Jeremia 52 - MUKANDA USANDU WA ZAMBI 1975

¹ Zedekia wapwile ni makumi aali a miaka ni mwaka umuwika muze aswanyine wanangana. Wayulile kumi lia miaka ni mwaka umuwika mu Yerusaleme. Jina lia naye Hamutala mwana Jeremia wa ku Libna.

² Walingile chipi kumeso ja Yehova nikulita ni yize yeswe Jehoakime walingile.

³ Pundu ha utenu wa Yehova yuma yapihile kuhiana mu Yerusaleme ni hali A-Yunda chocho iye waachijile kumeso jenyi. Mba Zedekia yakatukila mwanangana wa Babilonia.

⁴ Ha mwaka wamuchilivwa wa kuyula chenyi, ha kakweji wamuchikumi, ni tangwa liamuchikumi lia kakweji, Nabukanezore mwanangana wa Babilonia yeza ni tujita twenyi eswe kulimika ni Yerusaleme. Yasa chilombo chenyi kulimika nacho; yatunga mbonge kweswe kwa kujingilika.

⁵ Chocho aselekele chihunda ndo mwaka kumi ni kashi wa mwanangana Zedekia.

⁶ Ha tangwa liamuchilivwa lia kakweji wamuchiwana zala yapwile yinji mu chihunda; kukwapwile mbolo hali akwa chifuchi.

⁷ Henaho yalokola chipanga cha chihunda, mba tujita eswe yakatuka mu chihunda, yachina ha ufuku jila ya chikolo cha hakachi ka yipanga yiali kwe ku munda wa mwanangana, shimbu A-Kaletea machijingilika. Yatalikisa ku Arapa.

⁸ Alioze tujita twa A-Kaletea yahanga mwanangana; yawana Zedekia mu yana ya Yeriku, mba tujita twenyi eswe amumwanganyine mwamwa.

⁹ Yakwata mwanangana, yamutwala kuli mwanangana wa Babilonia ku Ribila mu chifuchi cha Hamate. Kwenako amusopeselele.

¹⁰ Mwanangana wa Babilonia yashiha ana ja Zedekia a malunga kwe kumeso jenyi. Yashiha nawa alemu eswe ja A-Yunda kuze ku Ribila.

¹¹ Yalokola meso ja Zedekia, yamukashila mu malenge, mba mwanangana wa Babilonia yamutwala ku Babilonia, yamusa mu zuwo lia ususu ndo tangwa lia kufwa chenyi.

¹² Ha kakweji wamuchitano ha tangwa liamuchikumi lia kakweji—we mwaka kumi ni wamuchilivwa wa mwanangana Nabukanezore mwanangana wa Babilonia—kwejile Nabuzaradane, kapitau ka tulayi, kanda kavumbi ka mwanangana wa Babilonia ku Yerusaleme.

¹³ Yocha zuwo lia Yehova, ni zuwo lia mwanangana. Mazuwo eswe a mu Yerusaleme, e mazuwo eswe anene yaocha ni kahia.

¹⁴ Mba maswalale aze eswe ja A-Kaletea waze ejile ni kapitau ka tulayi apuzwile yipanga-ya-mawe ya Yerusaleme kwa kujingilika.

¹⁵ Nabuzaradane kapitau ka tulayi yatwala ku ufunge amwe hakachi ka yiswale ahiana hakachi ka atu, ni atu aze asalile mu chihunda, ni waze alikunjikile kuli mwanangana wa Babilonia hamwe ni masalila ja yilangaji.

¹⁶ Alioze Nabuzaradane kapitau ka tulayi yahichika yiswale ahiana a chifuchi apwe akwa kululika mitondo ya uva ni akwa kulima.

¹⁷ Ni manguji a unengu a mu zuwo lia Yehova, ni yimanyino, ni lutanke lwa unengu ya mu zuwo lia Yehova, A-Kaletea yayipalwola nikumbata unengu weswe ku Babilonia.

¹⁸ Yambata nawa ndeho, ni mapa, ni mana, ni mbasia, ni yenga ya insensu, ni yikwachilo yeswe ya unengu alingile nayo mu uvumbiko wa tembele.

¹⁹ Yambata nawa misenge, ni yikombelo, ni mbasia, ni ndeho, ni yikwachilo ya ndeya, ni yenga ya insensu, ni misenge ya milambu ya kunwa. Yize yeswe yapwile ya oru kapitau ka tulayi yambata ngwe oru, ni yize yapwile ya prata yambata ngwe prata.

²⁰ Ha kutwala ku manguji aali, ni lutanke umuwika, ni kumi lia ngombe ni ngombe aali a kweseka mu unengu mushi lia lutanke, ni yimanyino yize mwanangana Solomone walingilile zuwo lia Yehova, unengu wa yino yuma yeswe kahashile kuupezalisa.

²¹ Ha kutwala ku manguji Chizundamo cha nguji limuwika kumi lia mbandu ni mbandu nake, ni cheseko cha kujingilika chapwile cha kumi lia mbandu mi mbandu jiali. Ndama yalio yapwile ya minwe yiwana. Liapwile ni pako.

²² Helu lialio liapwile chipangula cha unengu. Usuhe wa chipangula chimuwika mbandu jitano. Chapwile ni milimo ya kuseleka ni mihuko ya romana kweswe kwa kujingilika, yeswe ya unengu. Ni nguji liamuchiali chimuwika liapwile ni ye mihuko ya romana.

²³ Kwapwile ha malumbu makumi livwa a romana ni romana jisambano. Ha milimo ya kuseleka kweswe kwa kujingilika kwapwile kulakaji lia mihuko ya romana.

²⁴ Kapitau ka tulayi yakwata Seraia sasendote mukwa lutwe, ni Zefania sasendote wamuchiali, ni atatu akwa kufunga mapito;

²⁵ ni ku chihunda yakwata umwe kapitau helu lia akwa jita, ni malunga shimbiali a ku punga ya mwanangana waze yaawana mu chihunda, ni mukwa kusonyeka te kapitau ka tujita yoze wasanyikine atu a chifuchi, ni makumi asambano a malunga ja akwa chifuchi yaawana mu chihunda.

²⁶ Nabuzaradane kapitau ka tulayi yaakwata, yaatwala kuli mwanangana wa Babilonia mu Ribila.

²⁷ Mba mwanangana wa Babilonia yaalamba, yaashiha mu Ribila mu chifuchi cha Hamate. Chocho yachiza Yunda mu chifuchi chenyi nikumutwala funge.

²⁸ Kwalula cha atu aze Nabukanezore atwalile funge chino; ha mwaka wamuchishimbiali, tununu atatu a A-Yunda ni makumi aali ni A-Yunda atatu.

²⁹ Ha mwaka kumi ni nake wa Nabukanezore yachiza ku Yerusaleme ni kutwala ku ufunge kulakaji nake ni makumi atatu ni atu aali.

³⁰ Ha mwaka makumi aali ni wamuchitatu wa Nabukanezore, Nabuzaradane kapitau ka tulayi watwalile ku ufunge kuli A-Yunda kulakaji shimbiali ni makumi awana a atu ni atu atano. Atu eswe apwile tununu awana ni kulakaji asambano.

³¹ Ha mwaka makumi atatu ni wamuchishimbiali wa ufunge wa Jehoachine mwanangana wa Yunda, ha kakweji kumi ni wamuchiali, ha tangwa makumi aali ni liamuchitano lia kakweji, Evile-Merodake mwanangana wa Babilonia, ha mwaka uze amupwishile mwanangana, iye wazundwile mutwe wa Jehoachine mwanangana wa Yunda, wamuchijile mu zuwo lia ususu.

³² Yahanjika nenyi ni vumbi; yasa ngunja yenyi helu lia ngunja ja mianangana ni akwo waze apwile nenyi mu Babilonia.

³³ Chocho Jehoachine yazula mazalo jenyi ja zuwo lia ususu. Matangwa eswe a mwono wenyi walile ku mesa ya mwanangana ni kuhona ka.

³⁴ Ni mbongo, amuhele kuli mwanangana mbongo ja kulita ni kuhona chenyi cha tangwa ha tangwa ndo ku tangwa lia kufwa chenyi, matangwa eswe a mwono wenyi.