Jeremia 8 - MUKANDA USANDU WA ZAMBI 1975

¹ Yehova kanambe ngwenyi, Ha matangwa aze yifwaha ya mianangana ja A-Yunda, ni yifwaha ya alemu jenyi, ni yifwaha ya asasendote, ni yifwaha ya aprofeta, ni yifwaha ya A-Yerusaleme mayichiza ku mafuka jo.

² Mayimwanga kumeso ja tangwa ni kakweji ni mbunga yeswe ya mwilu, aze azangile nikwalingila, nikwakaula, nikwafupa, nikwawayila. Kechi kayikungulula chipwe kuyifunda. Kumuyikapwa ngwe wilo ha mavu.

³ Yehova-wa-Tujita kanambe ngwenyi, Waze eswe malisalaho a ku munyachi uno upi mu yifuchi kuze naahuminyine makazanga Shinaho kufwa hi mwono ko.

⁴ Muwamba kuli ayo ngwe, Yehova kanambe ngwenyi, Muze malunga akulimbuka, te keshi kuhinduka nawa? Nyi umwe mapianguka, keshi kuhiluka?

⁵ Nyi chocho wano atu kuchi te kakupiangukila mu kukokoloka cha mutolo? Kanakakaminya ku kwonga; kasolo kuhiluka.

⁶ Hinatelako matwi, hinapanjika, alioze kahanjikile kanawa. Niumwe kanalikonyeka ha ungulungulu wenyi ngwenyi, Yika nalinga? Mweswe kanatalikisa mu jila yenyi mwene ngwe kavwalu yoze kanalimbilila mu jita.

⁷ Chipwe chitwanjimbu mu malilu kananyingika tungonde twenyi; ni katele, ni kapiasa, ni chitokola kakufunga kakweji wo wa kuheta. Alioze atu jami kanyingikine upatwilo wa Yehova.

⁸ Kuchi munuhasa kwamba ngwenu, Tuli akwa mana, ni shimbi ya Yehova tuli nayo? Talenu chisonekeso cha kwonga cha akwa kusonyeka hichinayalumuna mu mahuza.

⁹ Akwa mana makaakolesa sonyi, makatatajala, makakwachika; mumu hanalitunu liji lia Yehova, mba mana aka ali no nawa?

¹⁰ Kashika munguhana mapwo jo kuli akwo, ni minda yo kuli akwa kukumba, mumu chize kuli mukepe wahiana ndo kuli munene Wahiana, eswe kali ni chipululu cha kufumbuka cha uhenge. Chize kuli profeta ndo kuli sasendote eswe kakulinga ni mahuza.

¹¹ Hawuka chilonda cha mwana wa pwo atu jami hakehe wika, nikwamba ngwo, Sambukila, sambukila, muze sambukila yakuhi.

¹² Te sonyi evwile ha kulinga yuma ya lwaji? Kenu! Kefwile sonyi nijimwe. Sonyi kajinyingikine. Kashika makalimbuka hakachi ka akwa kulimbuka. Mwaka wa kastigu mungwanunguna. Chocho kanambe Yehova.

¹³ Yehova kanambe ngwenyi, Muze munguhela, kukushi uva ha mitondo ya uva, kukushi makuyu ha mikuyu. Chipwe mafwo homa, ni yuma yize naaheleyo muyikatuka kuli ayo.

¹⁴ Kuchi te tunatwama chizechene? Kungulukenu, tuye ku yihunda ya kukolesa tukakuweko; mumu Yehova Zambi yetu hanatufunjikila kukuwa; hanatwehe meya a kasashisa tukanwe, mumu hitunavulumuna Yehova.

¹⁵ Twafupile sambukila, alioze nichimwe chipema kuchejile. Twafupile matangwa a kuwuka, alioze mwongo wika wejile.

¹⁶ Kuchehula cha tuvwalu two kanachivu ku Ndane; ha kuteta cha tuvwalu two a kuji chifuchi cheswe chinanyiki. Kaneza mukulia chifuchi ni chize cheswe chilimo ni chihunda ni waze atwamamo.

¹⁷ Mumu talenu ngunatumu tupela hakachi kenu, fwiji aze kechi kuhasa kwahombola, mba kumakanusuma. Chocho kanambe Yehova.

¹⁸ Chinyengo chami chahiana chize mahasa kuwuka, mbunge yami yinayiji muchima liami.

¹⁹ Panjikenu muteto wa mwana wa pwo atu jami, ha usuhe ni unene wa chifuchi ngwo, Yehova keshimo mu Zaione? Mwanangana wenyi katwamine muli iye? Kuchi te hanangwihi ni tuponya two twa kwola hi mahamba jo a tundaka?

²⁰ Matangwa a kucha hanapalika, mwaka wa vumbi hiwahwa, ulamwino kutwauwanyine!

²¹ Mbunge yami yili ni chilonda mumu ha chilonda cha mwana wa pwo atu jami. Ngunalishimwoka; mwongo wangukwata.

²² Yitumbo yakuhi mu Ngiliate? Mbuki wakuhiko? Mba kuchi te kawukile mwana wa pwo atu jami ahinduke?