Jobe 16 - MUKANDA USANDU WA ZAMBI 1975

¹ Aho Jo yakumbulula ngwenyi,

² Yuma yino hinayivwa kanji; eswe ngwe nuli akwa kulembejeka, kuma nuli akwa kupinjisa.

³ Maliji a fuji yamokomoko kumahwa nyi? Chize chanukoka kukumbulula, chuma chika?

⁴ Nyi yami napwa ngwe yenu, munguhasa kuhanjika chocho nawa. Yami nawa munguhasa kununganunga maliji a kulimika ni yenu, nikunyikwona mutwe wami hali yenu nawa.

⁵ Ami munguhasa kunutakamisa ni kanwa liami; kulembejeka cha mivumbo yami muchiholesa yikola yenu.

⁶ Alioze nyi ngunahanjika yikola yami kuyahwile. Nyi munguhola chipwe chihanda chayo muchingukatuka?

⁷ Pundu Zambi hanguhongesa; hakuwisa atu jami eswe.

⁸ Hanguwangamisa mba chapwa uchela wa kulimika ni yami. Kuwangama chami hichangukatukila; chinangushindakenya kumeso jami.

⁹ Mu ufwatulo wenyi hanangupapulula; kananguvwila kole. Hanangukopwela mazo jenyi. Mukwa kulimika ni yami kanasongolola meso jenyi hali yami.

¹⁰ Atu hanangupakwila makanwa jo; ni shino hanangulambe ha tafu; kanalikungulula hamuwika kulimika ni yami.

¹¹ Zambi kanangukunjika kuli yitanganyanyi; kanangumbilila mu moko ja yingulungulu.

¹² Natwamine nikuhwima alioze wangumakwine makumaku. Yangukwata ku kota nikungupalwola. Yangumika ngwe washilo wenyi.

¹³ Ngashi jenyi kananguseleka. Kanangupatula ndo ku njiso; kanguvwilile keke. Kasashisa kami kanamwangana hashi.

¹⁴ Kanangulokola ni mbandu jinji; kanangulundumukina ngwe kajita.

¹⁵ Hinalitongela chikeleyi ha kowa liami; hinasa tachi jami mu fufuta.

¹⁶ Ku meso jami kunachili ni kulila; yindayizo yami yinalá pwi.

¹⁷ Chipwe chocho upupilo wakuhi ku moko jami; kulemba chami Chinapeme.

¹⁸ Ena mavu, kanda ufuka manyinga jami; muteto wami kanda uhola.

¹⁹ Chipwe haliapwila chela chamin mwilu ali; hako nguli nenyi mwilu.

²⁰ Masepa jami kanangusaula; alioze meso jami kanalili masoji kuli Zambi,

²¹ hanga akahakwile mutu kumeso ja Zambi ngwe mutu kakuhakwila mwenyembo wenyi.

²² Mumu kulutwe lia miaka yimwe yikepe munguya jila yize chichi kahiluka.