Jeremia 43 - MUKANDA USANDU WA ZAMBI 1975

¹ Muze Jeremia hamana kuhanjika ni e atu eswe maliji ano eswe a Yehova Zambi yo, iye Yehova Zambi yo hamutuma no kuli ayo,

² Azaria mwana Hoshaia ni Johanane mwana Karea ni akwa shino eswe ambile kuli Jeremia ngwo, Mahuza unambe. Yehova Zambi yetu kakutumine ukambe ngwe, Kanda nuya ku Engitu nutwameko.

³ Baruke mwana Neria kakuvundula kulimika ni yetu akaakunjike kuli A-Kaletea o akatushihe hanji akatutwale ku unjize mu Babilonia.

⁴ Chocho Johanane mwana Karea, ni tusongo eswe a maswalale, ni e atu eswe kononokene ku liji lia Yehova, akatwame mu chifuchi cha Yunda.

⁵ Alioze Johanane mwana Karea ni tusongo eswe a maswalale yanda masalila ja A-Yunda eswe, waze te hakatuka ku yifuchi yeswe kuze haahumina, akahiluke atwame mu Yunda—

⁶ ni malunga, ni mapwo, ni ana, ni alemu ja mapwo, ni mutu mweswe Nabuzaradane kapitau ka tulayi hahichika ni Gedalia mwana Ahikame mwana Shafane; yanda nawa profeta Jeremia ni Baruke mwana Neria.

⁷ Yaya ku chifuchi cha Engitu mumu kononokene ku liji lia Yehova. Yaheta ku Tafane.

⁸ Liji lia Yehova liejile kuli Jeremia mu Tafane,

⁹ ngwenyi, Anda mu moko je mawe anene, ukaavumbike mu ndambo ya mawe ku unjililo wa zuwo lia Falau mu Tafane, kumeso ja malunga ja A-Yunda.

¹⁰ Mba muwamba kuli ayo ngwe, Yehova-wa-Tujita, Zambi ya Izalele kanambe ngwenyi, Kumungukatuma ngukasake kavumbi kami Nabukanezore mwanangana wa Babilonia mba iye kumakanuka ngunja yenyi he helu lia mawe wano hinavumbika; kumakazazulwilaho mbalaka yenyi ya wanangana.

¹¹ Kumakeza ni kulamba chifuchi cha Engitu, ni kuhana ku chilungo waze hanaafunjikila chilungo, ni kukunjika ku ufunge waze hanaafunjikila ufunge, ni kukunjika ku katana waze hanaafunjikila katana.

¹² Kumakawika kahia mu matembele ja mazambi ja Engitu; kumakaocha ni kwatwala ku ufunge. Kumakapemesa chifuchi cha Engitu ngwe kafunga ka yimuna kakupemesa yina ku mazalo jenyi; mba kumakakatukako ni sambukila.

¹³ Kumakapalwola yimanguji ya mawe yize yili ku Heliopolu mu chifuchi cha Engitu; kumakocha ni kahia matembele ja mazambi ja Engitu.