Jobe 14 - MUKANDA USANDU WA ZAMBI 1975

¹ Mutu wa kusema kuli pwo kapwa wa matangwa akepe, a tò ni lamba.

² Kakutemuka ngwe chitemo, hikuma nawa, kakuchina ngwe chizulie; kalindulukile.

³ Mba mwenawo mumuhulikila meso je, nikumukoka ha lwaza usope nenyi?

⁴ Iya mahasa kuchiza chuma chipema muchima lia chuma chipi? Niumwe.

⁵ Kashika, se hanamufunjika kulu matangwa jenyi; unanyingika kulu kwalula cha tukweji twenyi; hiwamusela njiza kahashile kupalika,

⁶ himuchizenu meso je, mweche akawahilile ni matangwa jenyi ngwe ngamba.

⁷ Mutondo nyi maupakula hindu kutalatala chiliko hanji muusokoloka nawa, hanji miji yawo kuyichi kuma.

⁸ Chipwe muji wapwa ukulu mu mavu ni shina liawo hiliafwa,

⁹ hindu ha kwivwa vumba lia meya muusokesa mafwo nikusokesa mitango ngwe mutondo waha.

¹⁰ Alioze mutu mafwa, mamupombesa; masutuka mba kulihi ali?

¹¹ Ngwe meya akuma mu Chitende, ni lwiji wakutepuluka ni kuma chau,

¹² chocho mapomba mba kechi kuhinduka nawa. Kechi kulaula nawa, hanji kukasumuka ku tulo twenyi ndo malilu hahwa.

¹³ Ngunazange kuchi ukanguswekele mu Shiole; ukanguhengeke ndo ufwatulo we hiwapalika; ukangusele tangwa liami nikungwiwuluka.

¹⁴ Nyi mutu mafwa matwama ni mwono nawa? Matangwa eswe a uvumbiko wami te mungutwaminyina, ndo mangutusula.

¹⁵ Musanyika mba mungukumbulula; muwivwa usona ha chitanga cha moko je.

¹⁶ Mumu nyi chocho mualula mashimbo jami; kuchi kuhulikila meso je ha shili yami.

¹⁷ Utanguko wami muupwa ngwe wa kukashila mu njeke. Mufuka uhenge wami.

¹⁸ Alioze mulundu kuwakupuzuka ni kufwenyoka; liwe kuliakututuluka kuma kwalio;

¹⁹ mawe kakuchekewa ni meya; mihwiji kuyakuhungumuna mavu a hashi. Chocho yena wakuzanga kwenyeka kutalatala cha mutu.

²⁰ Kuwakumukumba matangwa eswe; aye kakuhwa. Kuwakumwalumuna ku meso ni kumuhuma.

²¹ Ana jenyi malema alioze aye kachinyingikine; hanji malela, aye kachimwene.

²² Mevwa wika yikola ya mujimba wenyi mwene; kakulitetela mwene wika.