Jeremia 5 - MUKANDA USANDU WA ZAMBI 1975

¹ Zomboka mu matapalo ja Yerusaleme sali ni sali. Tala kanawa uzewule. Fupa mu malindalinda jenyi nyi muhasa kuwana lunga umuwika, yoze wakulinga chize chinalite, kakufupa umwenemwene; hanga ngukonekene chihunda.

² Chipwe akwamba ngwo, Ni mwono wa Yehova, hindu hanalishingi ni mahuza.

³ Yehova, ngwami, meso je kakufupa umwenemwene. Hiwaalamba, alioze kevwile kupiha. Hiwaonwona, alioze kasolo kutambula lufumbo. Hakalisa meso jo kuhiana yimawe. Kasolo kulikonyeka.

⁴ Yingwamba ngwami, Wano yiswale wika, keshi mana, mumu kanyingikine jila ya Yehova, shimbi ya Zambi yo.

⁵ Munguya kuli anene, munguhanjika no, mumu o kananyingika jila ya Yehova, shimbi ya Zambi yo. Alioze eswe hanamakuna kanga chimuwika, eswe te hanapulu mihipu.

⁶ Kashika ndumba wa ku musenge kumukaashiha; kangunga wa ku puya makaonwona. Changwi kanajikinyina ku yihunda yo, mweswawo matuhukamo mamupapulula; mumu milonga yo yinji, ni chize hanehuka Zambi chahiana.

⁷ Kuchi munguhasa kunukonekena? Ana jenu hanangwehuka, hanalishingi ni waze hi mazambi ko. Muze naalishile kanawa, alingile utanji, ni kakuya mu yendo ku mazuwo ja yikoi.

⁸ Apwile ngwe kuji a tuvwalu waze alia kanawa, mweswe kanatambika kuli pwo lia mukwo.

⁹ Yehova kanambe ngwenyi, Te chichi kwalamba mumu ha yino yuma? Chichi kukala milonga ha vungu limwe liapwa ngwe lino nyi?

¹⁰ Palika ndusu mu mikala ya miuva ukonwone, alioze kanda umanununa liakulu. Tetaho mitango, mumu kuyapwile ya Yehova.

¹¹ Mumu Yehova kanambe ngwenyi, Munyachi wa Izalele nimunyachi wa Yunda hapwa ni mafwefwe kuli yami pundu.

¹² Hanahanjikila mahuza Yehova ngwo, Kechi kulinga nichimwe; chipi nichimwe kuchichi kutuwana; chipwe katana, chipwe kapunga, kutuchi kuyimona.

¹³ Aprofeta malumuka ngwe fuji; lie liji kulishimo muli ayo. Chocho muchipwa kuli ayo.

¹⁴ Kashika Yehova, Zambi-ya-Tujita kanambe ngwenyi, Mumu o hanambe liji lino ami ngunapwisa maliji jami kahia mu kanwa lie, ni wano atu mapwa kunyi, ni kahia kumukaanongesa.

¹⁵ Yehova kanambe ngwenyi, Enu munyachi wa Izalele, ngunanukokela limwe vungu lia kusuku. Vungu lize Hapwa Ha kulinduluka, Hapwa Ha ku shakulu. Vungu limwe kunwanyingikine limi lio, ni chize mamba kuchichi kunulumbunuka.

¹⁶ Chindalo cho cha mivu chapwa ngwe fuka lia washi o eswe akwa ndundo.

¹⁷ Kumakalia yize hinwacha ni kulia chenu; kumakalia ana jenu a malunga ni a mapwo. Kumakalia mapanga jenu ni ngombe jenu; kumakalia mitondo yenu ya uva ni ya makuyu. Kumakaonwona ni katana yihunda yenu ya kukolesa yize nunafuliela.

¹⁸ Hindu Yehova kanambe ngwenyi, Chipwe ha matangwa aze, chichi kunumanu nuna lu.

¹⁹ Mba muze atu jenu mamba ngwo, Kuchi te Yehova Zambi yetu hatulinga yino yuma yeswe? Ena muwamba kuli ayo ngwe, Chizechene ngwe yenu hinwangwehuka, hinwalingila mazambi a yilambala mu chifuchi chenu, chochene munukalingila yilambala mu chifuchi hi ni chenu ko.

²⁰ Ambulula chino ku munyachi wa Yakomba amba mu Yunda ngwe,

²¹ Ivwenu chino enu vungu lia yelo ni yizuzuke, nuli ni meso alioze kunwamwene, nuli ni matwi alioze kunwevwile.

²² Yehova kanambe ngwenyi, Kunwanguvwilile woma nyi? Kunwachikimine kumeso jami nyi? Nasele masekeseke akapwe njiza ya kalunga-lwiji, chikwiko cha miaka yeswe kahashile kupalika. Chipwe mikanya muyilifwita hindu kuyahashile kukumba, chipwe muyichungula hindu kuyichi kupalika helu.

²³ Alioze akwa vungu lino kali ni mbunge ja pami ni kukolema. Hanapianguka, hanayi kusuku.

²⁴ Kambile mu mbunge jo ngwo, Tuvwilenu woma Yehova Zambi yetu, yoze wakutwaha vula ha kangonde kenyi, vula wa samakwasa ni vula musazu, ni kakutufungila semana ja kufunjika ja kucha.

²⁵ Uhenge wenu hiunahumu yino yuma, ni milonga yenu hiyinanumina yuma yipema.

²⁶ Mumu yingulungulu hwali hakachi ka atu jami. Kakuswama ngwe akwa kujikinyina tujila. Kakuta miheto; kakukwata atu.

²⁷ Mazuwo jo hazala ni mafwefwe ngwe mutonga wa tujila, kashika hapwa alemu pichi.

²⁸ Hatoha, hasenena. Keshi ni haze mapwisa ha kulinga ungulungulu; Kapatwile ni kulita chikuma cha ana-shiwa chikawahe; keshi kufunga chize chinalite kuli yiswale.

²⁹ Kashika Yehova kanambe ngwenyi, Te chichi kwalamba mumu ha yino yuma? Chichi kukala milonga ha vungu limwe Hapwa ngwe lino nyi?

³⁰ Chimwe chuma cha mwongo, cha lwaji, hichapwa mu chifuchi.

³¹ Aprofeta kanaprofeteza mahuza, ni asasendote kanayulu nikulita ni liji lio. Atu jami kanazange chikolo chikapwe chocho, alioze chika munulinga muze songo mulikeza?