Jeremia 7 - MUKANDA USANDU WA ZAMBI 1975

¹ Liji lia Yehova lize liejile kuli Jeremia ngwo,

² Manyina mu chikolo cha zuwo lia Yehova ukambujoleko liji lino ngwe, Ivwenu liji lia Yehova enu A-Yunda eswe nwakunjilila ku yikolo yino kuwayila Yehova.

³ Yehova-wa-Tujita mwe Zambi ya Izalele ngwenyi, Pemesenu majila jenu ni yitanga yenu, mba mungunutayiza kutwama kuma kuno.

⁴ Kanda nufuliela maliji wano a kwonga ngwo, Yino yinapu tembele ya Yehova, tembele ya Yehova, tembele ya Yehova.

⁵ Mumu nyi munupemesa majila jenu ni yitanga yenu pundu; nyi munulinga ni kulita umwe kuli mukwo ni mukwo,

⁶ nyi kunuchi kupinjisa chilambala hanji mwana-shiwa, hanji tuliwa, kunuchi kumwanga muma muno manyinga keshi chitela, nyi kunuchi kukaula mazambi akwo kulilemeko no,

⁷ nyi munu linga chocho mba mungunutayiza kutwama muma muno, mu chifuchi chize nahanyine ha shakulu kuli tulamba twenu ha miaka yeswe.

⁸ Mokomoko nunafuliela maliji a kwonga.

⁹ Te nunazange kwiya, ni kushiha, ni kulinga utanji, ni kulishinga ni mahuza, nikwochela Mbale insensu, ni kukaula mazambi eka kunwaanyingikine,

¹⁰ mba munwiza nikumana kumeso jami mu zuwo lino, hanaliluku jina liami, nukambe ngwenu, Hanatupulula! nukaye nukanyongonone ni yuma yino ya kukoka lwaji?

¹¹ Zuwo lino hanaliluku jina liami hilialumuka kumeso jenu chivwenge cha mihuza? Chipwe yami hinachimona, chocho kanambe Yehova.

¹² Yénu haliapwila ku zuwo liami liapwile mu Shilo, kuze natwamishine jina liami hatangu, nuchitale chize nalingileko mumu ha ungulungulu wa atu jami A-Izalele.

¹³ Kashika haliapwila Yehova kanambe ngwenyi, Mumu hinwalinga yuma yino yeswe mba muze nahanjikile kuli yenu nikutumatuma kunwapanjikile, muze nasanyikine kunwakumbulwile,

¹⁴ kashika zuwo lino hanaliluku jina liami, ni yenu nunafulielamo, ni kuma kuno nanuhele yenu ni tulamba twenu, mungulilinga chize nalingile ku Shilo.

¹⁵ Mungunumbila kumeso jami chizechene ngwe nambilile usoko wenu eswe ana eswe ja Eframe.

¹⁶ Ni yena, kanda ulembela vungu lino; kanda usaho muteto hanji kulemba hali ayo; kanda uahakwila kumeso jami, mumu chakupanjikile.

¹⁷ Kwamwene chize analingi mu yihunda ya Yunda ni ha matapalo ja Yerusaleme?

¹⁸ Ana kakucha kunyi, atato mawika kahia, mapwo machika wunga akalingile tumbolo mwanangana wa pwo wa malilu. Mba kakuzuza milambu ya kunwa kuli mazambi eka akangwihie.

¹⁹ Yehova kanambe ngwenyi, Yami anehi? Hi ene ko hanga akevwe sonyi?

²⁰ Kashika Mwene Yehova kanambe ngwenyi, Utenu wami ni ufwatulo wami kumuukazukuka homa hano hali atu, ni yimuna, ni ha mitondo ya mu minda ni ha mihuko ya mavu, kumuukalekwoka, kechi kuhasa kuujima.

²¹ Yehova-wa-Tujita, Zambi ya Izalele kanambe ngwenyi, Wezenu milambu yenu ya kulumba ku yitapo yenu, nukalie ye yifwo.

²² Mumu ha tangwa lize nachijile tulamba twenu ku chifuchi cha Engitu, chahanjikile no hanji kwaaha shimbi yimwe ya kutwala ku milambu ya kulumba ni yitapo.

²³ Alioze naahele shimbi yino ngwami, Ononokenu ku liji liami mba mungupwa Zambi yenu ni yenu munupwa atu jami. Endenu mu jila yeswe mungunwamba hanga chikapwe kanawa ni yenu.

²⁴ Alioze kapanjikile chipwe kutela matwi. Endele nikulita ni yiyulo yo ni pami ja mbunge jo jipi. Ayile kunyima hi kulutwe ko.

²⁵ Chize ku tangwa lize tulamba twenu akatukile ku chifuchi cha Engitu ndo musono, chahonene kutuma tuvumbi twami aprofeta kuli ayo tangwa ha tangwa;

²⁶ hindu kapanjikile kuli yami, chipwe kutela matwi, alioze akalishile makota jo nikuhiana tulamba two kulinga chipi.

²⁷ Kashika muhanjika maliji wano eswe kuli ayo, alioze kechi kukupanjika. Mutambika kuli ayo, alioze kechi kukukumbulula.

²⁸ Muwamba kuli ayo ngwe, Wano e atu kononokene ku liji lia Yehova Zambi yo, katambwile lufumbo; umwenemwene hiwatoka, hauteta ku mivumbo yo.

²⁹ Tewula kambu je ujimbile; imba lungungu ha milundu ya hululu, mumu Yehova hambila chisemuko cha utenu wenyi; halitunacho.

³⁰ Yehova kanambe ngwenyi, Ana ja A-Yunda halinga chipi kumeso jami. Hanase yuma yo ya lwaji mu zuwo lize haliluka jina liami, akalichise.

³¹ Hanatungu nangamo lia Tofete lize lili mu mungulunga wa mwana wa Hinome, akalumbe ana jo a malunga ni a mapwo mu kahia, chuma chachitumine, kuchanjilile mu mbunge yami.

³² Yehova kanambe ngwenyi, Kashika matangwa kaneza muze kechi kautongola nawa ngwo Tofete, hanji mungulunga wa mwana Hinome alioze mungulunga wa Chishihilo. Mumu mafunda mu Tofete ha kuhona mafuka kweka.

³³ Mijimba ya afu ja vungu lino muyipwa kulia kuli tujila a mu tetela, ni kuli tushitu a mu yambu, ni kukuchi kupwa akwa kwayingila.

³⁴ Mu yihunda ya Yunda ni ha matapalo a Yerusaleme mungusulisa liji lia chiseke ni liji lia uwahililo, ni liji lia sandungi, ni liji lia ndungi, mumu chifuchi muchalumuka puya.