Jeremia 44 - MUKANDA USANDU WA ZAMBI 1975

¹ Liji liejile kuli Jeremia ha kutwala kuli A-Yunda eswe waze atwamine mu chifuchi cha Engitu, mu Mingondole, ni Tafane, ni Nofe, ni mu chifuchi cha Patarose, lino:

² Yehova-wa-Tujita, Zambi ya Izalele kanambe ngwenyi, Hinwamona yikalu yeswe nakokele ha Yerusaleme ni ha yihunda yeswe ya Yunda. Musono hiyapwa ya hululu; niumwe keshimo wakuhi,

³ mumu ha ungulungulu uze alingile nikungwihia ngutenuke, ha kuya nikwocha insensu ni kulingila mazambi eka aze kaanyingikine, chipwe o, chipwe yenu, chipwe tulamba twenu.

⁴ Hindu natuminetumine kuli yenu tuvumbi twami eswe aprofeta ngwami, Kanda nulinga chuma chino cha kuzelwokesa cha kunguvwisa lwaji.

⁵ Alioze kapanjikile chipwe kutela matwi akakatuke ku ungulungulu wo, akalitwamine kwochela insensu mazambi eka.

⁶ Kashika ufwatulo wami ni utenu wami hinauzukula ni kuusambiza mu yihunda ya Yunda ni mu matapalo ja Yerusaleme. Ayo hiyalumuka yamokomoko ni ya hululu ndo tangwa lia musono.

⁷ Haliapwila Yehova Zambi-ya-Tujita, mwe Zambi ya Izalele kanambe ngwenyi, Kuchi te nunalingi chuma chino chipi chikolo cha kulimika ni yenwene, nukatete hakachi ka A-Yunda malunga, ni mapwo, ni kemba, ni mwana, ni masalila akuhi?

⁸ Kuchi te nwakungwihia ni yitanga ya moko jenu ni kwochela insensu mazambi eka muno mu chifuchi cha Engitu hinweza kutwama? Ngukanutete, nukalumuke shingo ni luchoko hakachi ka mavungu eswe a hashi?

⁹ Hinwavulama ungulungulu wa tulamba twenu, ni ungulungulu wa mianangana ja A-Yunda, ni ungulungulu wa mapwo jo, ni ungulungulu wa yenwene, ni ungulungulu wa mapwo jenu, uze alingile mu chifuchi cha Yunda ni mu matapalo ja Yerusaleme?

¹⁰ Kalikehesele ndo ku tangwa lino lia musono, chipwe kwivwa woma, chipwe kwenda nikulita ni shimbi jami hanji yiyulo yami yize nasele kumeso jenu ni kumeso ja tulamba twenu.

¹¹ Kashika Yehova-wa-Tujita, Zambi ya Izalele kanambe ngwenyi, Mungusa meso jami kulimika ni yenu kunulinga chikalu; ngukateteho A-Yunda eswe.

¹² Mungutambula masalila ja A-Yunda wano hasa meso jo kwiza kutwama mu chifuchi cha Engitu mba eswe makakuwa. Mwe mu chifuchi cha Engitu makalimbuka. Makakuwa ni katana ni kapunga. Chize kuli mukepe ndo kuli munene eswe kumakakuwa ni katana ni kapunga; kumakalumuka sau, ni chuma cha mwongo, ni shingo, ni luchoko.

¹³ Munguhana kastigu kuli waze anatwama mu chifuchi cha Engitu chizechene ngwe nalambile Yerusaleme ni katana, ni kapunga, ni chilungo,

¹⁴ chocho niumwe hakachi ka masalila ja A-Yunda waze ejile kutwama mu chifuchi cha Engitu momboka, hanji kutwama ni mwono, hanji kuhiluka ku chifuchi cha Yunda kuze anazange kuhiluka ni kutwama. Mumu kechi kahilukako, shina amwe akwa kuchina.

¹⁵ Mba malunga waze eswe anyingikine ngwo, Mapwo jetu hanochela insensu mazambi eka, ni e mapwo waze te anamanako, chikungulwila chinene cha waze eswe atwamine mu patarose, mu chifuchi cha Engitu akumbulwile Jeremia ngwo,

¹⁶ Ha kutwala ku liji lino watwaha mu jina lia Yehova, kutuchi kukupanjika.

¹⁷ Mutulinga yuma yize yeswe hitwalakenya ni shingo, kwochela insensu mwe mwanangana wa pwo wa malilu, ni kumuzujila milambu ya kunwa chizechene ngwe twalingile yetu ni tulamba twetu, ni mianangana jetu ni alemu Jetu mu yihunda ya Yunda ni mu matapalo ja Yerusaleme. Mumu ha miaka yize twapwile ni kulia cha kulumbama, twawahile, kutwamwene chipi.

¹⁸ Alioze muze twalitwaminyine kwochela insensu mwanangana wa pwo wa malilu ni kumuzujila milambu ya kunwa twahona yeswe; tunakuwu ni katana ni kapunga.

¹⁹ Mapwo yamba nawa ngwo, Muze twochelele insensu mwe mwanangana wa pwo wa malilu ni kumuzujila milambu ya kunwa, te malunga jetu kachitayijile, muze twamulingilile mbolo ni kwesekaho Chizulie chenyi ni kumuzujila milambu ya kunwa?

²⁰ Jeremia yakumbulula kuli atu eswe, malunga ni mapwo, waze eswe hamukumbulula chocho ngwenyi,

²¹ Ha kutwala ku insensu yize nwochele mu yihunda ya Yunda ni mu matapalo ja Yerusaleme, yenu ni tulamba twenu, ni mianangana jenu ni alemu jenu, ni akwa chifuchi, te Yehova wayivulamine? Kayewulukile nyi?

²² Yehova te kahashile kusúla ni yitanga yenu yipi, ni yuma ya kuzelwokesa yize nwalingile, kashika chifuchi chenu hichalumuka cha hululu, ni cha kwenyeka, ni shingo, kuchishi atu ndo musono uno.

²³ Chipi chino cheswe hichanuwana ndo musono mumu nwochele insensu, ni kuvulumuna Yehova; kunwononokene ku liji lia Yehova, chipwe kwenda nikulita ni shimbi jenyi, hanji yiyulo yenyi, hanji Shindakenyo jenyi.

²⁴ Jeremia yamba kuli atu eswe ni kuli mapwo eswe ngwenyi, Ivwenu liji lia Yehova enu A-Yunda eswe nuli mu chifuchi cha Engitu.

²⁵ Yehova-wa-Tujita, Zambi ya Izalele kanambe ngwenyi, Enu ni mapwo jenu hinwamba ni makanwa jenu ni kuchilinga ni moko jenu ngwenu, Kumutukalinga yilakenyo yetu ya shingo yize hitwalakenya tukochele insensu mwe mwanangana wa pwo wa malilu nikumuzujila milambu ya kunwa. Hikolesenu yilakenyo yenu, nukayilinge.

²⁶ Kashika ivwenu liji lia Yehova enu A-Yunda eswe nwatwama mu chifuchi cha Engitu. Yehova kanambe ngwenyi, Hinalishinga ni jina liami linene ngwami, Jina liami kechi kulitongola nawa ni kanwa lia mutu niumwe Ka-Yunda mu chifuchi cha Engitu ngwenyi, Ni mwono wa Mwene Yehova.

²⁷ Pundu, ngunatale kuli ayo kwalinga yikalu, hi yipema ko. A-Yunda eswe waze ali mu chifuchi cha Engitu makakuwa ni katana ni kapunga ndo makahwa lume.

²⁸ Waze kechi kafwa ni katana makakatuka ku chifuchi cha Engitu akahiluke ku chifuchi cha Yunda a piliwiji wika hanga masalila ja A-Yunda waze ejile kutwama mu chifuchi cha Engitu kumakanyingika liji lize mulikola shina nihami, nyi shina nilio.

²⁹ Yehova kanambe ngwenyi, Chilayi mungunwaha cha kunulweza chize mungunwaha kastigu muno mwene hanga nukanyingike pundu maliji jami kumakakola kulimika ni yenu kunulinga yikalu.

³⁰ Yehova kanambe ngwenyi, Kumungukakunjika Falau Hofara mwanangana wa Engitu kuli akwa kole jenyi ni kuli waze anafupu kumushiha, chizechene ngwe nakunjikile Zedekia mwanangana wa Yunda kuli Nabukanezore mwanangana wa Babilonia mukwa kole yenyi kanda mukwa kufupa kumushiha.