Jeremia 51 - MUKANDA USANDU WA ZAMBI 1975

¹ Yehova kanambe ngwenyi, Munguvundula Spiritu ya umwe chonwonyi akalimike ni Babilonia, ni waze atwama mu Kaletea.

² Mungutuma ku Babilonia akwa kufuza, akamufuze, akahichike chifuchi chenyi chamokomoko, muze mamuheta sali ni sali ha tangwa lia lamba.

³ Kanda nutayiza ngashi kunana uta wenyi; kanda amana mu chikuto chenyi cha utale. Kanda nuhichika akweze jenyi, onwonenu tujita twenyi eswe.

⁴ Kumakalimbuka a kushiha mu chifuchi cha A-Kaletea, ni akwo a kulemeka mu matapalo jenyi.

⁵ Mumu A-Izalele ni A-Yunda kaehukile kuli Zambi yo Yehova-wa-Tujita; alioze chifuchi cha A-Kaletea chazala ni uhie kuli mwe Musandu wa Izalele.

⁶ Chinenu hakachi ka Babilonia, mutu mweswe alamwine mwono wenyi! Kanda anusutula mu kastigu yenyi mumu mwaka wa kukala wa Yehova, uno, che kufwetesa chenyi kuli iye.

⁷ Babilonia wapwile musenge wa oru mu kwoko lia Yehova, wa kuzengewesa akwa hashi eswe. Mavungu eswe anwine vinyu yenyi, kashika mavungu eswe azalukile.

⁸ Susumuku Babilonia haholoka, hanafu; mulililenu mbimbi! Andenu yitumbo ha yikola yenyi, hanji muyimuwuka.

⁹ Twazangile kuwuka Babilonia alioze aye kazangile. Himwehukenu eswe, tatuye mutu mweswe ku chifuchi chenyi, mumu upatwilo wenyi hiwaheta ndo kwilu hiwazunduka ndo ku malilu.

¹⁰ Yehova hanasolola kusamba chetu; tatuye, tukambulule mu Zaione milimo ya Yehova Zambi yetu.

¹¹ Kalulenu mivu! Andenu kepwe! Yehova hanavundula Spiritu ya mianangana ja A-Media, mumu ha kutwala ku Babilonia upale wenyi wapwa wa kuyonwona mumu chenacho che kukala cha Yehova, kukalila tembele yenyi.

¹² Mikenu mbandeira ya kulimika ni yipanga ya Babilonia ya mawe; kolesenu tulayi; tongolenu tulayi; lulikenu kujikinyina. Mumu Yehova hanalulika, hanalingi chize ahanjikile ha kutwala kuli waze atwama mu Babilonia.

¹³ Ena watwama ku njiji jinji, wapita yuma yilemu; songo lie hilieza wanda wa mwono we hanaupatula.

¹⁴ Yehova-wa-Tujita halishinga ni iye mwene ngwenyi, Pundu munguzalisako ni malunga, kwoka ngwe makumbi, mba o makalumuka hali yena ni liji lia kukumba.

¹⁵ Iye watangile hashi ni tachi jenyi, wakolesele muno-muze ni mana jenyi, wazazulwile malilu ni chinyingi chenyi.

¹⁶ Muze matuhwisa liji lienyi kwakupwa kunuma cha meya mwilu, kakwandula mbundu ndo ku masongo a hashi. Kakutuma njaji ja vula, kakuchiza fuji mu mazuwo jenyi a kuswekela.

¹⁷ Mutu mweswe keshi mana, keshi chinyingi, fuli-oru kakumukolesa sonyi ku mahamba jenyi; mumu tuponya twenyi a mahuza, mwiku keshi nawo.

¹⁸ Kafwikile nichimwe; chitanga chimwe cha kwonga; ha mwaka wa kastigu yo makakuwa.

¹⁹ Yoze wapwa chihinga cha Yakomba kapwile ngwe wano, mumu iye wawumbile yuma yeswe, Izalele lie vungu lia chihinga chenyi, jina lienyi Yehova-wa-Tujita.

²⁰ Alioze yena uli muhato wami kanda chitwa cha jita; ni yena mungupatwola mavungu yipalupalu; ni yena mungwonwona mawanangana.

²¹ Ni yena mungupalwola kavwalu ni yoze unamwendesa; ni yena mungupalwola temba ni yoze unaliendesa;

²² ni yena mungupalwola lunga ni pwo; ni yena mungupalwola kashinakaji ni mwana-lunga; ni yena mungupalwola mukweze ni mwana-pwo;

²³ ni yena mungupalwola kafunga ni yimuna jenyi; ni yena mungupalwola njimi ni ngombe jenyi; ni yena mungupalwola akwa kuyula ni tupitau;

²⁴ Mungufwetesa Babilonia ni waze eswe atwama mu Kaletea, kumeso jenu, ha yipi yeswe halinga mu Zaione. Chocho kanambe Yehova.

²⁵ Yehova kanambe ngwenyi, kunalimika ni yena mulundu chonwonyi— mukwa kwonwona hashi heswe. Mungwolola kwoko liami kulimika ni yena; mungukuhulumuna ku milundu ni kukupwisa mulundu wa kwocha.

²⁶ Chipwe mawe kechi kaachiza kuli yena a kutunga no mbango, hanji a kutunga no fundamentu, alioze kumuopwa puya ya mutolo. Chocho kanambe Yehova.

²⁷ Mikenu mbandeira hashi, humunenu chitavwi hakachi ka mavungu, lulikenu mavungu akase nenyi jita. Sanyikenu mawanangana akalimike nenyi. Ararate, ni Mini, ni Akanase; tongolenu kasongo ka maswalale alimike nenyi; nehenu tuvwalu ngwe makumbi a tachi.

²⁸ Lulikenu mavungu akase nenyi jita, mianangana ja A-Media, ni anguvulu, ni tupitau two, ni yifuchi yo yeswe kuze ayula.

²⁹ Chifuchi chinachikima nikulifwita ni yikola, mumu chize Yehova hanalulika kulimika ni Babilonia chinakolo, akapwise chifuchi cha Babilonia cha hululu ni akwa kutwamamo akuhi.

³⁰ Tujita twa Babilonia hanalitwamina kwasa jita; kanatwama mu yiswamo yo. Tachi jo hijahwa, hanalumuka ngwe mapwo. Mazuwo jako kanaweme, ni njalo jenyi hijinamakuka.

³¹ Mukeji umwe kanazomboka kutakana ni mukwo, ni kanganda umwe akatakane ni mukwo, akalweze mwanangana wa Babilonia chihunda chenyi hanachitambula sali ni sali.

³² Yau hanayitambula, yipanga hanayocho ni kahia, maswalale kanalifwichi ni mwongo.

³³ Mumu Yehova-wa-Tujita, Zambi ya Izalele kanambe ngwenyi, Mwana-pwo Babilonia hanapu ngwe chizungwilo ha mwaka wa kuzungula. Kwasala hakehe mba mwaka wa kucha muwiza kuli iye.

³⁴ Nabukanezore mwanangana wa Babilonia hangulia, hangufwenya, hangupwisa mulondo wamokomoko, hangumina ngwe ngongo munene, hazalisa jimo lienyi ni yuma yami yipema mba hangumbila.

³⁵ Mukwa Zaione akambe ngwenyi, Upupilo hangulinga ni kuli usoko wami nawa ukapwe ha Babilonia. Yerusaleme akambe ngwenyi, Manyinga jami akapwe hali waze atwama mu Kaletea.

³⁶ Kashika Yehova kanambe ngwenyi, Mungukuhakwila mungukukalila. Munguumisa kalunga-lwiji kenyi, munguumisa fuji lienyi lia meya.

³⁷ Mba Babilonia muyalumuka mulumba wa yipuzu. Muyipwa wendelo wa mikuza, kanda chuma cha mwongo ni cha kusoza ni yoze matwamamo wakuhi.

³⁸ Kumakateta hamuwika ngwe ndumba, kumakakenana ngwe mievu ja ndumba.

³⁹ Shimbu kanachivunduka mungwalulikila chiteleka akazengewe ndo malezumuka, akaye tulo a mutolo nikuhinduka nawa ka. Chocho kanambe Yehova.

⁴⁰ Mungwakoka ku chishihilo ngwe anamapanga, ngwe kuji a mapanga ni kuji a pembe.

⁴¹ Babilonia hakwachika Chichize, mukwa lufuma wa hashi heswe hamukwata! Babilonia hanalumuka Chichize chuma cha mwongo hakachi ka mavungu!

⁴² Kalunga-lwiji haneza ha Babilonia, hafukiwa ni mikanya yenyi ya kupinda.

⁴³ Yihunda yenyi hiyalumuka yuma ya mwongo, chifuchi chenyi cha changa ni puya, chifuchi kuze kukushi atu, kuze niumwe mwana mutu keshi kupalika.

⁴⁴ Mbele mu Babilonia mungumwaha kastigu. Mungumuchiza mu kanwa chize hamina. Mavungu keshi kuya kuli iye nawa ngwe lwiji; chipanga cha Babilonia cha mawe hichapuzuka.

⁴⁵ Enu atu jami katukenu muli iye! Mutu mweswe alamwine mwono wenyi ku utenu usasu wa Yehova!

⁴⁶ Mbunge jenu kanda jilezumuka hanji kwivwa woma ha kwivwa ndundumwino mu chifuchi muze ndundumwino muyiza mwaka umwe, ni ndundumwino yikwo mu mwaka ukwo, ni upupilo uli mu chifuchi, ni mukwa kuyula kanalimiki ni mukwa kuyula.

⁴⁷ Talenu kashika, matangwa kaneza muze mungulamba tuponya twa mu Babilonia. Chifuchi cheswe munguchikolesa sonyi, ni waze maashiha malimbuka muli iye.

⁴⁸ Mba malilu ni hashi, ni yize yeswe yilimo memba ni uwahililo hali Babilonia, mumu yonwonyi makatuka ku Norte kulimika no. Chocho kanambe Yehova.

⁴⁹ Chatamba Babilonia kupuzuka mumu hali A-Izalele waze ashihile, chizechene ngwe ha mukunda wa Babilonia akwa hashi heswe hanalimbuka a kushiha.

⁵⁰ Enu kunwafwile ni katana yénu, kanda numana chizechene! Iwulukenu Yehova chipwe nuli kusuku. Yerusaleme nuyiwuluke mu manyonga jenu ngwenu,

⁵¹ Hanatukolesa sonyi mumu hitwevwa chize hatuchoka; kusauka hichatufuka meso jetu mumu tundaka hanjila mu yipatulo yisandu ya zuwo lia Yehova.

⁵² Kashika Yehova kanambe ngwenyi, Matangwa kaneza muze mungulinga upatwilo wami ha tuponya twenyi, ni ndusu mu chifuchi chenyi cheswe waze haatwila mbandu matwa mikuma.

⁵³ Chipwe Babilonia manyina ku malilu; chipwe makolesa ngwe mbonge ya mwilu, hindu yonwonyi munguyihuiumuna hali iye. Chocho kanambe Yehova.

⁵⁴ Halakanenu! Muteto wa ku Babilonia! Chizungozungo cha kwonwona chinene cha ku chifuchi cha Kaletea.

⁵⁵ Mumu Yehova kanenyeka Babilonia; kanaholesa liji lienyi lia tachi. Mikanya yo yinanumu ngwe meya anji lundunjila wa liji lio linahiohio,

⁵⁶ mumu chonwonyi hamuwana, mwe Babilonia; tujita twenyi Hanakwachika, mata jo kanamakwoka mumu Yehova iye Zambi wa kufwetesa. Pundu kumakafwetesa.

⁵⁷ Munguzengewesa alemu jenyi ni akwa mana jenyi, ni anguvulu jenyi, ni tupitau twenyi, ni tujita twenyi. Kumakapomba tulo twa mutolo nikulaula ka. Chocho kanambe mwe Mwanangana, jina lienyi Yehova-wa-Tujita.

⁵⁸ Yehova-wa-Tujita kanambe ngwenyi, Chipanga chinene cha mawe cha Babilonia kumakachipuzula ndo hashi; ni yikolo yenyi yisuku kumakayocha ni kahia. Mavungu kanahondangana mokomoko, minyachi yinalikatalisa ha kahia wika.

⁵⁹ Liji lize profeta Jeremia watumine Seraia mwana Neria, mwana Maseia muze wayile hamwe ni Zedekia mwanangana wa Yunda ku Babilonia ha mwaka wamuchiwana wa kuyula chenyi. Seraia aye wapwile kafufuchi.

⁶⁰ Jeremia wasonekene mu mukanda yuma yikalu yize yeswe muyiza ha Babilonia, te maliji wano eswe hanasoneka ha kutwala ku Babilonia.

⁶¹ Jeremia wambile kuli Seraia ngwenyi, Muze muheta ku Babilonia tanga wano maliji eswe,

⁶² ukambe ngwe, Yena Yehova hiwamba ha kutwala ku chifuchi chino ngwe, Munguchitetaho hanga nichimwe muchikatwamamo nawa, chipwe atu, chipwe tushitu, chikapwe cha hululu ndo ku miaka.

⁶³ Mba muze hiwamana kutanga mukanda uno, kashilako liwe ukaumbile he ha muchima Ufrateze

⁶⁴ ukambe ngwe, Chocho Babilonia muyikashimbama, ni kututukamo nawa ka, ha mukunda wa yikalu yize yeswe ngunayikokela. Ndo hano, e maliji a Jeremia.