Jeremia 9 - MUKANDA USANDU WA ZAMBI 1975

¹ Nyi kachi mutwe wami wapwa meya, ni meso jami fuji lia masoji, hanga ngukalile mwalwa ni ufuku hali waze haashiha a kuli mwana wa pwo atu jami!

² Nyi kachi napwa ni kamwe kazuwo ka ngeji mu puya, hanga ngukahichike atu jami ngukaye kusuku no! Mumu eswe anapu akwa utanji, mbunga ya malunga a mafwefwe.

³ Kakunana malimi jo ngwe uta; mahuza hakola mu chifuchi, hi umwenemwene ko. Kakuya chize ku chipi chimwe ndo ku chipi chikwo, kangunyingikine. Chocho kanambe Yehova.

⁴ Mutu mweswe akanyame ni mwenyembo wenyi, niumwe kanda afuliela mwanakwo. Mumu mwanakwo mweswe kapwa mukwa kanjiliji, ni mwenyembo mweswe kanende ni kulamikiza.

⁵ Mutu mweswe kakwonga mwenyembo wenyi, niumwe kakuhanjika umwenemwene, hanalongesa malimi jo kuhanjika mahuza, kakulikatalisa ni kuvulumiona.

⁶ Kakulumbieka kupinjisa ha kupinjisa, kakulumbieka kwonga ha kwonga. Kasolo kungunyingika. Chocho kanambe Yehova.

⁷ Kashika chocho kanambe Yehova-wa-Tujita, Mungwapemesa ni kahia, mungwaeseka. Chikwo chika munguhasa kulinga kuli atu jami?

⁸ Limi lio liapwa mwivu wa kufwa nikuhanjika kwonga. Mutu mweswe ni kanwa lienyi kakuhanjika sambukila kuli mukwo, alioze mu mbunge yenyi kakutaka kumujikinyina.

⁹ Yehova kanambe ngwenyi, Te chichi kwaaha kastigu mumu ha yino yuma? Chichi kukala milonga ha vungu limwe liapwa ngwe lino nyi?

¹⁰ Putukenu kulila ni kulila mbimbi ha mukunda wa milundu; putukenu lungungu ha mukunda wa ulilo wa mu puya, mumu hanenyekako kashika niumwe mapalikako, chipwe kuteta cha yimuna kachivwileko. Chipwe tujila a mu tetela, chipwe tushitu hachinako haya.

¹¹ Mungupwisa Yerusaleme mulumba wa yipuzu, chipombelo cha mikuza. Mungupwisa yihunda ya Yunda puya, kuze kukwatwamine atu.

¹² Mutu wa mana yoze yuma yino muyimulumbunuka, iya? Yoze hevwa chuma chino ku kanwa lia Yehova akahase kuchilumbununa, iya? Kuchi te chifuchi hachenyeka, hachipihisa ngwe puya, kashika niumwe mapalikilako?

¹³ Ni Yehova kanambe ngwenyi, Mumu hanehuka shimbi yami yize nasele kumeso jo, kononokene ku liji liami chipwe kwenda nikulita nalio,

¹⁴ hanakaula mbunge jo ene ni pami, nikukaula Ambale nikulita ni longeso lia tulamba two,

¹⁵ kashika Yehova-wa-Tujita mwe Zambi ya Izalele kanambe ngwenyi, Mungulisa e atu musase nikwaaha meya a kasashisa akanwe.

¹⁶ Mungwamwanga hakachi ka mavungu kaanyingikine, chipwe tulamba two, mungwahanga ni katana ndo hinaanongesa.

¹⁷ Yehova-wa-Tujita kanambe ngwenyi, Nyongenu nusanyike mapwo akwa kulishimwoka, tumenu mapwo waze anahase, eze.

¹⁸ Atambuke aputuke kutulilila mbimbi, hanga mu meso jetu musulumioke masoji, ni yindayizo yetu yikapukumune meya.

¹⁹ Mumu liji lia kulila mbimbi tunalivu mu Zaione ngwo, Twalumbuka Chichize! Hanatukolesa sonyi liakulu mumu hitwahichika chifuchi, hanunguna mazuwo jetu.

²⁰ Enu mapwo ivwenu liji lia Yehova, matwi jenu atambule liji lia mu kanwa lienyi. Longesenu anenu a mapwo mwaso wa mbimbi, mutu mweswe alongese mwenyembo wenyi kwimba lungungu ni chinyengo.

²¹ Mumu kufwa hichakanduka kwe ku njanela jetu, hichanjila mu palasiu jetu, ni kusutula ana ha tapalo, ni akweze ku malindalinda.

²² Amba ngwe, Yehova kanambe ngwenyi, Mijimba ya malunga afu muyilimbuka hashi ngwe wilo. Muyiholoka ngwe yichita kuli mukwa kucha, mba niumwe mayanda,

²³ Yehova kanambe ngwenyi, Mukwa mana kanda alisamba ni mana jenyi; mukwa ndundo kanda alisamba ni ndundo jenyi; pichi kanda alisamba ni upite wenyi.

²⁴ Alioze yoze malisamba alisambe mumu ha kungusa chinyingi ni ha kungunyingika, yami Yehova mukwa kulinga ni utu, ni chize chinalite, ni ululi hashi. Mumu Yehova kanambe ngwenyi, Nakuwahilila ni yuma yino.

²⁵ Yehova kanambe ngwenyi, Matangwa kaneza muze munguhana kastigu kuli waze hanaupwisa ngalami hindu kapwa yilima—

²⁶ A-Engitu, ni A-Yunda, ni A-Endome, ni ana ja Amone, ni A-Moape, ni waze eswe atwama mu puya akupatula mbango ja kambu jo, mumu mavungu wano eswe yilima, ni akwa munyachi wa Izalele eswe kapwa yilima mu mbunge.