Jobe 18 - MUKANDA USANDU WA ZAMBI 1975

¹ Mba Bilidade Ka-Shuha yakumbulula ngwenyi,

² Shimbu lika mufupafupa maliji? Zewula, mba yetu mutuhanjika.

³ Kuchi te twapwa ngwe tushitu kuli yena? Kuchi te unatumono ngwe kutushi mana?

⁴ Ena wakulipulapula mu utenu we, te atu eswe makatuka hashi mumu hali yena? Hanji liwe mulikatuka homa halio mumu hali yena?

⁵ Pangu lia chingulungulu kakulijima; mulengi wa kahia kenyi kuuchi katemuka.

⁶ Pangu lia mu zuwo lienyi liapwa milima; kakujima ndeya helu lienyi.

⁷ Mashimbo jenyi a tachi kakwahihisa; kutaka chenyi mwene kuchakumulimbwisa.

⁸ Mumu molu jenyi mwene kakumulimbwisa mu wanda; kakwenda he ha wumbu.

⁹ Muheto wakumukwata ha kashijino; kakufwa mu kambwila.

¹⁰ Muhipu unamuswamina hashi; kambwila linamujikinyina mu jila.

¹¹ Mwongo wakumuchikimisa sali ni sali; nikumuzomba he ha tushijino twenyi.

¹² Tachi jenyi jahonga ni zala; kuji-ni-tomo linamujikinyina.

¹³ Kowa lienyi linaliwa ni musongo; musongo wa kufwa kuwakulia molu jenyi.

¹⁴ Kakumumbulumuna ku zuwo lize afulielele; kakumukoka kuli mwanangana wa mwongo weswe.

¹⁵ Mu zuwo lienyi mwatwama chuma hi nichenyi ko; fundanga majimwanga ha zuwo lienyi.

¹⁶ Miji yenyi yinomu kushi; mitango yenyi yinomu kwilu.

¹⁷ Kakumuvulama hashi; keshi jina nawa mu matapalo.

¹⁸ Kakumuchlza mu pangu ni kumunungwina mu milima; kakumuhuma hashi.

¹⁹ Keshi kupwa ni mwana hanji mujikulu hakachi ka atu jenyi; niumwe mamuswana kuze atwamine.

²⁰ Chize chakumukwata muchishima akwa Chitokelo; chakukokela mwongo akwa Chivumbuko.

²¹ Chocho chakupwa kuli akwa utanganyanyi; chocho chakupwa chihela cha yoze kanyingikine Zambi.