Jeremia 47 - MUKANDA USANDU WA ZAMBI 1975

¹ Liji lia Yehova lize liejile kuli profeta Jeremia ha kutwala kuli A-Filistea shimbu te Falau kanda achilamba Ngeza, lino.

² Yehova kanambe ngwenyi, Talenu meya kanakatuka ku Norte mba kumakapwa muhwiji wa kusupwoka. Kumakafuka chifuchi ni yize yeswe yilimo ni chihunda ni waze eswe atwamamo. Malunga makateta, ni akwa chifuchi eswe makalila mbimbi.

³ Atato kechi katala kunyima kuli ana jo, mumu ha upekepeke wa moko jo; ha mukunda wa lundunjila wa sende ja tuvwalu twenyi ha kulundumuka cha matemba jenyi ni chinumo cha maroda jo;

⁴ mumu ha tangwa lize lineza lia kwonwona A-Filistea eswe, kuteta ku Teru ni Sendone yikwashi waze eswe asala. Mumu Yehova kanonwona A-Filistea, ni e masalila a ku mbaka ya Kafetore.

⁵ Ngeza hapwa ni lwole, Asekalone hanonga. Enu masalila ja A-Anake, ndo mwiji muka munulitetateta?

⁶ Ena katana wa Yehova, ndo shimbu lika mukahola? Njila mu chindalo che! Hwima; kanda ulisunga!

⁷ Kuchi mahasa kuhola muze Yehova hamutuma? Hanamutongola kulimika ni Asekalone ni ye mbaka.