Jeremia 41 - MUKANDA USANDU WA ZAMBI 1975

¹ Ha kakweji wamuchishimbiali Ishemali mwana Netania, mwana Elisama, wa ku munyachi wa mwanangana, umwe wa hakachi ka tuliamanga alutwe a mwanangana yeza ni kumi lia malunga kuli Gedalia mwana Ahikame ku Mizepa. Shimbu machilia hamuwika kuze kwene ku Mizepa

² Ishemali mwana Netania ni e kumi lia malunga hamuwika, yakatuka, yalamba Gedalia mwana Ahikame mwana Shafane ni katana, yamushiha, yoze mwanangana wa Babilonia hamusa mukwa kuyula chifuchi.

³ Ishemali yashiha nawa A-Yunda eswe waze apwile hamwe ni Gedalia ku Mizepa, ni maswalale ja A-Kaletea aze apwileko.

⁴ Muze hashiha Gedalia mu kucha shimbu niumwe kanda achinyingika,

⁵ makumi nake a malunga yaheta a kukatuka ku Shekeme, ni Shilo, ni Samaria, ni wevu wo wa kutewula ni mazalo a kupulapula, ni mijimba yo ya kulemieka. Kananeha te milambu ya wunga ni insensu akayilambule ku tembele ya Yehova.

⁶ Ishemali mwana Netania yatuhuka mu Mizepa akaapatwize nikulila shimbu machiya. Ha kutakana no yamba ngwenyi, Njilenu kuli Gedalia mwana Ahikame.

⁷ Ha kuheta mu chihunda, Ishemali mwana Netania ni malunga aze ali no yaashiha, nikwambila mu wina wa meya.

⁸ Alioze kwapwile kumi lia malunga hakachi ko ambile kuli Ishemali ngwo, Kanda utushiha mumu tuli ni tiliku, ni sevada, ni maji ni wuchi, yeswe ya kutulika, ya kusweka mu minda. Chocho yalitwamina; kaashihile hamwe ni masepa jo.

⁹ Wina wa meya muze Ishemali yanyasa mijimba yeswe ya malunga aze hashiha, wapwile wina unene uze te mwanangana Asa walingile ha kulikwasa mu jita ni Mbasha mwanangana wa Izalele. Ishemali mwana Netania yauzalisa ni waze hashiha.

¹⁰ Mba Ishemali yakwata ufunge atu akwo eswe waze apwile mu Mizepa, ana a mwanangana a mapwo ni atu eswe waze asalile mu Mizepa, te Nabuzaradane kapitau ka tulayi haakunjika kuli Gedalia mwana Ahikame. Ishemali mwana Netania yaakwata ufunge, yakatuka akaye kuli A-Amone.

¹¹ Alioze muze Johanane mwana Karea ni tusongo eswe ja maswalale hamwe nenyi evwile yipi yeswe Ishemali mwana Netania halinga,

¹² yatwala malunga jo eswe, yaya mukwasa jita ni Ishemali mwana Netania. Yamuwana ku Chitende chinene chili ku Ngibeone.

¹³ Muze atu aze eswe apwile hamwe ni Ishemali hamona Johanane mwana Karea ni tusongo eswe a maswalale hamwe nenyi, awahililile.

¹⁴ Chocho atu aze eswe Ishemali hachiza ku Mizepa funge yalumuka, yahiluka nikwiza kuli Johanane mwana Karea.

¹⁵ Alioze Ishemali mwana Netania yatusuka kuli Johanane hamwe ni malunga nake, yaya kuli A-Amone.

¹⁶ Mba Johanane mwana Karea ni tusongo eswe a maswalale hamwe nenyi, yatambula atu aze eswe asalile waze Ishemali mwana Netania achijile ku Mizepa funge, muze hashiha Gedalia mwana Ahikame—maswalale, ni mapwo, ni ana, ni aunuku, waze eswe yaneha ku Ngibeone.

¹⁷ O yaya, yatwama ku Gerute Chimame hakamwihi ni Mbeteleme ni kunyonga kuya ku Engitu

¹⁸ mumu ha mukunda wa A-Kaletea. Aavwilile woma mumu Ishemali mwana Netania hashiha Gedalia mwana Ahikame, yoze mwanangana wa Babilonia hasela kuyula chifuchi.