Jeremia 49 - MUKANDA USANDU WA ZAMBI 1975

¹ Ha kutwala kuli A-Amone. Yehova kanambe ngwenyi, Izalele te keshi ni ana a malunga? Swana keshi nenyi niumwe? Nyi chocho kuchi te Milikome hasalakana Ngate, ni atu jenyi hatwama mu yihunda yako?

² Kashika Yehova kanambe ngwenyi, Matangwa kaneza muze munguneha mutambi wa jita mu matwi, wa kulimika ni Raba ya A-Amone. Muyalumuka mulumba wa hululu, ni tuyihunda twako matwocha ni kahia, mba henaho Izalele makasalakana waze amusalakanyine. Chocho kanambe Yehova.

³ Ena Heshebone, lila mbimbi, mumu Ayi hayenyeka! Litetwokenu, enu mapwo a ku Raba! Zalenu yikeleyi, lishimwoke, ni kulihiza hakachi ka yiputa! Mumu Milikome makaya ku unjize hamwe ni asasendote jenyi ni alemu jenyi.

⁴ Ena pwo wa mafwefwe kuchi te wakulisamba ni yikulo ye? Ena wafulielele upite we ngwe, Iya malimika ni yami?

⁵ Mwene Yehova-wa-Tujita kanambe ngwenyi, Mungukukokela mwongo kuli waze eswe anakujingilika. Kumakanuhuma, mutu mweswe fwapu kumeso jenyi, mba kukuchi kapwa mutu makakungulula akwa kuchina.

⁶ Alioze kulutwe munguhilwisa nawa kuwaha cha A-Amone; chocho kanambe Yehova.

⁷ Ha kutwala kuli Endome Yehova-wa-Tujita kanambe ngwenyi, Mana hahwa mu Temane? Yiyulo hiyajimuka kuli yikanyame? Mana jo hachina?

⁸ Chinenu, hilukenu, twamenu mu yiswamo yenu, enu akwa Ndetane. Mumu mungukokela hali iye kuji-ni-tomo lia Esau muze mungumwaha kastigu.

⁹ Nyi akwa kuhela uva meza kuli yenu te kechi kuhichika masalila? Nyi eji meza ha ufuku, ngwami, Meya chize mahasa kuzuka ene.

¹⁰ Alioze yami hinazula Esau liakulu. Hinafukula yiswamo yenyi, kahashile kuswama nawa. Ana jenyi hanonga, ni ana-akwo ni ayayo, ni enyembo jenyi, ni mwene nawa hahwako.

¹¹ Hichikenu ana jenu ashiwa, yami mungwafunga, tuliwa jenu angufuliele yami.

¹² Mumu Yehova kanambe ngwenyi, Nyi waze musenge uno kuwaatele chaatamba kuunwa, enu te munuya ni kastigu ka? Kunuchi kuya ni kastigu ka. Chanutamba kunwa.

¹³ Mumu yami Yehova hinalishinga ni yami mwene, ngwami, Mbozera malumuka chuma cha mwongo, kanda luchoko, kanda puya, kanda shingo, ni yihunda yako yeswe muyipwa puya ya mutolo.

¹⁴ Hinevwa lusango kuli Yehova; kanganda hamutuma hakachi ka mavungu ngwo, Swilenu nulimike nenyi; katukenu nukase jita!

¹⁵ Mumu mungukupwisa mukepe hakachi ka mavungu, akakusaule kuli atu.

¹⁶ Mwongo uze nwakunehena akwo hiwanwonga hamwe ni kulengumuka cha mbunge jenu; enu nwatwama mu yivwenge ya mawe, nwazuka kwe ku mbulwa mulundu. Yehova kanambe ngwenyi, Chipwe mukasa walo we kwilu ngwe wa pupa, hindu mungukuchizako.

¹⁷ Endome malumuka chuma cha mwongo. Mweswawo mapalikilako mevwa mwongo mba mayunga mumu ha huli liako lieswe.

¹⁸ Chizechene ngwe muze hanunguna Sondome ni Ngomora ni yihunda ya kujingilika niumwe matungako, niumwe matwamako njize, chocho kanambe Yehova.

¹⁹ Chizechene ngwe ndumba makatuka ku mushitu wa Yordau kulimika ni limba lia tachi lia mapanga chocho ni yami susumuku mungwahuma kuli iye, mba mungusela kumuyula mweswawo ngunazange yami. Mumu iya walifwa ni yami? Iya mangusanyika? Kafunga muka mahasa kumana kumeso jami?

²⁰ Kashika ivwenu chize Yehova halulika cha kulimika ni Endome, ni yiyulo yize hakolesa ya kulimika ni akwa Temane ngwenyi, Chipwe ana-mapanga akepe a ku chendo maambulumuna. Pundu, tanga lio lieswe mulikevwa lwaji mumu ha kufwa cho.

²¹ Ha Chizungozungo cha kufwa cho hashi muhanyika, ni liji lia muteto wo malivwa ndo ku Kalunga-lwiji Muchila.

²² Talenu umwe makatuka, mahumuka fuji ngwe pupa, nikutanda mapulwa jenyi kulimika ni Mbozera, mba mbunge ja tujita a ku Endome ha tangwa lize mapwa ngwe mbunge ya pwo ha kufumbajala.

²³ Ha kutwala ku Ndamaseku ngwo, Hamate ni Arpade kanatatajala, mumu hanevu lusango mupi. Kanasangunuka ni woma, kanapinji ngwe kalunga-lwiji yoze kahashile kuhwima.

²⁴ Ndamaseku hahonga, halumuka akachine mumu mwongo hiwamukwata. Kulifwita ni kulinyenga chamukwata ngwe pwo ha kufumbajala.

²⁵ Chihunda cha lufuma hachehuka Chichize, che chihunda cha uwahililo!

²⁶ Kashika akweze jenyi makalimbuka ha malindalinda ja matapalo jenyi, ni maswalale jenyi eswe makanonga ha tangwa lize. Chocho kanambe Yehova-wa-Tujita.

²⁷ Mungukawika kahia mu chipanga cha Ndamaseku; makalalisa mazuwo ja Mbene-Hadade.

²⁸ Ha kutwala ku Keta ni mawanangana a Hazore aze Nabukanezore mwanangana wa Babilonia walambile, ngwo, Yehova kanambe ngwenyi, Katukenu, senyenu kulimika ni Keta! Onwonenu akwa Chivumbuko!

²⁹ Mapunda mbalaka jo ni yimuna jo, ni kurtina jo ni yikumba yo yeswe. Tumelu two maatambula, ni malunga matambika kuli ayo ngwo, Mwongo sali ni sali!

³⁰ Yehova kanambe ngwenyi, Chinenu, endanganenu kusuku, twamenu mu yiswamo enu akwa Hazore. Mumu Nabukanezore mwanangana wa Babilonia hanalulika chuma cha kulimika ni yenu hanakolesa chiyulo cha kulimika ni yenu.

³¹ Yehova kanambe ngwenyi, Katukenu, senyenu kulimika ni akwa vungu limwe akutwama ni kuhwima ni chipi chakuhi. Keshi ni mapito chipwe njalo; kanatwama ukawo.

³² Tumelu two makapwa a kupupa yimuna jo makapwa upite wa jita. Yehova kanambe ngwenyi, Mungukamwangina ku mafuji eswe waze kakuteta masongo ja kambu jo. Mungukakokela kuli ayo kuji-ni-tomo kweswe kwa kwajingilika.

³³ Hazore muyikalumuka wendelo wa mikuza kanda puya ya mutolo. Niumwe matungako, niumwe matwamako njize.

³⁴ Liji lia Yehova lize liejile kuli profeta Jeremia, ha kutwala kuli A-Elame, ha kuputuka kuyula Zedekia mwanangana wa Yunda.

³⁵ Yehova-wa-Tujita kanambe ngwenyi, Mungukamakuna uta wa Elame, we ujikijilo wa ngolo jo.

³⁶ Mungukokela hali A-Elame mafuji awana a ku mbango jiwana ja malilu, mba mungwamwangina ku mafuji aze eswe. Kukuchi kapwa limwe vungu kuze A-Elame a kuhanga kechi kachinyinako.

³⁷ A-Elame mungukaakolesa mwongo kumeso ja akwa kole jo ni kumeso ja waze anafupu kwashiha. Yehova kanambe ngwenyi, Mungukaakokela chuma chikalu, utenu wami usasu. Mungukatuma katana kami kwakaula ndo hinaanongesa,

³⁸ mba mungukakolesa ngunja yami mu Elame ngukanongese mwanangana wo ni alemu jo. Chocho kanambe Yehova.

³⁹ Hindu ha matangwa a kusula mungukahilwisa kuwaha cha Elame. Chocho kanambe Yehova.