Jobe 19 - MUKANDA USANDU WA ZAMBI 1975

¹ Jo yakumbulula ngwenyi,

² Ndo mwiji muka munungupinjisa, ni kungupalwola ni maliji?

³ Kumi Ha yisuho yino hinwanguchoka. Kunwevwile sonyi ja kunguvulumuna chocho?

⁴ Nyi kachi hinapianguka, hindu kupianguka chami chili kuli yami.

⁵ Nyi nunalifuzu ni kulimika ni yami, ni kunguhisa mumu ha kuyindama chami,

⁶ hinyingikenu Zambi hanangununguna nikungulimba mu wanda wenyi.

⁷ Kunakutambika ngwami, Kanahgushihi! Alioze kangukumbulwile, niumwe. Ngunatambika ni kukalumuka alioze mukwa kungupatwila wakuhi.

⁸ Hanashichi jila yami, kashika chahashile kupalika. Hanase milima ha majila jami

⁹ Hananguzula uhenya wami weswe; hanachiza chipangula ha mutwe wami.

¹⁰ Hanangupuzula sali ni sali; hinahwa. Kutalatala chami hanachitukula ngwe mutondo.

¹¹ Hanakasumuna ufwatulo wenyi kulimika ni yami; kakungumona nguli mukwa kole yenyi.

¹² Tujita twenyi kananguswila hamuwika; hanangujingilika ni pembo; kanaseleka zuwo liami ni yilombo yo.

¹³ Usoko wami hanaatwala kusuku ni yami; masepa jami hanalumuka yilambala kuli yami.

¹⁴ Akwa chisemuko chami ni tusendo hanangwehuka;

¹⁵ waze nazumbwile mu zuwo liami hananguvulama; ngamba jami a mapwo kanangumono ngwe ngeji, hinalumuka kandaka kuli ayo.

¹⁶ Mungusanyika ngamba yami kangupanjikile; ndo mungumulembelela ni kanwa liami.

¹⁷ Hinapwa chuma cha lwaji kuli pwo liami; kunapwa wa luchisa kuli ana ja mama yoze wangusemene.

¹⁸ Chipwe twanuke kakungulelesa; ha kukatuka kakunguhangulula.

¹⁹ Masepa jami a ha muchima kakunguvwila lwaji; waze nazangile hanalumuka kulimika ni yami.

²⁰ Yifwaha yami hiyinalikwata ni kowa liami ni musunya wami; hinomboka ni kowa lia mazo jami!

²¹ Nguvwilenu keke, enu masepa jami, ngu-vwilenu keke, mumu kwoko lia Zambi hilinangukwata.

²² Kuchi te nwakunguhanga ngwe Zambi; kuchi te kunwayukile se hinwangulamikiza?

²³ Kachi, mama yami! Kachi masoneka maliji jami. Kachi hasa maliji jami mu mukanda.

²⁴ Nyi kachi maola ni shizo ni shumbu ha liwe ndo ku miaka yeswe.

²⁵ Mumu ngunanyingika Mukwa-Kungukula katwama ni mwono. Mwe kasula-songo iye kumakamana ha mavu.

²⁶ Mba chipwe kowa lino lia yami hiliahwa, hindu mu musunya wami mungukamona Zambi.

²⁷ Mungulimwenaye ni yami, meso jami mwene mamumona hi ngwe ngeji ko. Mbunge yami yinalezumuka muchima liami!

²⁸ Nyi munwamba ngwenu, Kuchi mutumuhungumiona? Se nguli ni chikota cha che chuma muli yami,

²⁹ ivwenu woma wa katana, mumu ufwatulo kuwakulikokela kastigu wa katana, hanga nukanyingike ngwenu, Upatwilo kuuli.