Jeremia 48 - MUKANDA USANDU WA ZAMBI 1975

¹ Ha kutwala kuli A-Moape. Yehova-wa-Tujita, Zambi ya Izalele kanambe ngwenyi, Lamba lia Nebo mumu hanenyekako! Kiriataime hanayikolesa sonyi, hanayitambula; mbongo yako hanayikolesa sonyi; hanayipuzula,

² lufuma wa Moape hajimuka. Ku Heshebone atakile yipi ya kulimika nenyi ngwo, Tuyenu tukaateteko, alitwamine kupwa vungu nawa. Alioze yena nawa chizaluke kumakakuholesa; katana kumakakukaula.

³ Ivwenu muteto ku Horonaime, kwenyeka ni kwonwona chinene!

⁴ Moape hanakuwu, muteto kanawivu ndo ku Zoare.

⁵ Mumu ku ukandukilo wa Luhite kanakanduka nikulila, ni ku upalumukino wa Horonaime hanevu muteto wa kunongesa.

⁶ Chinenu! Lilamwinenu! Pwenu ngwe chimbulu wa mu puya!

⁷ Mumu ha kufuliela yitanga yenu ni upite wenu kashika ni yenu nawa manukwata, ni Chemoshe maya ku unjize hamwe hi asasendote jenyi ni alemu jenyi.

⁸ Chonwonyi meza ku chihunda cheswe, nichimwe chihunda muchililamwina. Mungulunga muujimuka, chana machonwona, chizechene ngwe Yehova hanambe.

⁹ Hanenu mapulwa kuli Moape akahumuke akaye. Yihunda yenyi muyipwa ya kwenyeka niumwe kechi katwamamo.

¹⁰ Ashingiwe mweswawo malinga milimo ya Yehova ni lwelia; ashingiwe mweswawo makwika katana kenyi kumwanga manyinga.

¹¹ Moape hahwima chize ku ukweze wenyi mba kenguluka ngwe vinyu. Kamutehwine ku chikwachilo ni chikwachilo chipwe kuya ku unjize. Kashika kuyema chenyi kali nacho ni haliapwila ni lupembo wenyi kalumukine.

¹² Kashika Yehova kanambe ngwenyi, Matangwa meza muze mungutuma kuli iye akwa kutehuna, mba mamutehuna, nikupukumuna yikwachilo yenyi, nikupalwola milondo yenyi yipalupalu.

¹³ Henaho Moape mavwila sonyi Chemoshe ngwe munyachi wa Izalele avwilile sonyi Mbetele, we Ufulielo wo.

¹⁴ Kuchi nwakwamba ngwenu, Tuli akwa kukumba tuli tujita a ndundo?

¹⁵ Mwe Mwanangana jina lienyi Yehova-wa-Tujita kanambe ngwenyi, Mukwa kwonwona Moape ni yihunda yako haneza mba akweze jenyi ahiana kupema hanayi ku chishihilo.

¹⁶ Kuji-ni-tomo lia Moape lili hakamwihi; kulifwita chenyi chineza fuji.

¹⁷ Mutwilenu mikuma, yenu eswe nunamujingilika; enu eswe nunanyingika jina lienyi. Ambenu ngwenu, Lukanda wa ngolo hiwamakuka Chichize, mwe lukanda wa uhenya.

¹⁸ Ena watwama mu Ndibone! Katuka ku uhenya we, ukatwame ha mavu a chau! Mumu mukwa kwonwona Moape haneza kulimika ni yena; hanonwona yihunda ye ya tachi.

¹⁹ Ena watwama mu Aroere! Mana ku kulwa jila utale. Hula kuli mukwa kuchina hanji kuli mukwa kwomboka ngwe, Kuchi chapwa?

²⁰ Moape hamukolesa sonyi mumu hamumakuna. Lilenu mbimbi! Litetwokenu! Nuchambujole ku sesa lia Arnone ngwenu, Moape hanenyeka.

²¹ Upatwilo hiweza ha chana, ha Holone, ni Yahaze, ni Mefata,

²² ni Ndibone, ni Nebo, ni Mbete-Ndiblatame,

²³ ni Kiriataime, ni Mbete-Ngamule, ni Mbete-Meone,

²⁴ ni Keriote, ni Mbozera ni yihunda yeswe ya chifuchi cha Moape kusuku ni kukamwihi.

²⁵ Lumbinga wa Moape hanamupatula; kwoko lienyi hiliamakuka. Chocho kanambe Yehova.

²⁶ Muzengewese mumu walifujile kulimika ni Yehova, kashika Moape makalifwita mu yisaza yenyi, mba iye nawa mamuyunga.

²⁷ Te kunwayungile Izalele! Te nwamuwanyine hakachi ka eji, kashika heswaho mamutongola nwahungile mitwe yenu, nyi?

²⁸ Katukenu ku yihunda yenu nukatwame mu luliwe, enu nwatwama ku Moape. Pwenu ngwe katele yoze wakusa chaswa chenyi mu malumbu ja ku unjililo wa chivwenge.

²⁹ Hitwevwa lufuma wa kulengumuka cha Moape— walengumuka chikolo— ni kulifuza chenyi, ni kulengumuka chenyi, ni kulizata chenyi, ni kulizelula cha mbunge yenyi.

³⁰ Yehova kanambe ngwenyi, Ngunanyingika shino lienyi; kulisamba chenyi, cha mahuza, ni yitanga yenyi ya mahuza.

³¹ Kashika ngunalilila Moape; ngunatetwoka hali A-Moape eswe; ngunalishimwoka hali malunga ja Kiri-Haresete.

³² Ena mutondo wa uva wa Sibima, ngunakulilila kuhiana Yazere. Mitango ye yahianyine kalunga-lwiji ni kuheta ndo ku Yazere. Mwe chonwonyi hapunda mihuko ye ya lwiza ni vinyu ye.

³³ Chiseke ni uwahililo hayichiza ku chifuchi cha Moape cha mihuko. Hinasulisa vinyu ku ukamino; niumwe mauliachila ni kukololoka cha uwahililo. Kukololoka chacho hi cha uwahililo ko.

³⁴ Heshebone ni Eleale kanatete; ndo ku Yahaze anatete ni liji lio; chize ku Zoare ndo ku Horonaime ni Eglata-Shelishia. Mumu ku meya ja Nimerime kunalumuka kwa hululu.

³⁵ Yehova kanambe ngwenyi, Mu Moape mungusulisa yoze wakulambula yitapo ha nangamo ni kwocha insensu ku zambi yenyi.

³⁶ Kashika mbunge yami kuyinatu mikuma hali Moape ngwe lundembo. Mbunge yami kuyinatu mikuma ngwe lundembo hali malunga a Kiri-Haresete; kashika upite uze weswe hapita hiwakuwa.

³⁷ Mutwe weswe hiwapwa wa kawewe ni wevu weswe hanautewula. Ha moko eswe hali mbandu, ni ha mijimba yeswe yikeleyi.

³⁸ Ha mafulumba ja mazuwo eswe mu Moape, ni ku malindalinda ja matapalo kukushi nichimwe shina kulishimwoka wika, mumu hinashiha Moape ngwe mulondo umwe kausele mbunge niumwe; chocho kanambe Yehova.

³⁹ Hiwafwa Chichize! Mbimbi yipwa haha! Chize Moape homba nyima ni sonyi! Chocho Moape hanalumuka luchoko ni chuma cha mwongo kuli atu eswe waze anamujingilika.

⁴⁰ Mumu Yehova kanambe ngwenyi, Umwe mahumuka fuji ngwe pupa ni kutanda mapulwa jenyi kulimika ni Moape.

⁴¹ Yihunda mayitambula ni mbonge majikumba. Mbunge ja tujita a Moape ha tangwa lize mujipwa ngwe mbunge ya pwo ha kufumbajala.

⁴² Moape makanonga; kechi kapwa nawa vungu, mumu ha kulifuza ni Yehova.

⁴³ Yehova kanambe ngwenyi, Enu atu a mu Moape, mwongo, ni mawumbu, ni makambwila wika yili kulutwe lie.

⁴⁴ Yoze machina mwongo malimbuka mu wumbu; ni yoze makatuka mu wumbu mafwa mu kambwila. Mumu mungukoka yuma yino yeswe hali Moape ha mwaka wa kastigu yo. Chocho kanambe Yehova.

⁴⁵ Mu Chizulie cha Heshebone akwa kuchina kakumana, tachi jakuhi, mumu kahia hikanatuhuka mu Heshebone, mulengi unatuhuka mu munyachi wa Sahone. Hiwalia wa ku lumbu lia Moape ni ku mbanda-mutwe wa akwa Chizungozungo.

⁴⁶ Lamba lie Moape! Atu ja Chemoshe hijaakangana. Mumu ana jenu a malunga haakwata funge, ni ana jenu a mapwo hanayi mu ufunge.

⁴⁷ Hindu munguhilwisa nawa kuwaha cha Moape ha matangwa a kusula. Chocho kanambe Yehova. Ndo hano, we upatwilo wa Moape.