Jobe 15 - MUKANDA USANDU WA ZAMBI 1975

¹ Mba Elifaze Ka-Temane yakumbulula ngwenyi,

² Mukwa mana kakukumbulula ni mana a kuhehuka? Malizalisa ni fuji ya ku Chivumbuko?

³ Masopa ni yihanjika yamokomoko? Hanji ni maliji aze kechi kufumbula nichimwe?

⁴ Ena unalelesa woma wa Zambi; unakwika kupukuna cheswe kumeso ja Zambi

⁵ Kanwa lie linatambula tachi ku uhenge we; hiwatongola limi lia yikanyame.

⁶ Kanwa lia yena mwene linakuhisa hi yami ko. Mivumbo ye yapwa yela ja kulimika ni yena.

⁷ Ena uli mwe mutangu kusemuka? Akusemene, kuma milundu kanda yiyisoloka?

⁸ Hiwatwama mu punga ya Zambi? Unamono mana akuhi ndo a yena mwene?

⁹ Chize unanyingika yena yetu kutwachinyingikine chika? Ena hiwasa chinyingi chimwe chuma kuchatulumbunukine nyi?

¹⁰ Ni akwa kambu jitoma ni tushinakaji tuli no hamwe ni yetu; makulwana ja tatenu.

¹¹ Keke ya Zambi yakukehela naye? Hanji liji lia vumbi analingi nalio ni yena?

¹² Kuchi te mbunge ye yinakuzangumuna chocho? Ni meso je unaatutumuna ngwe kahia?

¹³ Kuchi te unatelumwona mbunge ye kulimika ni Zambi? Kuchi unatayiza maliji apwahaha kutuhuka mu kanwa lie?

¹⁴ Mutu kuchi apwa mahasa kupema? Mukwa kusemuka kuli pwo kuchi apwa akasambe?

¹⁵ Chipwe asandu jenyi kaafulielele, ni malilu kapemene kumeso jenyi,

¹⁶ mba umwe mukwa kufutama, wakukokela lwaji! Umwe wakunwa uhenge ngwe meya!

¹⁷ Panjika, mungukulweza. Chize hinamona mungukwambulwila;

¹⁸ (chize akwa mana halongesa; ni atato kachiswekele,

¹⁹ waze aahele che chifuchi ukawo ni yilambala kapalikile hakachi ko).

²⁰ Ngwo, Chingulungulu kakupinda ni yikola matangwa jenyi eswe; ndusu miaka yize hasela yiswi.

²¹ Nakwivwa mu matwi jenyi yuma ya mwongo; chipwe mayuka hindu chonwonyi mamuwana.

²² Keshi kuchifuliela ngwenyi, Mungukatuka nawa ku milima, mumu ku katana hamusela.

²³ Kakwendangana nikufupafupa kulia ngwenyi, Chilihicho? Kananyingika tangwa lia milima hakamwihi lili.

²⁴ Kulifwita ni kupinda chinamuchikimisa; chinamukumbu ngwe mwanangana wa jita.

²⁵ Mumu hazoza moko jenyi kulimika ni Zambi; kakuhamwisa Mukwa-Ndundo-Jeswe,

²⁶ kulipupapupa nenyi ni pami ni lukepwe wa kukolesa;

²⁷ mumu hafuka meso jenyi ni maji; hatoha ni maji mu mikembakemba,

²⁸ hatwama mu yihunda ya kupupa; mu mazuwo aze katambile kutwama atu, hanaafunjika kupwa a mbozo.

²⁹ Kechi kapwa pichi; upite wenyi kuuchi kulinduluka. Kechi kukolesa miji yenyi hashi.

³⁰ Kechi kulilamwina ku milima; mulengi muumisa mitombo yenyi; yitemo yenyi muyihehuka ni fuji.

³¹ Kanda ongoloka nikufuliela chuma chamokomoko, mumu kwononona chenyi muchipwa chamokomoko nawa.

³² Kumakamufwetacho cheswe shimbu kanda; mutango wenyi kuuchi kapwa wa wisu.

³³ Ngwe mutondo wa uva kumakalukumuna uva jenyi ja wisu ngwe mutondo wa olevwe makalukumuna yitemo yenyi.

³⁴ Usepa wa yitanganyanyi kuwaseka; ni kahia kakulalisa mazuwo ja akwa chindo.

³⁵ Kakumita uhuka; kakusema uhenge, ni mbunge jo kujakululika yuma ya kwonga.