Jobe 11 - MUKANDA USANDU WA ZAMBI 1975

¹ Mba Zofare Ka-Nama yakumbulula ngwenyi,

² Maliji nyi halumbama kumanyi kechi kwakumbulula? Mutu mamusambisa ha kwoka cha yihanjika yenyi?

³ Kumbambula che muchiholesa atu? Shimbu mulenya yena, te kechi kukukolesa sonyi?

⁴ Mumu yena unambe ngwe, Longeso liami lipema, ni yami ngunapeme kumeso ja Zambi.

⁵ Ngunazange kachi Zambi ahanjike, apakule kanwa lienyi kuli yena,

⁶ akulweze yijimbikilo ya mana, ni chize akulinga no cheka ni cheka. Nyingika nyi, Zambi kakufwetesele uhenge we weswe.

⁷ Muhasa kupolongoza yuma yisuku ya Zambi? Muhasa kuheta kuze kwasulila Mukwa-Ndundo-Jeswe?

⁸ Kwasuha kuhiana malilu—yika muhasa kulinga? Kwajotoka kuhiana Shiole—yika muhasa kunyingika?

⁹ Usuhe wako Wahiana hashi; Utohe wako wahiana kalunga-lwiji.

¹⁰ Nyi mapalika nikukasa, nikuzanga kusopa, iya mamukwika?

¹¹ Mumu kananyingika ulelu wa atu. Nyi mamona uhenge kechi kuufunjika?

¹² Alioze chelo malilongesa mana, chipwe mutu kakusemuka ngwe mwana wa chimbulu wa mu yambu.

¹³ Nyi mbunge ye yinalulama, muzoza moko je kuli iye.

¹⁴ Nyi uhenge uli nawo mu kwoko uumbile. Kanda utayiza ungulungulu kutwama mu mazuwo je.

¹⁵ Nyi chocho muhetula meso je ni kapalia wakuhi. Kumukatwama kawape ni woma wakuhi.

¹⁶ Kumukavulama lamba lie; kumukaliwuluka ngwe meya aze hanapalika.

¹⁷ Mwono we muutemuka kuhiana tangwa lia ha muchima. Milima yawo muyipwa ngwe kucha chimene.

¹⁸ Kumukajikiza mumu ha kutalatala; kumukakengesa kweswe hikuhwima ni chipi chakuhi.

¹⁹ Kumukapomba, niumwe mahasa kukukolesa woma. Anji meza nikuwunjila kuli yena.

²⁰ Alioze meso ja yingulungulu makahwa; kechi kuwana jila ya kwombokela; kufwa muchipwa kutalatala cho.