Jeremia 50 - MUKANDA USANDU WA ZAMBI 1975

¹ Liji lize Yehova wambile ku kanwa lia profeta Jeremia ha kutwala ku Babilonia ni chifuchi cha A-Kaletea, ngwenyi,

² Amba ku mavungu nikukololoka; mika mbandeira nikukololoka; kanda uchisweka, amba ngwe, Babilonia hanayitambula, Mbele hanamukolesa sonyi, Merodach kanatatajala. Tuponya twenyi hanaakolesa sonyi, mahamba jenyi kanatatajala.

³ Mumu ku Norte hikwakatuka limwe vungu hilieza kulimika nenyi. Kumakenyeka chifuchi chenyi; niumwe masalamo. Ni atu ni tushitu machinamo.

⁴ Yehova kanambe ngwenyi, Ha matangwa aze ni ha mwaka uze A-Izalele ni A-Yunda meza hamuwika, nikulila shimbu machenda. Kumakafupa Yehova Zambi yo.

⁵ Makahula jila ya kuya ku Zaione ni meso jo a kutalikisako ngwo, Tatuyenu tulinunge ni Yehova ni usendo wa mutolo uze kechi kahasa kuvulama.

⁶ Atu jami te hanapu mapanga a kutoka. Tufunga two hanaahukisa, ni kwasongwela ha milundu. Hakatuka ku mulundu, haya ku mundundena; hanavulama limba lio.

⁷ Waze eswe haawana haalia, ni akwa kole jo hanambe ngwo, Etu kutushi mutonga, mumu hanavulumuna Yehova, kuma kwo kwamwenemwene kwa kutwama, mwe Yehova kutalatala wa tulamba two.

⁸ Chinenu hakachi ka Babilonia. Tuhukenu mu chifuchi cha A-Kaletea nukapwe ngwe kuji ja pembe kulutwe lia mbunga.

⁹ Mumu ngunavundula mbunga ya mavungu alemu a ku chifuchi cha ku Norte akalimike ni Babilonia. Kumakalilonga akase nenyi jita mba kwenako mamutambula. Mivu yo yapwa ngwe kajita kuwajama yoze kechi kuhiluka mokomoko.

¹⁰ Kaletea kumakamupupa ni waze eswe mamupupa mayuka. Chocho kanambe Yehova.

¹¹ Chipwe nunawahilila, chipwe nunalikwiza, enu akwa kupupa chihinga chami, chipwe nuli ni usolo ngwe chihwo cha chimbembe cha ngombe ha kelo, chipwe nwakuteta ngwe kuji ja tuvwalu,

¹² hindu noko mamukolesa sonyi liakulu; yoze wanusemene masauka. Kumakapwa kasula hakachi ka mavungu; kumakapwa puya yumu ni ya hululu.

¹³ Ha mukunda wa ufwatulo wa Yehova kechi kapwa nawa ni atu, alioze makapwa wamokomoko. Mweswe makapalika ku Babilonia makevwa lwaji, makasoza mumu ha mbandu jenyi jeswe.

¹⁴ Lilongenu kweswe kwa kujingilika kulimika ni Babilonia, enu eswe akwa kunana mata. Mwasenu, wezenu mivu, mumu iye hanavulumuna Yehova.

¹⁵ Kalumukenu kweswe kwa kumujingilika mumu halikunjika. Mbonge jenyi hijapuzuka, yipanga yenyi ya mawe hayinunguna. Che kufwetesa cha Yehova chenacho kashika ni yenu mufwetesenu. Lingenu kuli iye chize iye hanalingi.

¹⁶ Tetenu mu Babilonia chikuwa ni mukwa kuteta ni kwengo ha mwaka wa kucha. Ha mukunda wa katana ka mukwa kupinjisa mutu mweswe matalikisa kuli atu jenyi, mutu mweswe machinyina ku chifuchi chenyi.

¹⁷ Izalele kapwa ngwe panga wa kuhanga kuli ndumba. Hatangu mwanangana wa Asuria wamukumbile, mba haliapwila ku songo Nabukanezore mwanangana wa Babilonia hanapolota yifwaha yenyi.

¹⁸ Kashika Yehova-wa-Tujita, Zambi ya Izalele kanambe ngwenyi, Ngunakokela kastigu hali mwanangana wa Babilonia ni chifuchi chenyi chizechene ngwe nahanyine kastigu kuli mwanangana wa Asuria.

¹⁹ Munguhilwisa Izalele ku ulilo wenyi, mba kumakahia ha Karmela, ni mu Mbashane, ni kuzanga chenyi cheswe muchikayuka ha mindundena ya Eframe ni mu Ngiliate.

²⁰ Yehova kanambe ngwenyi, Ha matangwa aze ni ha mwaka uze makafupa uhenge mu Izalele alioze kechi kawana niumwe; makafupa shili mu Yunda, alioze kechi kawana niyimwe; mumu mungukonekena waze ngunahichika ngwe masalila.

²¹ Kandukenu nulimike ni chifuchi cha Merateme ni waze atwama mu Pekode. Shihenu, nukakuwise liakulu kunyima yo, nukalinge cheswe yami hinanutumina. Chocho kanambe Yehova.

²² Chizungozungo cha jita chili mu chifuchi, ni kwonwona chinene.

²³ Muhato wa hashi heswe hauteta ni kuumakuna Chichize! Babilonia hanalumuka chuma cha mwongo hakachi ka mavungu.

²⁴ Hinakutela kambwila ni yena Babilonia hiwafwamo, hindu kwachinyingikine. Akuwanyine, akukwachile mumu ha kulitachika ni Yehova.

²⁵ Yehova hanazulula chisweko cha yikungo yenyi, hanachizamo yikungo ya ufwatulo wenyi. Mumu Mwene Yehova-wa-Tujita kali ni milimo yimwe kulinga mu chifuchi cha A-Kaletea.

²⁶ Ku yifuchi yeswe, Swilenu kulimika nenyi; azululenu machila jenyi. Mulunjikenu ngwe milumba ya mbuto nukamwonwone liakulu; kanda kusala nichimwe cha iye.

²⁷ Shihenu kuji jenyi eswe a ngombe, akaye ku chishihilo. Lamba lio mumu tangwa lio liasula hiliaheta, lie tangwa lia kastigu yo.

²⁸ Halakanenu! Kanachina akombokele ku chifuchi cha Babilonia akambulule mu Zaione kukala cha Yehova Zambi yetu, ha kukala chize alingile ku tembele yenyi.

²⁹ Sanyikenu ngashi alimike ni Babilonia, waze eswe akunana uta. Muselekenu, niumwe kanda omboka. Mufwetesenu nikulita ni yitanga yenyi; lingenu kuli iye chize iye halinga; mumu hahamwisa Yehova, mwe Musandu wa Izalele.

³⁰ Kashika akweze jenyi mafwa ku malindalinda ja matapalo jenyi, ni maswalale jenyi eswe kumakaonwona ha tangwa lize. Chocho kanambe Yehova.

³¹ Mwene Yehova-wa-Tujita kanambe ngwenyi, Ena mukwa kulengumuka, kunalimika ni yena; mumu tangwa lie hiliaheta, we mwaka wa kukwaha kastigu ye.

³² Mukwa kulengumuka makatalinga, makalimbuka, ni mukwa kumuhindwisa wakuhi. Munguwika kahia mu yihunda yenyi; mukalalisa yize yeswe yinamujingiúka.

³³ Yehova-wa-Tujita kanambe ngwenyi, A-Izalele kanaapinjisa, ni A-Yunda hamwe no. Waze eswe aakwachile funge, hanaakakaminya; kasolo kwatusula.

³⁴ Alioze Mukwa-Kwakula tachi ali najo; jina lienyi Yehova-wa-Tujita. Kumakaahakwila hanga akahwimise hashi alioze akapinjise waze atwama mu Babilonia.

³⁵ Yehova kanambe ngwenyi, Eze katana hali A-Kaletea, ni hali waze atwama mu Babilonia, ni hali alemu jenyi, ni akwa mana jenyi!

³⁶ Eze katana hali tahi, akalumuke yihepuke! Eze katana hali tujita twenyi akanonge!

³⁷ Eze katana hali tuvwalu twenyi ni matemba jenyi, ni hali maswalale a ku yifuchi yeka waze ali no, hanga akalumuke ngwe mapwo! Eze katana ha upite wenyi akaupupe!

³⁸ Kwize changa ha njiji jenyi jikome jeswe. Mumu chifuchi chize chifuchi cha tuponya, hanazaluka ni mahamba jo.

³⁹ Kashika ngongo ni mikuza makatwama mu Babilonia, ni yikungulu matwamamo; kechi kapwa ni atu nawa, niumwe matwamamo nawa ndusu yisemuko yeswe.

⁴⁰ Chizechene ngwe muze Zambi wanungwine Sondome ni Ngomora, ni yihunda ya kuyijingilika, chocho niumwe mutu matungamo, niumwe mwana mutu matwamamo njize. Chocho kanambe Yehova.

⁴¹ Talenu limwe vungu kulinakatuka ku Norte; atu a tachi ni mianangana anji kanalisungu ku masongo a hashi.

⁴² Kanakwata ku uta ni kunga; yiswi keshi keke. Chizungozungo cho chapwa ngwe lundunjila wa kalunga-lwiji. Kanende hali tuvwalu; kanazala ngwe mutu yoze unayi ku jita kulimika ni yena, mwana-pwo Babilonia.

⁴³ Mwanangana wa Babilonia wevwile lufuma wo mba moko jenyi ahongele ni upekepeke. Kulifwita chamukwachile; yikola ngwe ya pwo ha kufumbajala.

⁴⁴ Chizechene ngwe ndumba makatuka ku mushitu wa Yordau kulimika ni limba lia tachi lia mapanga chocho ni yami susumuku mungwahuma kuli iye; mba mungusela kumuyula mweswawo ngunazange. Mumu iya walifwa ni yami? Iya mangusanyika? Kafunga muka mahasa kumana kumeso jami?

⁴⁵ Kashika ivwenu chize Yehova halulika cha kulimika ni Babilonia, ni yiyulo yize hakolesa ya kulimika ni chifuchi cha A-Kaletea ngwenyi, Chipwe ana-mapanga akepe a ku chendo maambulumuna. Pundu, tanga lio lieswe mulikevwa lwaji mumu ha kufwa cho.

⁴⁶ Ha Chizungozungo cha kufwa cha Babilonia hashi muhanyika, ni liji lia muteto wenyi malivwa hakachi ka mavungu.