Jeremia 46 - MUKANDA USANDU WA ZAMBI 1975

¹ Liji lia Yehova lize liejile kuli Jeremia ha kutwala ku mavungu.

² Ha kutwala ku Engitu. Liji lia tujita twa Falau-Neko, mwanangana wa Engitu, aze apwile ku lwiji Ufrateze ku Karkemishi, aze Nabukanezore mwanangana wa Babilonia wakumbile ha mwaka wamuchiwana wa Jehoakime mwana Josia mwanangana wa Yunda ngwenyi,

³ Lulikenu lukepwe munene ni mukepe nukaye ku jita!

⁴ Senu yikapa hali tuvwalu; nyinenuho enu akwa tuvwalu! Manyinenu kuma kwenu ni ngalau; pemesenu makunga; zalenu yikuto ya yikungo!

⁵ Kuchi te nachimona? Hevwa mwongo, hahilukila kunyima. Tujita two halambama, hachina fuji. Katalile kunyima— mwongo sali ni sali! Chocho kanambe Yehova.

⁶ Akwa tambu kahashile kuchina; tujita kahashile kwomboka. Ku Norte, kwe ku lwiji Ufrateze hatalinga, halimbuka.

⁷ Yono iya kanafutunuka ngwe Nilo, ngwe njiji jize meya jajo kanafuluka?

⁸ Engitu kanafutunuka ngwe Nilo ngwe njiji jize meya jajo kanafuluka. Wambile ngwenyi, Mungufutunuka, mungufuka hashi, mungwonwona yihunda ni atu jamo.

⁹ Senyenu, tuvwalu! Tenukenu, matemba! Tujita atuhuke malunga ja Etiopia ni Pute waze akukwata lukepwe, malunga ja Lutu waze ajama ni uta wa chinjamina.

¹⁰ Tangwa lize, tangwa lia Mwene Yehova-wa-Tujita, tangwa lia kukala milonga; akakale milonga hali akwa kole jenyi. Katana makonwona ndo kukuta; makanwa ni kukuta ni manyinga jo. Mumu Mwene Yehova-wa-Tujita kanalingi yitapo mu chifuchi cha ku Norte, kwe ku lwiji Ufrateze.

¹¹ Yako ku Ngiliate Ukande yitumbo, yena *virgem Engitu! Wasapangana ni yitumbo yinji yeswe yamokomoko; kuwuka chakuhi kuli yena.

¹² Mavungu hanevu lufuma wa sonyi je; hashi hatakana ni muteto we. Mumu kajita hatalinga hali kajita ni mukwo, mba halimbukila hamuwika.

¹³ Liji Yehova wambile kuli profeta Jeremia ha kutwala ku kwiza cha Nabukanezore mwanangana wa Babilonia akalambe chifuchi cha Engitu, ngwenyi,

¹⁴ Amba mu Engitu, tambika mu Mingondole; tambika mu Nofe ni mu Tafane; Amba ngwe, Manenu kanawa nulilulike, mumu katana makakuwisa kweswe kwa kunujingilika. Apise, kuchi te hachina?

¹⁵ Kuji yenu ya ngombe, kuchi te kamanyine? Mumu Yehova wamunungwine.

¹⁶ Chihuji chenu chatalingile, chalimbukile. Yamba umwe kuli mukwo ni mukwo ngwo, Katuka tuye nawa kuli atu jetu kwe ku chifuchi cha kusemuka chetu, mumu ha katana ka mukwa kupinjisa.

¹⁷ Yateta ku kuze ngwo, Falau mwanangana wa Engitu mukwa zungo liamokomoko yoze wahianyine ha mwaka wa kufunjika.

¹⁸ Mwe Mwanangana jina lienyi Yehova-wa-Tujita kanambe ngwenyi, Ni mwono wami, chizechene ngwe Tabore hakachi ka milundu, ngwe Karmela ku kalunga-lwiji chocho meza.

¹⁹ Lulikenu yikashi yenu nuye ku unjize enu akwa Engitu. Mumu Nofe muyalumuka ya hululu, muyipuzuka ni atu kechi katwamamo.

²⁰ Engitu kapwa ngwe chimbembe mupema wa ngombe, alioze umwe chikefwe wa ku Norte hamuwana.

²¹ Chipwe maswalale jenyi a kufweta hakachi ka iye kapwa ngwe ana a ngombe a maji; ewa, eswe hanalumuka ni kuchina hamuwika; kamanyine. Mumu tangwa lio lia kuji-ni-tomo hiliaawana, mwaka wa kastigu yo.

²² Kakulinga zungo ngwe lia kapela muze machina, mumu akwa kole jenyi kanende anji, nikulimika nenyi ni njimbu ngwe akwa kupakula mitondo.

²³ Yehova kanambe ngwenyi, Kumakapakula usaki wenyi, chipwe wajika chocho mutu kahashile kupalika mumu koka kuhiana makumbi, mutu kechi kuhasa kwaalula.

²⁴ Mwana-pwo Engitu mamukolesa sonyi, mamukunjika ku vungu lia ku Norte.

²⁵ Yehova-wa-Tujita, Zambi ya Izalele wambile ngwenyi, Ngunakoko kastigu hali Amone wa ku No, ni Falau, ni Engitu ni mazambi jako ni mianangana jako, ni hali Falau ni waze anamufuliela.

²⁶ Mungwakunjika kuli waze anafupu kwashiha, kuli Nabukanezore mwanangana wa Babilonia ni tupitau twenyi. Kulutwe Engitu makapwa ni atu chizechene ngwe ha matangwa a ku shakulu. Chocho kanambe Yehova.

²⁷ Alioze yena kavumbi kami Yakomba kanda wivwa woma; yena Izalele, kanda utatajala, mumu mungunulamwina kusuku, waze makasemuka kuli yena mungwalamwina ku yifuchi ya ufunge wo. Yakomba kumakahiluka; kumakawana kuhola ni uhwimino, niumwe mamukolesa woma wakuhi.

²⁸ Yehova kanambe ngwenyi, Yena kavumbi kami Yakomba kanda wivwa woma, mumu yami hamuwika ni yena nguli. Mungumanununa wupu mavungu aze eswe kuze hinanuhumina, alioze yenu chichi kunumanununa liakulu. Mungunufumba ni kulita. Chichi kunuhichika chizechene ni kastigu yakuhi.