Jeremia 45 - MUKANDA USANDU WA ZAMBI 1975

¹ Liji lia profeta Jeremia kuli Baruke mwana Neria ha kusoneka maliji ano mu mukanda shimbu Jeremia mamusonekesa ha mwaka wamuchiwana wa Jehoakime mwana Josia mwanangana wa Yunda ngwenyi,

² Yehova Zambi ya Izalele kanambe kuli yena Baruke ngwenyi,

³ Yena wambile ngwe, Lamba liami! Mumu Yehova haweza chinyengo ku yikola yami. Yikatalo ngunevu ha kutwa mikuma. Chawanyine uhwimino.

⁴ Amba kuli iye ngwe, Yehova kanambe ngwenyi, Ngunapuzula chize natungile; ngunatukula chize natumbile—ngwami, Chifuchi cheswe.

⁵ Mba yena unalifupila yuma yilemu yena mwene nyi? Kanda uyifupa, mumu Yehova kanambe ngwenyi, Mungukoka yuma yikalu hali atu eswe, hindu mungukwaha mwono we ngwe upite wa jita kweswako muoya.