwono wenyi ka.

⁷ Chocho Satana yakatuka kumeso ja Yehova; yalamba Jo ni mahute api, chize ku yiliato ndo ku mbanda-mutwe.

⁸ Aye yanda chiyo cha ndeho ya kulicheka nacho. Yatwama mu uto.

⁹ Mba pwo Henyi yamba kuli iye ngwenyi, Hindu unakakaminya ku ungunu we? Tuka Zambi ukafwe.

¹⁰ Alioze Jo yamba kuli iye ngwenyi, Unahanjika ngwe umwe hakachi ka yihepuke ja mapwo mahanjika. Te mututambula yipema ku kwoko lia Zambi, mba yipi kanda tuyitambula nyi? Mu yino yeswe Jo kavulumwine ni kanwa lienyi.

¹¹ Achi muze masepa a Jo atatu evwile yipi yino yeswe yamuwana yakatuka mutu mweswe ku chifuchi chenyi; Elifaze Ka-Temane, ni Bilidade Ka-Shuha, ni Zofare Ka-Nama. Yalilakenya akeze hamuwika akalishimwoke nenyi ni kumulembejeka.

¹² Shimbu achili kusuku yatala, kuma kamunyingikine, mba yalila mbimbi; eswe yasonya mazalo jo nikukuwa fufuta ha mitwe yo kwilu.

¹³ Atwamine hamuwika nenyi hashi matangwa shimbiali ni ufuku shimbiali, ahoze niumwe wamuhele chipwe liji limuwika mumu amwene chinyengo chenyi chinene.