Jobe 1 - MUKANDA USANDU WA ZAMBI 1975

¹ Kwapwile umwe lunga mu chifuchi cha Uze; jina lienyi Jo. Mwe lunga te keshi kapalia, mukwa ululi, mukwa kuvwila woma Zambi, keshi kutala ku chuma chipi.

² Yasema ana; a malunga shimbiali; a mapwo atatu.

³ Upite wenyi tununu shimbiali a mapanga, tununu atatu a tumelu, kulakaji atano a makanga a ngombe, kulakaji atano a yimbulu a yihwo, ni atu a ha zuwo lienyi anji chikolo. Kashika yono lunga wapwile munene kuhiana eswe a ku yifuchi ya Chivumbuko.

⁴ Anenyi a malunga apwile ni kulia chiteleka, tangwa mu zuwo lia yeu, tangwa mu zuwo lia yeu, mba alakenyene mandumbu jo atatu eze akalie, akanwe no hamuwika.

⁵ Muze matangwa a yiteleka hapalika, Jo watumine ni kwapemesa. Te malimeneka chimene ni kulambula milambu ya kulumba nikulita ni kwalula cha ana, mumu Jo wanyongene ngwenyi, Hanji anami havulumuna, hanji hatuka Zambi mu mbunge jo. Jo walingile chocho matangwa eswe.

⁶ Tangwa limwe ana a Zambi yeza kusoloka kumeso ja Yehova. Satana yeza hakachi ko.

⁷ Yehova yamba kuli Satana ngwenyi, Kuli unakatuka? Satana yakumbulula Yehova ngwenyi, Ha kwendangana hashi, ni kujingajingaho.

⁸ Yehova yamba kuli Satana ngwenyi, Hiwazewula kavumbi kami Jo? Kuheshi niumwe hashi wa kulifwa nenyi; mumu iye keshi kapalia; mukwa ululi; mukwa kuvwila woma Zambi; keshi kutala ku chuma chipi.

⁹ Satana yakumbulula kuli Yehova ngwenyi, Te chawana anavwila woma Zambi?

¹⁰ Ngwami, Hiwamushichila chipanga cha kumufunga sali ni sali, ni zuwo lienyi, ni upite wenyi weswe. Hiwawahisa milimo ya moko jenyi, ni yikumba yenyi yoka mu chifuchi.

¹¹ Alioze Olola kwoko lie haliapwila, usunge ku upite wenyi weswe mba makutuka kumeso je.

¹² Yehova yamba kuli Satana ngwenyi, Upite wenyi weswe mu kwoko lie uli, alioze mwene kanda umusunga. Chocho Satana yakatuka kumeso ja Yehova.

¹³ Limwe tangwa, shimbu anenyi a malunga ni a mapwo machilia ni kunwa vinyu mu zuwo lia yayo,

¹⁴ yikwiza mukeji kuli Jo ngwenyi, Shimbu machipa ni ngombe, ni yimbulu te kanali hakamwihi no,

¹⁵ A-Shipa alundumukanga; ambatanga eswe. Ashihanga ngamba eswe ni katana, yami wika nombokanga ngununehene liji.

¹⁶ Shimbu machihanjika yikwiza mukwo ngwenyi, Kahia ka Zambi kahulumukanga kwilu nikwocha mapanga ni e ngamba nikwalalisa, yami wika nombokanga ngununehene liji.

¹⁷ Shimbu iye machihanjika yikwiza mukwo nawa ngwenyi, A-Kaletea ezanga mbunga jitatu; alundumukinanga hali tumelu nikwambata eswe. Ashihanga ngamba ni katana, yami wika nombokanga ngununehene liji.

¹⁸ Shimbu iye machihanjika yikwiza mukwo nawa ngwenyi, Anenu a malunga ni a mapwo apwanga mu zuwo lia yayo nikulia nikunwa vinyu,

¹⁹ mba kwakatukanga umwe chijimbi munene ku puya. Kalambanga mbango jiwana ja zuwo, mba liawuzukilanga hali akweze—hafwa, yami wika nombokanga ngununehene liji.

²⁰ Aho Jo yakatuka; yapula mazalo jenyi; yalitewula kawewe; yafulamana hashi ni kuwayila ngwenyi,

²¹ Uselesele natuhukile mu jimo lia mama; uselesele munguhiluka. Yehova wapele; Yehova hachiza—jina lia Yehova likafumane.

²² Mu yuma yino yeswe Jo kavulumwine, chipwe kusuma Zambi chize kuchalitele.