Jobe 10 - MUKANDA USANDU WA ZAMBI 1975

¹ Mwono wami wangupihila; mungutuwa chikuma chami; munguhanjika ni usasu wa mbunge yami.

² Mungwamba kuli Zambi ngwami, Kanda unguhisa lume. Ngulweze kama chize unguli nacho.

³ Kafwa chakupemena kuhungumiona nikulelesa chitanga cha moko je, shimbu muchiwahisa yiyulo ya yingulungulu?

⁴ Meso a musunya uli no? Wakumona ngwe atu akumona?

⁵ Matangwa je chimuwika apwa ni matangwa ja atu? Miaka ye chimuwika yapwa ni miaka ya atu?

⁶ Kashika wakufupafupa uhenge wami, ni kupolongoza mulonga wami,

⁷ chipwe unanyingika chishi mulonga, ni wakuhi yoze mahasa kungupulula ku kwoko lie, nyi?

⁸ Moko je anguwumbile, angutangile, mba haliapwila hiwalumuka ungwonwone.

⁹ Iwuluka, yena wangulingile ngwe uma, mba ungwalumune fufuta nawa?

¹⁰ Wanguzujile ngwe yamwa; wangukondesa ngwe keju.

¹¹ Wangutukile ni kowa ni musunya; wangutokekele ni yifwaha ni mijipa.

¹² Wanguhele mwono ni utu wa zango; keke ye yangufungile mwono wami,

¹³ hindu yino yuma yaswamine mu mbunge ye; ngunanyingika chocho wachipalile.

¹⁴ Nyi munguvulumuna wakungufunjika, kuchi kungusambisa ha uhenge wami.

¹⁵ Nyi mungulinga chipi, ngongo yami! Nyi mungulinga ululi hindu chichi kuhasa kuhetuka mumu nakuzala ni sonyi ha kutala luyinda wami.

¹⁶ Nyi munguhetuka mukanguhanga ngwe ndumba, nikulinga nawa yikomokeso hali yami,

¹⁷ nikuweza nawa ku yela je a kulimika ni yami, nikwokesa utenu we kuli yami. Kunakumona kwalumioka ni jita wika.

¹⁸ Kuchi te wanguchijile mu jimo lia mama? Kachi nafwa mba liso nilimwe kachi kuliangumwene,

¹⁹ ngwe chapwile kama; hikunguchiza mu jimo nikungutwala ku fuka.

²⁰ Matangwa a mwono wami akehe wika, kashika ngweche nguhwime hakehe

²¹ shimbu kanda nguya kuze chichi kukatukako, ku chifuchi cha kulá pwi ni milima,

²² chifuchi chize cha kulá ni kuvundangenya, kuze pangu liako liapwa milima.