Jobe 13 - MUKANDA USANDU WA ZAMBI 1975

¹ Meso jami hamona yino yuma yeswe, matwi jami hayivwa, hayisa chinyingi.

² Chize unanyingika yena ni yami ngunachinyingika nawa; kunwangukumbile nihamwe.

³ Alioze ngunazange kuhanjika ni Mukwa-Ndundo-Jeswe; ngunafupu kusopa chikuma chami ni Zambi.

⁴ Ha kutwala kuli yenu nwakutomesa ni mahuza; eswe nuli mbuki amokomoko.

⁵ Nyi kachi munuhola kama, chenacho te muchipwa mana jenu.

⁶ Ivwenu kulumbununa chami; panjikenu chikuma chami.

⁷ Munuhanjikila Zambi ni mahuza? munumuliongela yuma?

⁸ Munumuvwila katonde? Te Zambi munuhakwila?

⁹ Nyi chocho kuchi munupwa muze manupolongoza? Munuhasa kumwonga ngwe kakwonga mutu?

¹⁰ Nyi munupwa ni katonde ku tenga makanwambilacho.

¹¹ Wanangana wenyi kuuchi kunukolesa mwongo? Woma wenyi kuuchi kunukwata?

¹² Yambo yenu yapwa yishima ya uto; yikuma yenu yapwa ya uma.

¹³ Holenu nguhanjike! Cheswacho muchinguwana hichinguwane lume.

¹⁴ Mungutambula musunya wami mu mazo jami; mungukwata mwono wami mu kwoko liami.

¹⁵ Mangushiha, kutalatala chishi nacho; hindu mungulisambisa ni majila jami kumeso jenyi.

¹⁶ Chitanganyanyi kechi kuhasa kulikundama nenyi; chenacho muchipwa ulamwino wami.

¹⁷ Ivwenu kanawa maliji jami, kuhanjika chami chikahete ku matwi jenu.

¹⁸ Hinalulika chikuma chami; ngunanyingika mangusambisa.

¹⁹ Iya manguhangulula? Nyi chocho kachi munguhola ngufwe lume.

²⁰ Ngutayize yuma yiali wika mba chishi kuswama kumeso je:

²¹ Chiza kwoko lie kusuku ni yami; ni kanda unguchikimisa ni mwongo we.

²² Mba musanyika ni yami mungukumbulula; nyi ka, ngutayize kuhanjika yami mba yena mukangukumbulula.

²³ Uhenge wami ni milonga yami yingahi? Ngunyingikise kama uvulumunyi wami ni shili yami.

²⁴ Kuchi te wanguswekelele meso je nikungumona nguli mukwa kole ye?

²⁵ Te mukolesa woma lifwo lia kuhehuka ni fuji, hanji kuhanga yizungu yumu?

²⁶ Mumu wakusoneka yuma yisasu ya kulimika ni yami, nikuzukwila uhenge wa ukweze wami.

²⁷ Wakukashila molu jami mu kuli; wakutala majila jami eswe; wakufunjika kuze yiliato yami muyisulila.

²⁸ Mutu wakupokieka ngwe chuma chinapolo; ngwe uzalo umwe waliwa ni ndulu.