Jobe 12 - MUKANDA USANDU WA ZAMBI 1975

¹ Jo yakumbulula ngwenyi,

² Pundu enu nuli e atu lume, mba muze munufwa yenu, mana kechi kasoloka nawa hashi.

³ Alioze ni yami nawa nguli ni yinyingi yami; kunwangukumbile nihamwe. Yino nunambe, te iya kayinyingikine?

⁴ Masepa jami kanangusehe. Ami napwile nikusanyika kuli Zambi mba mangukumbulula. Mukwa ululi keshi kapalia alioze haliapwila kanangusehe.

⁵ Yoze unatwama nikuhwima kakulelesa lamba, alio Hapwa lia waze akutalinga.

⁶ Mazuwo ja yingumba kali kanawa; akwa kwihia Zambi kanajikiza; kakupwisa tachi jo ngwe Zambi.

⁷ Alioze hulenu tushitu, O manulongesa; hulenu tujila a mu tetela, o manulweza;

⁸ chipwe yiputa ya mu yambu muyinulongesa; chipwe yishi a mu kalunga-lwiji manwambulwila.

⁹ Te kwali umwe hakachi ka wano kanyingikine kwoko lia Yehova kakuchihnga?

¹⁰ Mu kwoko lienyi mwatwama mwono wa akwa mwono eswe, ni mwiku wa atu eswe.

¹¹ Twitwi kuliakweseka maliji chizechene ngwe limi Kakupanjika kulia.

¹² Mana kakutwama ni makulwana; kwoka cha matangwa kuchakuneha yinyingi.

¹³ Zambi kali ni mana ni ndundo; chiyulo ni chinyingi niyenyi.

¹⁴ Nyi iye mapuzula niumwe mahasa kutungulula; nyi mayikila mutu muma mumwe niumwe mamwazulwila.

¹⁵ Nyi mamina meya njiji mujuma; nyi matuma meya mapukumukina ha chifuchi.

¹⁶ Iye kali ni tachi ni mana; ni mukwa kwonga ni mukwa kwongoloka eswe ninyenyi.

¹⁷ Tuliamanga kakwatwala a kupupa; kakuhepwisa yipatula-milonga.

¹⁸ Kakujitula chiyulo cha mianangana nikwakashila malenge mu zalilo jo.

¹⁹ Kakutwala asasendote a kupupa; kakununguna akwa ndundo.

²⁰ Kakukukumisa ngaji; kakujimisa mana ja makulwana.

²¹ Kakuzukwila sau hali alemu; kakukokolola tachi ja akwa ndundo.

²² Kakufukula yijimbikilo ya milima; yuma ya milima kakuyineha mu pangu.

²³ Kakutohesa vungu limwe, mba kakulionwona. Kakuweza ku vungu limwe, mba kakulitwala funge.

²⁴ Kakuchiza yinyingi ya akwa lutwe a mavungu a hashi; kakwaendanganyisa mu puya kuyishi majila.

²⁵ Kakupapata mu milima ni pangu liakuhi; kakwapiepietesa ngwe akwa kuzengewa.